༄༅། །ཕྱི་ལོ་ ༢༠༢༣ ཟླ་བ་ ༡༢ ཚེས་ ༡༠ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་འཛམ་གླིང་ནང་ཆེས་སྙན་གྲགས་ཆེ་བའི་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་དེ་ལོ་ངོ་ ༣༤ ཧྲིལ་པོ་འཁོར་བའི་དུས་ཚིགས་ཁྱད་པར་ཅན་དང་སྟབས་བསྟུན་ཏཱ་ལའི་བླ་མའི་དགེ་རྩའི་གོ་སྒྲིག་འོག་༸རྒྱལ་བའི་ཕོ་བྲང་གི་ཉེ་འདབས་སུ་ཆགས་པའི་༸གོང་ས་ཏཱ་ལའི་བླ་མ་དཔེ་མཛོད་དང་ཡིག་ཚགས་ཁང་གི་གཟེངས་རྟགས་སྒྲིག་གཤོམ་ཁང་རྒྱ་ཆེའི་མི་མང་ལ་སྐབས་དུས་སོ་སོར་མཇལ་ཁའི་གོ་སྐབས་བསྐྲུན་རྒྱུའི་ལས་གཞི་དབུ་འབྱེད་གནང་སོང་། དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༨ པའི་ཐོག་སྐུ་མགྲོན་གཙོ་བོ་ཧི་མཱ་ཅལ་མངའ་སྡེའི་གྲོས་ཚོགས་འཐུས་མི་སྐུ་ཞབས་སུ་དིར་ཤཱར་མ་མཆོག་དང་། ༸སྐྱབས་རྗེ་བཀའ་བློན་ཁྲི་ཟུར་སློབ་དཔོན་ཟམ་གདོང་རིན་པོ་ཆེ་མཆོག ༸སྐྱབས་རྗེ་ཡོངས་འཛིན་གླིང་རིན་པོ་ཆེ་མཆོག དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག ཁྲིམས་ཞིབ་པ་བསྟན་འཛིན་ལུང་རྟོགས་མཆོག བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག བོད་མི་མང་སྤྱི་འཐུས་རྣམ་པ། བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་ཟུང་དྲུང་ཡན་སོགས་ཆེད་ཕེབས་ཀྱིས་ཐོག་མར་རྣམ་གྲྭའི་དགེ་འདུན་པ་ཁག་ཅིག་ནས་གཟེངས་རྟགས་སྒྲིག་གཤོམ་ཁང་གི་གཡོན་སྒོའི་མདུན་བཀྲ་ཤིས་པའི་ཞལ་འདོན་གསུང་གནང་དང་འབྲེལ་༸སྐྱབས་རྗེ་བཀའ་བློན་ཁྲི་ཟུར་སློབ་དཔོན་ཟམ་གདོང་རིན་པོ་ཆེ་མཆོག་དང་། སྐུ་མགྲོན་གཙོ་བོ་ཧི་མཱ་ཅལ་མངའ་སྡེའི་གྲོས་ཚོགས་འཐུས་མི་སྐུ་ཞབས་སུ་དིར་ཤཱར་མ་མཆོག་རྣམ་གཉིས་ནས་གཟེངས་རྟགས་སྒྲིག་གཤོམ་ཁང་དབུ་འབྱེད་དང་སྦྲགས་གཟིགས་ཞིབ་གནང་རྗེས་ཚོགས་ཁང་དུ་ཞལ་འཛོམས་ཀྱིས་མཛད་སྒོ་དབུ་འཛུགས་གནང་།མཛད་སྒོའི་ཐོག་མར་༸གོང་ས་ཏཱ་ལའི་བླ་མ་དཔེ་མཛོད་དང་ཡིག་ཚགས་ཁང་གི་ཡིག་ཚགས་ནང་འཇུག་ཚན་པའི་འགན་འཛིན་ཀུན་དགའ་ཚེ་རིང་ལགས་དང་གཟེངས་རྟགས