༄༅། །བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གི་བེལ་ཇ་ཡམ་ཁུལ་གྱི་གཞུང་འབྲེལ་ཕྱོགས་ཕེབས་ལེགས་པར་མཇུག་སྒྲིལ་ཡོད་པ་རེད།

དེ་ཡང་བེལ་ཇ་ཡམ་དུ་ཕྱི་དྲིལ་བཀའ་བློན་མཆོག་གིས་བེལ་ཇ་ཡམ་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་གི་ཚོགས་གཙོ་ཨེལ་སི་ཝན་ཧུལ་ཕ་ (Els van Hoof) མཆོག་དང་འབྲེལ་ཡོད་ལས་བྱེད་ལྷན་མཇལ་འཕྲད་གནང་སྟེ་མ་འོངས་ལས་འཆར་ཁག་གི་སྐོར་གྲོས་མོལ་གནང་ཞིང་། སྐབས་དེར་ཨེལ་སི་ཝན་ཧུལ་ཕ་མཆོག་གིས་རྒྱ་ནག་དང་འབྲེལ་བའི་གྲོས་ཚོགས་འཐུས་མིའི་མཉམ་སྦྲེལ་ཚོགས་ཆུང་ (Inter Parliamentary Alliance on China) ཐོག་བོད་དོན་གླེང་སློང་གནང་རྒྱུའི་ཞལ་བཞེས་དང་། རྒྱ་ནག་གཞུང་གིས་བོད་ནང་མི་སེར་སྤེལ་ཡུལ་གཏན་འཇགས་སློབ་གྲྭ་བརྒྱུད་བོད་ཀྱི་རིག་གཞུང་རྩ་མེད་གཏོང་བཞིན་པ་མ་ཟད། ཨིན་ཡིག་ཐོག་བོད་ཀྱི་མིང་བརྗེ་འགྱུར་བཏང་བར་ཐུགས་འཚབ་བསྟན་ཡོད་པ་རེད།

ཆུ་ཚོད་གཅིག་ཙམ་གྱི་མཇལ་མོལ་སྐབས་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་བོད་ནང་གི་ཛ་དྲག་གནས་སྟངས་དང་། བོད་མིའི་སྒྲིག་འཛུགས་ཀྱི་ད་ལྟའི་གནས་བབ། བོད་དང་འབྲེལ་བའི་རྒྱལ་སྤྱིའི་འབྲེལ་ལམ། བོད་མི་རྣམས་ཀྱིས་རྒྱལ་སྤྱིའི་སྤྱི་ཚོགས་ལ་རེ་བ་གང་འཆང་གི་ཡོད་མེད་སོགས་ཀྱི་སྐོར་དང་། དེ་བཞིན་བོད་དོན་འཐབ་རྩོད་གསོན་ཐུབ་པ་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་དག་པའི་དབུ་ཁྲིད་ལམ་སྟོན་དང་། གཞིས་ལུས་རྒྱ་ཆེ་མི་མང་གི་སེམས་ཤུགས། རྒྱལ་སྤྱིའི་རྒྱབ་སྐྱོར་ལ་བརྟེན་ནས་བྱུང་བ་ཡིན་སྐོར་གསལ་བཤད་གནང་ཡོད། ད་དུང་བཀའ་བློན་མཆོག་གིས་བོད་ནང་གི་ཛ་དྲག་གི་གནས་སྟངས་གསལ་འདོན་དང་། བོད་ནང་ཆོས་ཕྱོགས་ཀྱི་ཐོབ་ཐང་དང་། རང་དབང་ལ་བརྩི་མེད་གཏོང་བ། དགོན་སྡེ་ཁག་ལ་དམིགས་འབེན་གཏད་ནས་དྲག་གནོན་བྱེད་པའི་སྲིད་བྱུས། དེ་བཞིན་བོད་ཕྲུག་རྣམས་བཙན་ཤེད་ཀྱིས་མི་སེར་སྤེལ་ཡུལ་གྱི་གཏན་འཇགས་སློབ་གྲྭ་ཁག་ནང་བཙན་འཇུག་གིས་བོད་ཕྲུག་ཚོར་ལོ་རྒྱུས་བཅོས་མ་དང་། རྒྱ་ཡིག་གལ་གནད་ཆེར་འཛིན་པའི་སློབ་གསོ་སྤྲོད་ཀྱི་ཡོད་སྐོར་འགྲེལ་བརྗོད་གནང་། ཕྱོགས་མཚུངས་ཁོང་མོས་བོད་མིའི་སྒྲིག་འཛུགས་ནས་བོད་རྒྱའི་དཀའ་རྙོག་སེལ་ཐབས་སུ་དབུ་མའི་ལམ་གྱི་སྲིད་བྱུས་ཐོག་ཤར་བསྐྱོད་དང་། དེ་འབྲེལ་བོད་མི་ཡོངས་ལ་མིང་དོན་མཚུངས་པའི་རང་སྲིད་རང་སྐྱོང་ཡོང་ཐབས་ཀྱི་བསམ་འཆར་ཡིག་ཆ་སོགས་ནང་བོད་རྒྱ་གཉིས་ཀའི་དཀའ་རྙོག་སེལ་ཐབས་ཀྱི་ཐབས་ལམ་བསྟན་ཡོད་པ་གསུངས།

