༄༅། །ཕྱི་ལོ་ ༢༠༢༣ ཟླ་བ་ ༡༢ ཚེས་ ༢༧ ཉིན་བོད་ཀྱི་ཆབ་སྲིད་བཙོན་ཟུར་མགོ་ལོག་འཇིགས་མེད་ལགས་ཨོསྟྲེ་ལི་ཡཱའི་སྐུ་ཚབ་དོན་ཁང་དུ་ཆེད་ཕེབས་ཀྱིས་སྐུ་ཚབ་དོན་གཅོད་ཀརྨ་སེངྒེ་ལགས་དང་མཇལ་འཕྲད་གནང་ཡོད།

དེ་ཡང་མཇལ་འཕྲད་སྐབས་སྐུ་ཚབ་དོན་གཅོད་ཀརྨ་སེངྒེ་ལགས་ཀྱིས་མགོ་ལོག་འཇིགས་མེད་ལགས་སུ་སྐུ་ཚབ་དོན་ཁང་གི་ལས་འགན་དང་། དམིགས་ཡུལ། ཉེ་ལམ་ལས་དོན་ཇི་བརྩམས་སོགས་ཀྱི་སྐོར་ངོ་སྤྲོད་གནང་བ་དང་སྦྲགས། ཆབ་སྲིད་བཙོན་ཟུར་མགོ་ལོག་འཇིགས་མེད་ལགས་ཀྱིས་བོད་ནང་གི་བོད་མིའི་མངོན་འདོད་ཆེད་བློས་གཏོང་ཆེན་པོས་འཐབ་རྩོད་གནང་བར་ཐུགས་རྗེ་ལེགས་འབུལ་ཞུས་ཡོད།

མགོ་ལོག་འཇིགས་མེད་ལགས་ནི་བོད་ཀྱི་སྙན་གྲགས་ཆེ་བའི་ཆབ་སྲིད་བཙོན་ཟུར་ཞིག་ཡིན་པ་དང་། ཁོང་གིས་རྒྱ་ནག་དམར་ཤོག་གཞུང་གི་གདུག་རྩུབ་ཆེ་བའི་སྲིད་བྱུས་ལ་གདོང་ལེན་གྱིས་བོད་མིའི་རང་དབང་གི་མངོན་ཆེད་འཐབ་རྩོད་གནང་ཡོད་པ་མ་ཟད། བཙན་བྱོལ་ནང་དུ་ཕེབས་པའི་རྗེས་སུའང་བོད་དོན་འཐབ་རྩོད་མུ་མཐུད་གནང་མུས་ཡིན་པ་བཅས།།