༄༅། །རྒྱ་གར་ལྷོ་ཕྱོགས་ཀརནཱ་ཊཀ་མངའ་སྡེའི་ནང་གི་ཀོ་ལི་གྷལ་དོན་ལྡན་གླིང་བོད་མིའི་གཞིས་ཆགས་ས་ཁུལ་དུ་འདི་ལོ་ཆར་དུ་དུས་ཐོག་མ་འབབ་པའི་རྐྱེན་གྱིས་མངའ་སྡེ་གཞུང་གིས་དོན་ལྡན་གླིང་ཐེ་བའི་ས་ཁུལ་ཁག་ཅིག་ཐན་པའི་དཀའ་ངལ་འཕྲད་ཡུལ་དུ་གསལ་བསྒྲགས་བྱས་ཡོད།
ཐན་པའི་དཀའ་ངལ་ལ་བརྟེན་ས་གནས་ཀྱི་ཞིང་པ་མང་པོའི་སྟོན་འབྲས་ལ་གྱོང་གུན་ཆེན་པོ་ཕོག་ཡོད་པ་ལྟར་བོད་མི་ཞིང་པ་རྣམས་ལའང་སྤྱི་མཚུངས་ཀྱི་གྱོང་གུན་རག་ཡོད། བོད་མི་ཞིང་པ་ཕལ་མོ་ཆེས་བོད་མིའི་སྒྲིག་འཛུགས་ནང་སྲིད་ལས་ཁུངས་སམ་ས་གནས་མཉམ་འབྲེལ་ནས་སྐྱེད་མེད་བུན་གཡར་ལས་གཞིའི་འོག་ནས་སོ་ནམ་འདེབས་ལས་ཀྱི་འགྲོ་གྲོན་བུ་ལོན་གཡར་གྱི་ཡོད་ནའང། འདི་ལོར་ཆར་པ་དུས་ཐོག་མ་འབབ་པའི་རྐྱེན་གྱིས་སྟོན་འབྲས་ལ་ཕམ་ཉེས་ཆེན་པོ་བྱུང་བ་མ་ཟད། ཞིང་པ་མང་པོ་ཞིག་བུ་ལོན་འོག་ཏུ་འཚུད་དེ་དཀའ་ངལ་འཕྲད་བཞིན་ཡོད་པས། ས་གནས་ཀྱི་དངོས་ཡོད་གནས་སྟངས་རྟོག་ཞིབ་སླད་ནང་སྲིད་ལས་ཁུངས་ཀྱི་སྐྱེ་ལྡན་སོ་ནམ་ཉམས་ཞིབ་དང་སྦྱོང་བརྡར་ཚན་པའི་འགན་འཛིན་ཚེ་རིང་རྡོ་རྗེ་ལགས་དང་འབྲེལ་ལས་རྣམ་པ་ཕྱི་ལོ་ ༢༠༢༣ ཟླ་བ་ ༡༢ ཚེས་ ༢༠ ཉིན་ས་གནས་སུ་ཆེད་ཕེབས་ཀྱིས་ཐན་པ་ལ་བརྟེན་ནས་བྱུང་བའི་དཀའ་ངལ་རྒྱུས་ལོན་ཞུས་པ་དང་འབྲེལ། ས་གནས་འགོ་འཛིན་དང། མཉམ་ལས་ཚོགས་གཙོ་དང་དྲུང་ཆེ། གྲོང་སྡེ་སོ་སོའི་བརྒྱ་དཔོན། སོ་ནམ་སློབ་སྟོན་པ་རྣམས་དང་ལྷན་དུ་དཀའ་ངལ་ལ་གདོང་ལེན་བྱེད་ཕྱོགས་གང་དགའ་ཇི་དགེའི་ཐད་གྲོས་བསྡུར་གནང་ཡོད།
ཕྱི་ཉིན་ཚོགས་བཅར་བ་རྣམས་ཀྱིས་ཐན་པའི་དཀའ་ངལ་རྟོག་ཞིབ་ཚོགས་ཆུང་ཞིག་བསྐོ་བཞག་གིས་གྲོང་སྡེ་ཁག་ ༢༢ སོ་སོར་གནས་སྟངས་རྟོག་ཞིབ་རྒྱུས་ལོན་གནང་བར་ཆེད་ཕེབས་གནང་ཡོད་པ་བཅས།། 
