༄༅། །ཕྱི་ལོ་ ༢༠༢༣ ཟླ་བ་ ༡༢ ཚེས་ ༡༥ ཉིན་གུཇ་རཱཏའི་རྩོམ་རིག་ཚོགས་པ་དང་། འབུམ་རམས་པ་ཨ་མི་ཏཱ་ཇོ་ཊི་ཀར་ཐེབས་རྩ་གཉིས་མཉམ་འབྲེལ་གྱིས་སྙན་གྲགས་ཆེ་བའི་ད་ལིཊ་རྩོམ་པོ་པོ་དང་། བོད་དོན་རྒྱབ་སྐྱོར་བ་འབུམ་རམས་པ་ཇོ་ཊི་ཀར་འདས་གྲོངས་སུ་གྱུར་ནས་ལོ་ངོ་གསུམ་འཁོར་བའི་དུས་དྲན་སྲུང་བརྩི་ཞུ་སླད་རྒྱལ་སྤྱིའི་ནང་པའི་རྩོམ་རིག་དང་རིག་གཞུང་གི་བགྲོ་གླེང་དང་། དཔེ་དེབ་དབུ་འབྱེད་ཀྱི་མཛད་སྒོ་ཞིག་གོ་སྒྲིག་གནང་ཡོད།
མཛད་སྒོའི་ཐོག་མར་ནང་པའི་དགེ་འདུན་པ་ཁག་ཅིག་ནས་ཤིས་བརྗོད་གསུང་འདོན་དང་། དེ་ནས་སྐུ་ཞབས་ཇོ་ཊི་ཀར་ལགས་ཀྱི་མཛད་རྗེས་དང་འབྲེལ་བའི་བརྙན་ཐུང་གཟིགས་འབུལ་གྲུབ་མཚམས་དབུས་གཙུག་ལག་སློབ་གཉེར་ཁང་གི་ཉེ་བའི་རིགས་བདག་ཀུལ་དིབ་ཨག་ནི་ཧོ་ཊི་ལགས་དང་། འབུམ་རམས་པ་ཧེ་མན་བྷཊ་ལགས། འབུམ་རམས་པ་ར་བ་ཐ་ལགས། དགེ་བཤེས་བསྟན་འཛིན་དམ་ཆོས་ལགས། འབུམ་རམས་པ་སུར་བ་དེ་ལགས། ཨ་ནིལ་པྲ་དན་ལགས་ནས་དཔེ་དེབ་དབུ་འབྱེད་གནང་ཡོད་པ་རེད།
སྐུ་ཞབས་ཇོ་ཊི་ཀར་ལགས་ནས་དབུ་འབྱེད་གསུང་བཤད་དུ་འབུམ་རམས་པ་ཨཱམྦེཊ་ཀར་ལགས་ཀྱི་སྐུ་ཚེའི་ལོ་རྒྱུས་དང་འབྲེལ་བའི་དཔེ་དེབ་སྐོར་ངོ་སྤྲོད་དང་། ཚོགས་འདུའི་ཐོག་གུཇ་རཱཏ་གནས་འཁོད་བོད་མི་སུད་ཚོང་བ་རྣམས་མཉམ་ཞུགས་གནང་བར་ཐུགས་རྗེ་ལེགས་འབུལ་ཞུས་རྗེས་དགེ་བཤེས་བསྟན་འཛིན་དམ་ཆོས་ལགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དུས་རབས་ཉེར་གཅིག་པའི་ནང་པ་བྱེད་དགོས་པ་དང་། དེ་ཡང་གཙོ་བོ་ཆོ་ག་ལས་རྒྱུ་མཚན་གལ་ཆེ་བར་བརྩི་དགོས་པའི་ལམ་སྟོན་བཀའ་སློབ་དགོངས་འདོན་འགྲེལ་བརྗོད་གནང་བ་མ་ཟད། རིགས་པ་ལ་བརྟེན་ནས་དད་པ་སྐྱེ་དགོས་པའི་གལ་གནད། མགོན་པོ་མཆོག་གི་ཐུགས་སྐྱེད་དམ་བཅའ་ཆེན་པོ་བཞིའི་སྐོར་ངོ་སྤྲོད་གནང་ཡོད།
སྐུ་ཞབས་ཇོ་ཊི་ཀར་ལགས་ནི་ཕྱི་ལོ་ ༢༠༢༠ ཟླ་བ་ ༡༢ ཚེས་ ༡༥ ཉིན་འདས་གྲོངས་སུ་གྱུར་ཡོད་པ་དང་། ཁོང་ནི་གུཇ་རཱཏ་མངའ་སྡེའི་ནང་དུ་བོད་དོན་རྒྱབ་སྐྱོར་ཚོགས་པ་གསར་འཛུགས་གནང་མཁན་དང་ཧིན་བོད་མཛའ་འབྲེལ་ཚོགས་པའི་རྒྱལ་ཡོངས་ཚོགས་གཞོན་ཟུར་པ་ཡིན། དེ་ཙམ་མ་ཟད་ཁོང་ནི་སྙན་གྲགས་ཆེ་བའི་ད་ལིཊ་རིགས་ཀྱི་ལོ་རྒྱུས་སྨྲ་བ་དང་། མཁས་དབང་ཞིག་ཀྱང་ཡིན་པ་བཅས།།
