༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༣ ཟླ་ ༡༢ ཚེས་ ༡༥ ཉིན་དཔལ་ལྡན་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་གིས་སྣེ་ཁྲིད་འོག སྤྱི་འཐུས་བསྟན་པ་ཡར་འཕེལ་ལགས་དང་། སྤྱི་འཐུས་དགེ་བཤེས་ལྷ་རམས་པ་གོ་བོ་བློ་བཟང་ཕན་བདེ་ལགས། སྤྱི་འཐུས་ཙ་ནེ་ཚང་དོན་འགྲུབ་བཀྲ་ཤིས་ལགས་བཅས་ལས་གྲུབ་པའི་བོད་མི་མང་སྤྱི་འཐུས་རྒྱུན་ལས་ཀྱི་སྐུ་ཚབ་ཚོགས་ཆུང་ཞིག་རྒྱ་གར་རྒྱལ་ས་ལྡི་ལི་མངའ་སྡེའི་གྲོས་ཚོགས་སུ་ཕེབས་བཅར་གྱིས་ཚོགས་གཙོ་དང་གྲོས་ཚོགས་འཐུས་མི་དང་། ལྡི་ལི་མངའ་སྡེའི་བློན་ཆེན་སོགས་མཇལ་འཕྲད་ཀྱིས་བོད་དོན་ཞུ་སྐུལ་སོགས་ཀྱི་ལས་རིམ་བསྐྱངས་གནང་ཡོད།དེ་ཡང་བོད་མི་མང་སྤྱི་འཐུས་རྒྱུན་ལས་ཀྱི་སྐུ་ཚབ་ཚོགས་ཆུང་གི་ཞུ་སྐུལ་ཉིན་བཞི་པར་ཐོག་མར་རྒྱ་གར་གྲོས་ཚོགས་འོག་མའི་འཐུས་མི་སྐུ་ཞབས་ (Shri Prataprao Jadhav) མཆོག་དང་ཁོང་གི་ལམ་སྟོན་པ་སྐུ་ཞབས་ (Shri Hritik Ghuge) ལགས་སོགས་གནད་ཡོད་མི་སྣ་ཁག་ཅིག་དང་མཇལ་འཕྲད་གནང་ནས་བོད་དོན་ཞུ་སྐུལ་གནང་།

དེ་རྗེས་བོད་མི་མང་སྤྱི་འཐུས་ཚོགས་གཞོན་མཆོག་གིས་སྣེ་ཁྲིད་འོག་རྒྱུན་ལས་རྣམས་ལྡི་ལི་མངའ་སྡེའི་གྲོས་ཚོགས་སུ་ཚོགས་གཙོ་ (Shri Ram Niwas Goel) མཆོག་གིས་གྲོས་ཚོགས་འཚོགས་བཞིན་པའི་སྐབས་དགའ་བསུ་ཞུ་གནང་བ་དང་དེ་རྗེས་མངའ་སྡེ་གྲོས་ཚོགས་ཀྱི་ཚོགས་གཙོ་ (Shri Ram Niwas Goel) མཆོག་དང་། མངའ་སྡེའི་ཤེས་ཡོན་བློན་ཆེན་ལྕམ་སྐུ་ (Smt. Atishi Marlena) མཆོག་དང་། མངའ་སྡེའི་ཁོར་ཡུག་བློན་ཆེན་སྐུ་ཞབས་ (Shri Gopal Rai) མཆོག མངའ་སྡེའི་གྲོས་ཚོགས་འཐུས་མི་སྐུ་ཞབས་ (Shri Ajay Dutt) མཆོག མངའ་སྡེའི་གྲོས་ཚོགས་འཐུས་མི་སྐུ་ཞབས་ (Shri Madan Lal) མཆོག མངའ་སྡེའི་གྲོས་ཚོགས་འཐུས་མི་ལྕམ་སྐུ་ (Smt. Bhavana Gaur) མཆོག མངའ་སྡེའི་གྲོས་ཚོགས་འཐུས་མི་ལྕམ་སྐུ་ (Smt. Pramila Tokas)  མཆོག་སོགས་མངའ་སྡེའི་གྲོས་ཚོགས་འཐུས་མི་ཁག་ཅིག་དང་མཇལ་འཕྲད་གནང་བ་དང་། དེ་རྗེས་མངའ་སྡེའི་གྲོས་ཚོགས་ཚོགས་གཙོ་དང་འཐུས་མི་རྣམས་ནས་བོད་མི་མང་སྤྱི་འཐུས་རྒྱུན་ལས་ཀྱི་སྐུ་ཚབ་ཚོགས་ཆུང་ལ་གུང་ཚིགས་གསོལ་སྟོན་གོ་སྒྲིག་གནང་ཡོད་པ་རེད།ཕྱི་དྲོར་རྒྱ་གར་ (Rashtriya SwayamSevak Sangh (RSS) ཚོགས་པའི་དབུ་ཁྲིད་དང་འཕགས་བོད་འབྲེལ་མཐུད་ཚོགས་པའི་ལམ་སྟོན་པ་སྐུ་ཞབས་ (Shri Indresh Kumar) མཆོག་དང་མཇལ་འཕྲད་ཞུ་གནང་བ་བཅས། །