༄༅། །ཕྱི་ལོ་ ༢༠༢༣ ཟླ་བ་ ༡༢ ཚེས་ ༡༠ ཉིན་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་ལ་འཛམ་གླིང་ནང་ཆེས་སྙན་གྲགས་ཆེ་བའི་ནོ་སྦེལ་ཞི་བདེའི་གཟེངས་རྟགས་འབུལ་བཞེས་ཀྱི་རྗེས་དྲན་དགའ་སྟོན་ཐེངས་ ༣༤ དང་།  རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་ཐེངས་ ༧༥ བཅས་སྲུང་བརྩིའི་མཛད་སྒོ་བཞུགས་སྒར་རྡ་ས་ཐེག་ཆེན་ཆོས་གླིང་གཙུག་ལག་ཁང་གི་གསུང་ཆོས་ར་བའི་ནང་སྲུང་བརྩི་གཟབ་རྒྱས་ཞུས་ཡོད།དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༠།༠༠ ཐོག་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་། རང་དབང་ཅན་གྱི་སྡེ་ཚན་ཁག་གི་འགན་འཛིན། དྲུང་ཆེ་རྣམ་པ། སྲི་ཞུའི་ལས་བྱེད་རྣམ་པ། གཞུང་དང་གཞུང་ཁོངས་མིན་པའི་ཚོགས་སྐྱིད་ཁག་གི་སྐུ་ཚབ་རྣམ་པ། དེ་བཞིན་གཉུག་མར་གནས་པ་དང་གློ་བུར་དུ་ལྷགས་པའི་བོད་མི་སེར་སྐྱ་རྒན་དར་གཞོན་གསུམ་སོགས་ཁྱོན་མི་གྲངས་སྟོང་ཕྲག་བརྒལ་བ་འདུ་འཛོམས་ཀྱིས་ཐོག་མར། བོད་ཀྱི་ཟློས་གར་ཚོགས་པས་རྔ་རོལ་དང་བཅས་འཕགས་བོད་གཉིས་ཀྱི་རྒྱལ་གླུ་འབུལ་བཞིན་པར་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་བོད་ཀྱི་རྒྱལ་དར་མཁའ་དབྱིངས་སུ་སྒྲེང་འཛུགས་གནང་།དེ་ནས་བོད་ཀྱི་ཟློས་གར་ཚོགས་པས་ནོ་སྦེལ་ཞི་བདེའི་གཟེངས་རྟགས་ཀྱི་བསྟོད་དབྱངས་མཉམ་གཞས་ཕུལ་གྲུབ་མཚམས་རྟེན་འབྲེལ་གསོལ་ཇ་འབྲས་སིལ་འདེགས་ཕུལ་ཞུས་རྗེས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་བཀའ་ཤག་གི་གསུང་བཤད་དང་། དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་བོད་མི་མང་སྤྱི་འཐུས་ལྷན་ཚོགས་ཀྱི་གསུང་བཤད་གནང་།དེ་རྗེས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་བོད་མིའི་སྤྱི་ཚོགས་ནང་འཕྲོད་བསྟེན་དང་འབྲེལ་བའི་སྲི་ཞུ་གནང་མཁན་ལས་བྱེད་གྲངས་ ༣ ལ་ཞབས་ལོ་ ༢༥ ཧྲིལ་པོ་འཁོར་བའི་གཟེངས་བསྟོད་ལེགས་སྐྱེས་གནང་རྗེས་བོད་ཀྱི་ཟློས་གར་ཚོགས་པས་སྐྱིད་རོང་འཁྲབ་གཞས་དགའ་བའི་ཕྱོགས་སུ་ལོག་ནས་འགྲོ་ཞེས་པ་གཟིགས་འབུལ་ཞུས།དེ་ནས་བཙན་བྱོལ་བོད་མིའི་སྨན་བཅོས་ལྟ་སྐྱོང་ལས་གཞིའི་ཁོངས་ས་གནས་ཁག་གི་མི་འབོར་ལ་གཞིགས་པས་སྨན་བཅོས་ལྟ་སྐྱོང་གི་ཚོགས་མིའི་གྲངས་འབོར་ལོ་རེ་བཞིན་དམིགས་ཚད་ལོན་མཁན་ས་གནས་ཁག་ལ་ལོ་ལྟར་བྱ་དགའ་དང་ཕྱག་འཁྱེར་རེ་འབུལ་བཞིན་ཡོད་སྟབས། རྩིས་ལོ་ ༢༠༢༣་་་༢༠༢༤ ལོའི་ནང་རྡ་ས་ས་གནས་འགོ་འཛིན་ལས་ཁུངས་ནས་དམིགས་ཚད་ལོན་ཡོད་པར་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་བྱ་དགའ་དང་ཕྱག་འཁྱེར་གནང་རྗེས་གྷོ་པལ་པུར་བོད་ཁྱིམ་ནས་དིང་རིའི་འཁྲབ་གཞས་གཟིགས་འབུལ་ཞུས།དེ་རྗེས་དཔལ་ལྡན་ཆེས་མཐོའི་ཁྲིམས་ཞིབ་པ་གཞན་བསྟན་འཛིན་ལུགས་རྟོགས་མཆོག་གིས་བོད་ཀྱི་ཟློས་གར་ཚོགས་པས་ཕྱི་ལོ་ ༢༠༢༣ ལོའི་དབྱར་སྐྱིད་རྐང་བྲོ་གླུ་གཞས་མཐེབ་སྡེར་དབུ་འབྱེད་གནང་བ་དང་། ནོར་གླིང་སྔོན་འགྲོ་སློབ་གྲྭ་ནས་བཀྲ་ཤིས་དུས་བཟང་ཞེས་པ་གཟིགས་འབུལ་ཞུས།དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་འགྲོ་ཕན་སྨན་རྩིས་ཁང་ནས་བོད་ཀྱི་གསོ་བ་རིག་པའི་ཚབ་ཡིག་ཕྱོགས་བསྡུས་བདུད་རྩིའི་ཐེགས་ཕྲེང་ཞེས་པ་དབུ་འབྱེད་གནང་བ་དང་། ཡོངས་གླིང་སློབ་གྲྭ་ནས་སྒོར་གཞས་ཆོས་ཀྱི་ཞིང་ས་ཞེས་པ་དང་། རྡ་ཤོད་བོད་ཁྱིམ་སློབ་གྲྭ་དང་དཔེ་སྟོན་སློབ་གྲྭ་ནས་ཐམས་ཅད་མཁྱེན་པ་ཞེས་པ། རྡ་སྟེང་བོད་ཁྱིམ་སློབ་གྲྭ་ནས་ཆོལ་གསུམ་མཐུན་སྒྲིལ་ཞེས་པ་གཟིགས་འབུལ་ཞུས་ཏེ་མཛད་སྒོ་གྲོལ་ཡོད་པ་བཅས། །