༸སྐྱབས་རྗེ་ཀུན་བདེ་གླིང་རྟ་ཚག་རྗེ་དྲུང་སྐུ་ཕྲེང་དང་པོ་མཁས་གུབ་རྗེའི་གཅུང་པོ་སྙན་བརྒྱུད་གདམས་པའི་མངའ་བདག་དགའ་ལྡན་ཁྲི་ཆེན་བ་སོ་ཆོས་ཀྱི་རྒྱལ་མཚན་དཔལ་བཟང་པོ་སྐུ་མྱ་ངན་ལས་འདས་ཏེ་ལོ་ངོ་ ༥༥༠ འཁོར་བའི་བཀའ་དྲིན་རྗེས་དྲན་གྱི་མཛད་སྒོར་དཔལ་ལྡན་སྲིད་སྐྱོང་མཆོག་གིས་གསུང་བཤད་གནང་བ།

གསར་ལས་ཁང་གི་གསར་འགོད་པས།

༢༠༢༣-༡༢-༢༩

༄༅། །འདི་གའི་ཆེད་གཉེར་གསར་འགོད་པ་བློ་བཟང་སྒྲོལ་དཀར་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༣ ཟླ་བ་ ༡༢ ཚེས་ ༢༩ ཉིན་རྒྱབ་ཆུ་ཚོད་ ༣ པའི་ཐོག་གནས་མཆོག་རྡོ་རྗེ་གདན་རྒྱལ་སྤྱིའི་རིག་གཞུང་ལྟེ་གནས་ཁང་གི་ཚོགས་ཁང་ནང་༸སྐྱབས་རྗེ་ཀུན་བདེ་གླིང་རྟ་ཚག་རྗེ་དྲུང་སྐུ་ཕྲེང་དང་པོ་མཁས་གུབ་རྗེའི་གཅུང་པོ་སྙན་བརྒྱུད་གདམས་པའི་མངའ་བདག་དགའ་ལྡན་ཁྲི་ཆེན་བ་སོ་ཆོས་ཀྱི་རྒྱལ་མཚན་དཔལ་བཟང་པོ་སྐུ་མྱ་ངན་ལས་འདས་ཏེ་ལོ་ངོ་ ༥༥༠ འཁོར་བའི་བཀའ་དྲིན་རྗེས་དྲན་གྱི་མཛད་སྒོ་ཚོགས་ཡོད།

མཛད་སྒོའི་ཚོགས་མགོན་དུ་སྐུ་མགྲོན་གཙོ་བོ་འཁོན་རིགས་བསྟན་པའི་མངའ་བདག་༧དཔལ་ས་སྐྱ་གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་དང་། དམིགས་བསལ་སྐུ་མགྲོན་དུ་འཇམ་མགོན་༧རྒྱལ་བའི་རྒྱལ་ཚབ་དགའ་ལྡན་ཁྲི་ཐོག་བརྒྱ་དང་བཞི་པ་རྗེ་བཙུན་བློ་བཟང་བསྟན་འཛིན་མཆོག བྱང་རྩེ་ཆོས་རྗེ་སྒོ་སོག་རིན་པོ་ཆེ་མཆོག ཀུན་བདེ་གླིང་རྟ་ཚག་རྗེ་དྲུང་རིན་པོ་ཆེ་མཆོག་གིས་དབུས་པའི་བླ་ཆེན་རྣམ་པ་དང་། ཇོ་ནང་རྒྱལ་ཚབ་ངག་དབང་ཆོས་ཀྱི་སྣང་བ་མཆོག་དང་མཁན་པོ་བླ་སྤྲུལ་དགེ་བཤེས། དཔལ་ལྡན་བོད་མི་མང་སྤྱི་ཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག དཔལ་ལྡན་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག བདེ་སྲུང་བཀའ་བློན་རྒྱ་རི་སྒྲོལ་མ་མཆོག བཀའ་ཟུར་རྗེ་བཙུན་པདྨ་མཆོག བཀའ་ཟུར་འབྲོང་ཆུང་དངོས་གྲུབ་མཆོག བཀའ་ཟུར་ཀརྨ་ཡེ་ཤེས་མཆོག སྤྱི་འཐུས་རྒྱུན་ལས་རྣམ་པ་དང་། དེ་བཞིན་རྒྱ་གར་དབུས་གཞུང་གྲངས་ཉུང་མི་རིགས་ཚོགས་ཆུང་གི་ནང་པའི་སྐུ་ཚབ་ལྕམ་སྐུ་རིན་ཆེན་ལྷ་མོ་ལགས། རྒྱ་གར་ཧི་མ་ཅཱལ་མངའ་སྡེའི་གྲོས་ཚོགས་འཐུས་མི་སྐུ་ཞབས་ར་ཝི་ཁྲ་ཀུར་ལགས། གཞན་ཡང་གནད་ཡོད་སྐུ་མགྲོན་དང་། རྒྱ་ཆེའི་སེར་སྐྱ་མི་མང་བརྒྱ་ཕྲག་མང་པོ་ཚོགས་ཞུགས་གནང་ཡོད།

