༄༅། །ཕྱི་ལོ་ ༢༠༢༣ ཟླ་བ་ ༡༢ ཚེས་ ༡༠ ཉིན་ཧིན་བོད་མཛའ་འབྲེལ་ཚོགས་པའི་མཧཱ་རཱཥཊྲ་མངའ་སྡེའི་འདུ་འཛོམས་ཐེངས་གསུམ་པ་བྷཊ་ལ་པུར་ན་ཡོད་པའི་ཨམ་བྷེཊ་ཀར་དྲན་རྟེན་ཚོགས་ཁང་དུ་ཧིན་བོད་མཛའ་འབྲེལ་ཚོགས་པའི་རྒྱལ་ཡོངས་ཚོགས་གཙོ་ཨ་ནནྡ་ཀུ་མཱར་ལགས་དང་། མངའ་སྡེའི་ཚོགས་གཙོ་ཨམ་རུཊ་བྷན་སོཊ་ལགས་ཀྱིས་གཙོ་སྐྱོང་འོག་བསྐོང་ཚོགས་གནང་ཡོད་པ་རེད།
མཛད་སྒོའི་ཐོག་ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས་དང་། རྒྱ་གར་བོད་དོན་རྒྱབ་སྐྱོར་ཚོགས་པ་སྡེ་ཚན་ནང་མའི་ས་གནས་འབྲེལ་མཐུད་པ་ཨར་བིནྡ་ནི་ཀོ་སི་ལགས། བྷན་ད་ར་ནོར་རྒྱས་གླིང་བོད་མིའི་གཞིས་ཆགས་ཀྱི་ས་གནས་འགོ་འཛིན་དོན་གྲུབ་བཟང་པོ་ལགས། འཕགས་བོད་འབྲེལ་མཐུད་ལས་ཁང་གི་བཀྲ་ཤིས་བདེ་སྐྱིད་ལགས་སོགས་ཕེབས་ཞུགས་གནང་ཡོད།
ཧིན་བོད་མཛའ་འབྲེལ་ཚོགས་པའི་རྒྱལ་ཡོངས་ཚོགས་གཙོ་སྐུ་ཞབས་ཨ་ནནྡ་ཀུ་མཱར་ལགས་ཀྱིས་དབུ་འབྱེད་གསུང་བཤད་ནང་ཧིན་བོད་མཛའ་འབྲེལ་ཚོགས་པའི་ཁས་ལེན་རྩ་ཚིག བོད་ཀྱི་རང་དབང་། རྒྱ་གར་གྱི་བདེ་འཇགས། ཞེས་ཡིན་པ་གསལ་བཤད་དང་སྦྲགས། རྒྱ་གར་གྱི་བདེ་འཇགས་དང་བོད་ཀྱི་རང་དབང་གཉིས་བར་འབྲེལ་བ་ཇི་ཡོད་འགྲེལ་བརྗོད་གནང་བ་མ་ཟད། མངའ་སྡེའི་ཚོགས་གཙོ་གཙོས་པའི་ཚོགས་མིའི་ལམ་སྟོན་འོག་མངའ་སྡེའི་རྫོང་ ༡༧ ནང་ཧིན་བོད་མཛའ་འབྲེལ་ཚོགས་པའི་ས་གནས་ཡན་ལག་གསར་འཛུགས་གནང་ཐུབ་པར་བསྔགས་བརྗོད་དང་། སླད་ཀྱང་ཚོགས་མི་རྣམས་ནས་བོད་ཀྱི་རང་དབང་འཐབ་རྩོད་ཐོག་འབད་རྩོལ་སྔར་ལྷག་ཡོང་བའི་རེ་སྐུལ་གནང་ཡོད།
ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས་ཀྱིས་རྒྱ་གར་གྱིས་བོད་ཐོག་འཛིན་པའི་སྲིད་བྱུས་དང་། ད་ལྟའི་བོད་ནང་གི་ཛ་དྲག་གནས་སྟངས་ངོ་སྤྲོད་གནང་བ་དང་ཆབས་ཅིག རྒྱ་གར་གཞུང་དམངས་གཉིས་ཀྱི་བཀའ་དྲིན་ལ་བརྟེན་ནས་བོད་མིའི་སྤྱི་ཚོགས་འཚོ་གནས་གོང་འཕེལ་ཐུབ་པ་བྱུང་ཡོད་པ་མ་ཟད། རྒྱ་གར་གཞུང་དམངས་གཉིས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་སྐྱབས་བཅོལ་བོད་མི་རྣམས་ལ་གནས་ཚང་གཡར་བར་བཀའ་དྲིན་རྗེས་དྲན་ཞུས་ཡོད།
གཞན་ཡང་ཁོང་གིས་བོད་ཀྱི་རང་དབང་འཐབ་རྩོད་ཆེད་རྒྱ་གར་བོད་དོན་རྒྱབ་སྐྱོར་ཚོགས་པའི་གལ་གནད་དང་། རྒྱ་གར་བོད་དོན་རྒྱབ་སྐྱོར་ཚོགས་པ་ཁག་ནས་བོད་མིའི་སྒྲིག་འཛུགས་དང་འབྲེལ་མཐུད་ཀྱིས་རྒྱ་གར་མང་ཚོགས་ཁྲོད་བོད་དོན་གོ་རྟོགས་སྤེལ་བར་ཕན་གྲོགས་གནང་སྐྱོང་ཡོང་བའི་རེ་སྐུལ་གནང་ཡོད་པ་རེད།
ཉིན་གྲངས་གཅིག་གི་ཧིན་བོད་མཛའ་འབྲེལ་ཚོགས་པའི་མཧཱ་རཱཥཊྲ་མངའ་སྡེའི་འདུ་འཛོམས་ཐོག་ཚོགས་བཅར་བ་སྤྱི་མོས་ཀྱིས་བོད་དོན་འཐབ་རྩོད་ལ་རྒྱབ་སྐྱོར་དང་། མངའ་སྡེའི་ནང་དུ་བོད་དོན་ཞུ་གཏུག་གནང་ཕྱོགས་ཀྱི་ལག་བསྟར་འཆར་འགོད་གནང་ཐོག་ཚོགས་འདུ་ལེགས་པར་མཇུག་སྒྲིལ་ཡོད།
སྤྱིར་འདུ་འཛོམས་དེ་བཞིན་ཧིན་བོད་མཛའ་འབྲེལ་ཚོགས་པའི་མཧཱ་རཱཥཊྲ་མངའ་སྡེའི་ཡན་ལག་ས་གནས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་ལམ་ཞུས་ནས་ལོ་ངོ་ ༣༤ འཁོར་བའི་དུས་ཆེན་སྲུང་བརྩི་ཞུ་སླད་གོ་སྒྲིག་གནང་བ་ཞིག་ཡིན་པ་དང་། འདུ་འཛོམས་ཐོག་འབྱུང་འགྱུར་ལོ་གསུམ་ནང་བོད་དོན་ལ་རྒྱབ་སྐྱོར་གནང་ཕྱོགས་ཀྱི་འཆར་གཞི་འཆར་འགོད་དང་། འཕགས་བོད་འབྲེལ་ལམ། རྒྱ་གར་གྱིས་བོད་ཐོག་འཛིན་པའི་སྲིད་བྱུས། བོད་ཀྱི་རང་དབང་དང་རྒྱ་གར་གྱི་བདེ་འཇགས་སྐོར་བགྲོ་གླེང་གནང་ཡོད་ཅིང་། སྐབས་དེར་ཧིན་བོད་མཛའ་འབྲེལ་ཚོགས་པའི་ས་གནས་ཡན་ལག་གི་ཚོགས་མི་བརྒྱ་ལྷག་མཉམ་ཞུགས་གནང་ཡོད་པ་བཅས།། 