ཉིན་རྒྱབ་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་བེལ་ཇ་ཡམ་སྲིད་གཞུང་གི་གནད་ཡོད་མི་སྣ་ཁག་ཅིག་དང་ལས་བྱེད་ལྷན་མཇལ་འཕྲད་གནང་སྟེ་བོད་དོན་དང་འབྲེལ་བའི་གནད་དོན་མང་པོའི་ཐོག་གྲོས་བསྡུར་གནང་ཡོད། སྐབས་དེར་ཁོང་མོས་བོད་མིའི་སྒྲིག་འཛུགས་ངོས་ནས་བོད་རྒྱའི་དཀའ་རྙོག་སེལ་ཐབས་རྒྱ་ནག་གཞུང་དང་ལྷན་དུ་གྲོས་མོལ་གནང་རྒྱུའི་དམ་བཅའ་བརྟན་པོ་ཡོད་ནའང་། བོད་མིའི་སྒྲིག་འཛུགས་ངོས་ནས་ད་ལྟའི་ཆར་རྒྱ་ནག་གཞུང་གིས་བོད་ནང་དྲག་གནོན་ཆེ་བའི་སྲིད་བྱུས་ལག་བསྟར་བྱེད་བཞིན་པར་སྐྱོན་བརྗོད་བྱ་རྒྱུར་འཛེམ་ཟོན་བྱེད་ཀྱི་མ་རེད་ཅེས་ནན་བརྗོད་གནང་བ་མ་ཟད། བེལ་ཇ་ཡམ་གཞུང་ནས་བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་རྒྱུན་གནས་ཆེད་ཡུ་རོབ་མཐུན་ཚོགས་ཀྱི་བོད་དོན་དམིགས་བསལ་འབྲེལ་མཐུད་པ་བསྐོ་བཞག་གནང་རྒྱུར་ཐུགས་འགན་བཞེས་གནང་ཡོད་བའི་རེ་སྐུལ་ཞུས་ཡོད། དེ་བཞིན་གོ་སྐབས་དམ་འཛིན་གྱིས་བཀའ་བློན་མཆོག་གིས་བེལ་ཇ་ཡམ་ཁུལ་གྱི་བོད་མིའི་གཟའ་མཇུག་སློབ་གྲྭའི་འཛིན་ཁང་གི་དཀའ་ངལ་སྐོར་སྙན་སེང་དང་དེ་འབྲེལ་རྒྱབ་སྐྱོར་ཡོང་བའི་འབོད་སྐུལ་ཞུས་ཡོད་པ་རེད། བོད་མིའི་སྒྲིག་འཛུགས་ཕྱི་དྲིལ་བཀའ་བློན་ནོར་འཛིན་འཛིན་སྒྲོལ་མ་མཆོག་གི་བེལ་ཇ་ཡམ་ཁུལ་གྱི་གཞུང་འབྲེལ་ཕྱོགས་ཕེབས་སྐབས་བེལ་ཇ་ཡམ་སྐུ་ཚབ་དོན་ཁང་གིས་འབྲེལ་མཐུད་ཞུས་ཡོད། སྐབས་དེར་ས་གནས་སུ་ཡོད་པའི་བེལ་ཇ་ཡམ་བོད་རིགས་སྤྱི་མཐུན་ཚོགས་པ་དང་། དབུས་གཙང་ཚོགས་པ། ཆུ་བཞི་སྒང་དྲུག་ཚོགས་པ། མདོ་སྨད་ཚོགས་པ། ས་གནས་བོད་ཀྱི་གཞོན་ནུ་ལྷན་ཚོགས། ས་གནས་བོད་ཀྱི་བུད་མེད་ལྷན་ཚོགས་ཐུན་མོང་ནས་ཕྱི་དྲིལ་བཀའ་བློན་མཆོག་ལ་ཆེ་བསྟོད་དགོང་ཚིགས་གསོལ་སྟོན་ཞིག་ཕུལ་ཡོད།

ཕྱི་དྲིལ་བཀའ་བློན་ལྷན་དུ་བེལ་ཇ་ཡམ་སྐུ་ཚབ་དོན་གཅོད་རིག་འཛིན་ཆོས་སྒྲོན་ལགས་དང་། དྲུང་ཆེ་འཕྲིན་ལས་དབང་འདུས་ལགས་གཉིས་ལྷན་བཅར་ཞུས་ཡོད་པ་བཅས།།