སྐབས་དེར་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་གསུང་བཤད་གནང་དོན། རྗེ་ཙོང་ཁ་པའི་དངོས་སློབ་སྙན་བརྒྱུད་བསྟན་པའི་མངའ་བདག་ཁྲི་ཆེན་བ་སོ་ཆོས་ཀྱི་རྒྱལ་མཚན་མཆོག་དགོངས་པ་མྱ་ངན་ལས་འདས་ཏེ་མི་ལོ་ ༥༥༠ འཁོར་བའི་དུས་དྲན་སྲུང་བརྩི་འདི་གནས་ཁྱད་པར་ཅན་བདག་ཅག་གི་སྟོན་པ་སངས་རྒྱས་བཅོམ་ལྡན་འདས་མངོན་པར་རྫོགས་པར་སངས་རྒྱས་པའི་འདན་ས་འདིར་གནང་བ་ནི་ཆོས་སྲིད་གཉིས་ཀའི་ཆ་ནས་དོན་སྙིང་ལྡན་པ་ཞིག་ཆགས་ཡོད།

རྗེ་འདི་མཁས་གྲུབ་རིན་པོ་ཆེའི་གཅུང་པོར་ལ་སྟོད་ལྡོག་གཞུང་དུ་སྐུ་འཁྲུངས་ཞིང་། སྐུ་གཞོན་ནུ་ནས་རབ་ཏུ་བྱུང་སྟེ་རྗེ་རིན་པོ་ཆེ་ཡབ་སྲས་རྣམས་ཀྱི་ཞབས་ལ་གཏུགས་ནས་དབེན་ས་སྙན་བརྒྱུད་དང་། གཅོད་ལ་སོགས་པའི་རི་བོ་དགེ་ལུགས་པའི་སྙན་བརྒྱུད་ཀྱི་གདམས་པ་ཟབ་ཅིང་རྒྱ་ཆེ་བ་དུ་མའི་བདག་པོ་ཆགས་ཤིང་། རྗེ་དགེ་འདུན་གྲུབ་པས་བ་སོ་ཆོས་རྗེ་འདི་ལུང་རྟོགས་ཀྱི་ཡོན་ཏན་གང་ས་ནས་གཞན་དང་མི་འདྲ་བས་དགའ་ལྡན་གྱི་ཁྲི་ལ་གདན་དྲངས་ན་ལེགས་ཞེས་ལུང་བསྟན་པ་བཞིན་དགའ་ལྡན་ཁྲི་རབས་དྲུག་པར་ཕེབས་ཏེ། སྐལ་བ་དང་ལྡན་པ་བགྲང་ལས་འདས་པ་རབ་བྱུང་བསྙེན་རྫོགས་དབང་ལུང་མན་ངག་མཐའ་ཡས་པ་རྩལ་ཞིང་། ཟུང་འཇུག་གྲུབ་པའི་སློབ་མ་མཆེད་གསུམ་བསྐྱངས་པས་མཚོན། ཆོས་སྲིད་ཀྱི་མཛད་འཕྲིན་རྒྱ་ཆེར་བསྐྱངས་ཡོད་པས། རྗེས་འཇུག་གདུལ་བྱ་རྣམས་ཀྱིས་ཁོང་གི་གསུང་གི་མཛད་པ་ལ་ཐོས་བསམ་སྒོམ་གསུམ་བྱས་ཏེ་བཤད་སྒྲུབ་ཡ་མ་བྲལ་བར་བྱ་རྒྱུ་ནི་རྗེས་དྲན་གྱི་མཆོག་ཡིན།

