༄༅། །ཉི་འོང་སྐུ་ཚབ་དོན་ཁང་གིས་ཀྲོག་ཡོར་སློབ་སྦྱོང་བྱེད་བཞིན་པའི་བོད་ཕྲུག་རྣམས་ཀྱི་ཆེད་དུ་བོད་དོན་སྐོར་གྱི་ཟབ་སྦྱོང་ཞིག་གོ་སྒྲིག་གནང་ཡོད། ཟབ་སྦྱོང་འདིའི་དམིགས་ཡུལ་ནི་སློབ་གཉེར་བ་རྣམས་ལ་བོད་དོན་སྤྱི་དང་། ཡང་སྒོས་བོད་མིའི་སྒྲིག་འཛུགས་ཀྱི་ལས་དོན་བྱེད་ཕྱོགས། བོད་ནང་གི་གནས་སྟངས་སྐོར་གྱི་གནས་ཚུལ་རྒྱུན་སྟོན་ཞུ་རྒྱུ་ཡིན་པ་རེད།
སྐབས་དེར་ཉི་འོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་ཚོགས་བཅར་བ་རྣམས་ལ་དགའ་བསུ་དང་འབྲེལ། བོད་མི་རྣམས་བཙན་བྱོལ་དུ་གྱར་དགོས་དོན་དང་། རྒྱ་ནག་གཞུང་གིས་དྲག་གནོན་འོག་བོད་མི་རྣམས་ནས་དཀའ་སྡུག་མྱངས་ཚུལ་དྲན་གསོ་གནང་བ་མ་ཟད། སློབ་གཉེར་བ་རྣམས་ནས་ཉི་འོང་དུ་བོད་དོན་གོ་རྟོགས་སྤེལ་ཏེ་བོད་དོན་ལ་རྒྱབ་སྐྱོར་ཐོབ་ཐབས་འབད་རྩོལ་དགོས་པའི་འབོད་སྐུལ་གནང་། དེ་བཞིན་ཁོང་གིས་སློབ་གཉེར་བ་རྣམས་ནས་བོད་དོན་སྐོར་རྒྱུས་མངའ་ཡོང་བར་བོད་ཀྱི་ལོ་རྒྱུས་དང་། རིག་གཞུང་དང་འབྲེལ་བའི་དཔེ་དེབ། བོད་མིའི་སྒྲིག་འཛུགས་ཀྱི་གཞུང་འབྲེལ་དྲྭ་རྒྱ་ཁག་ལ་ལྟ་ཀློག་གནང་དགོས་པའི་ལམ་སྟོན་གནང་བའི་ཁར། སློབ་གཉེར་བ་རྣམས་ལ་བོད་ནང་གི་མི་སེར་སྤེལ་ཡུལ་གཏན་འཇགས་སློབ་གྲྭ་དང་། བཀའ་རྒྱ་ཨང་ ༡༩ པ་སོགས་ཀྱི་སྐོར་ངོ་སྤྲོད་གནང་ཡོད་པ་རེད།
དེ་རྗེས་ཉི་འོང་སྐུ་ཚབ་དོན་ཁང་གི་དྲུང་ཆེ་བཀྲ་ཤིས་དབྱངས་འཛོམས་ལགས་ཀྱིས་རང་ཉིད་བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་གནང་བའི་ཉམས་མྱོང་གསུངས་པ་དང་། རྩིས་པ་ཚེ་ལྷ་ལགས་ཀྱིས་བོད་ནང་གི་བོད་མིའི་འཚོ་བ་དང་། གཞིས་ལུས་བོད་མི་རྣམས་ཀྱིས་བྱེས་འབྱོར་བོད་མི་རྣམས་ལ་རེ་བ་གང་བཅང་གི་ཡོད་སྐོར་སོགས་གསུངས།
དེ་ནས་ཉི་འོང་གི་ཆི་བ་གཙུག་ལག་སློབ་གཉེར་ཁང་གི་བོད་ཕྲུག་སློབ་ཟུར་ཁག་ཅིག་ནས་རང་ཉིད་ཀྱི་མྱོང་ཚོར་གསུངས་པ་དང་སྦྲགས། ཆི་བ་བོད་རིགས་སློབ་ཟུར་ཚོགས་པའི་ངོ་སྤྲོད་དང་། སློབ་ཟུར་ཚོགས་པའི་ཚོགས་མི་གསར་པ་རྣམས་ངོ་སྤྲོད་གནང་ཡོད་པ་བཅས།། 