༸རྒྱལ་བ་སྐུ་ཕྲེང་བདུན་པ་དགོངས་པ་ཆོས་དབྱིངས་སུ་ཐིམ་རྗེས་ནས་བོད་ལ་དུས་འགྱུར་མ་བྱུང་བའི་བར་གྱི་ལོ་ངོ་ ༢༠༠ མ་ཟིན་ཙམ་ (༡༧༥༧ ནས་ ༡༩༥༠ བར་) གྱི་རིང་། ༸རྒྱལ་བ་སྐུ་ཕྲེང་དྲུག་གི་རིང་གཞུང་ས་དགའ་ལྡན་ཕོ་བྲང་གི་ཆབ་སྲིད་ཀྱི་དབང་ལུང་འཛིན་མཁན་རྒྱལ་ཚབ་ ༡༥ བྱོན་ཡོད་པའི་ཁོང་རྗེ་དྲུང་སྐུ་ཕྲེང་བརྒྱད་པ་སྟག་ཚ་ཡེ་ཤེས་བསྟན་པའི་མགོན་པོ་མཆོག་གིས་ཕྱི་ལོ་ ༡༧༩༡ ནས་ ༡༨༡༠ བར་ལོ་ངོ་ ༡༩ རིང་དང་། རྗེ་དྲུང་སྐུ་ཕྲེང་བཅུ་པ་ངག་དབང་དཔལ་ལྡན་ཆོས་ཀྱི་རྒྱལ་མཚན་མཆོག་གིས་ཕྱི་ལོ་ ༡༨༧༥ ནས་ ༡༨༨༦ བར་གྱི་ལོ་ངོ་བཅུ་གཅིག་རིང་རྒྱལ་ཚབ་ཀྱི་ཐུགས་འགན་བཞེས་ཏེ། ཆོས་སྲིད་ཀྱི་མཛད་འཕྲིན་རྒྱ་ཆེར་བསྐྱངས་ཡོད་པ་དང་། རྒྱལ་བའི་ཡོངས་འཛིན་དང་། རྒྱ་ནག་དང་ཧོར་སོག་གི་རྒྱལ་པོའི་དབུ་བླ་གནང་བ་སོགས་ཉེ་རབས་ལོ་རྒྱུས་སུ་མཚན་སྙན་རྒྱ་ཆེར་གྲགས་ཡོད།

སྐུ་ཕྲེང་འདི་ཡི་དབང་དུ་བྱས་ནའང་། གདན་ས་ཆེན་པོར་ཆོས་ཞུགས་ཀྱིས་གཞུང་ཆེན་བཀའ་པོད་ལྔ་ལ་སྦྱང་པ་མཐར་སོན་གྱི་དགེ་བཤེས་དམ་འཇོག་དང་། དཔལ་ལྡན་རྒྱུད་མེད་གྲྭ་ཚང་དུ་གསང་ཆེན་རྒྱུད་སྡེ་བཞི་ལ་སྦྱང་པ་མཐར་སོན་ཏེ་ཆོ་ག་ཆགས་ཞེན་ཕྲ་མོ་ཚུན་ཆད་ལ་ཐུགས་སྣང་ཉམས་བཞེས་དང་། ཆོས་རྒྱུན་བསམ་གྱི་མི་ཁྱབ་པ་མང་པོ་གསན་བཞེས་གནང་ཡོད་པ་དང་། འཛམ་གླིང་ཤར་ནུབ་དང་ཧི་མ་ལ་ཡ་རི་རྒྱུད་བཅས་པར་ཟབ་རྒྱས་ཆོས་ཀྱི་འཁོར་ལོ་རྒྱ་ཆེར་བསྐོར་བཞིན་པར་རྗེས་སུ་ཡི་རང་ཞུ་རྒྱུ་དང་། སླད་མར་ཡང་། བོད་བསྟན་སྲིད་མི་རིགས་དང་བཅས་པ་གཉན་འཕྲང་གི་སྐབས་འདིར། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་དགོངས་ལམ་སྟོན་བཞིན། སྐུ་རབས་གོང་མའི་རྣམ་ཐར་འཕྲོ་སྐྱོང་ལེགས་སྨིན་མཛད་གནང་ཡོང་བ་དང་། སྐུ་གསུང་ཐུགས་ཀྱི་མཛད་འཕྲིན་དབྱར་གྱི་ཆུ་བོ་བཞིན་རྒྱས་པའི་སྨོན་འདུན་ཞུ། ཐུགས་རྗེ་ཆེ། ཞེས་གསུང་བཤད་གནང་ཡོད་པ་བཅས།།

གསར་གནས།