་སྒྲིག་གཤོམ་ཁང་གི་དོ་དམ་པ་ངག་དབང་དཔའ་མོ་ལགས་གཉིས་ནས་ཕེབས་བསུའི་འཚམས་འདྲི་དང་། དཔེ་མཛོད་དང་ཡིག་ཚགས་ཁང་གི་འགན་འཛིན་འཇམ་དཔལ་ལྷུན་གྲུབ་ལགས་ཀྱིས་དཔེ་མཛོད་དང་ཡིག་ཚགས་ཁང་གི་ཚན་པ་ངོ་སྤྲོད་གནང་ཡོད། དེ་ནས་སྐུ་མགྲོན་གཙོ་བོ་ཧི་མཱ་ཅལ་མངའ་སྡེའི་གྲོས་ཚོགས་འཐུས་མི་སུ་དིར་ཤཱར་མ་ལགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་འབུལ་བཞེས་མཛད་པའི་གཟེངས་རྟགས་རྣམས་ནི་ཧི་མཱ་ཅལ་ཙམ་མ་ཡིན་པར་རྒྱ་གར་སྤྱི་ཡོངས་ལ་གལ་ཆེན་པོ་ཆགས་ཡོད་པ་དང་། དེ་ཉིད་གཟིགས་མཁན་ཧ་ཅང་མང་པོ་ཡོང་རེ་ཡོད་སྐོར་གསུངས་པ་མ་ཟད། དེ་སྔོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྡ་རམ་ས་ལར་མ་ཕེབས་པའི་སྔ་རོལ་དུ་རྡ་རམ་ས་ལ་ནི་གྲོང་གསེབ་ཆུང་ངུ་ཞིག་ཡིན་པ་དང་། མགོན་པོ་མཆོག་འདིར་༸ཞབས་སོར་འཁོད་རྗེས་རྡ་རམ་ས་ལའི་སྙན་གྲགས་འཛམ་གླིང་ཁྱོན་ཡོངས་སུ་ཁྱབ་ཡོད་ཅེས་གསུངས་ཡོད་པ་རེད། དེ་རྗེས་དཔལ་ལྡན་དགའ་ལྡན་ཕོ་བྲང་གི་ཚོགས་གཙོ་ལས་ཚབ་དང་བཀའ་བློན་ཁྲི་ཟུར་སློབ་དཔོན་ཟམ་གདོང་རིན་པོ་ཆེ་མཆོག་གིས་༸གོང་ས་ཏཱ་ལའི་བླ་མ་དཔེ་མཛོད་དང་ཡིག་ཚགས་ཁང་རྒྱ་ཆེ་མང་ཚོགས་ལ་དབུ་འབྱེད་གནང་རྒྱུའི་ལས་གཞི་དང་འབྲེལ་ཏེ། མགོན་པོ་གང་གི་མཚན་གནས་རྗེས་འབྲེལ་གྱི་དཔེ་མཛོད་དང་ཡིག་ཚགས་ཁང་འདི་ནི་འགྲེམས་སྟོན་ཁང་གི་ངོ་བོར་དབུ་འཛུགས་གནང་བ་ཞིག་མིན་ནའང་། མགོན་པོ་མཆོག་ལ་འབུལ་བཞེས་མཛད་པའི་གཟེངས་རྟགས་ཁག་རྒྱ་ཆེ་མང་ཚོགས་ལ་མཇལ་ཁའི་གོ་སྐབས་གནང་སྐྱོང་ཡོང་བའི་རེ་སྐུལ་ཞུས་དོན་བཞིན་སྐབས་མཚམས་སོ་སོར་མི་མང་ལ་མཇལ་ཁའི་གོ་སྐབས་གནང་རྒྱུའི་ཐག་གཅོད་བྱུང་སྐོར་དང་། བོད་མིའི་སྒྲིག་འཛུགས་ཐེ་བའི་ཚོགས་སྒེར་སུ་རུང་ལ་མགོན་པོ་མཆོག་གི་མཛད་པ་དང་འབྲེལ་བའི་དངོས་རྫས་དཔར་རིས་སོགས་ཡོད་ན། དེ་དག་༸གོང་ས་ཏཱ་ལའི་བླ་མ་དཔེ་མཛོད་དང་ཡིག་ཚགས་ཁང་ལ་འབུལ་ཐུབ་ན་དགེ་མཚན་ཡོད་ཅེས་གསུངས་ཡོད་པ་རེད། སྤྱིར་༸གོང་ས་ཏཱ་ལའི་བླ་མ་དཔེ་མཛོད་དང་ཡིག་ཚགས་ཁང་ནི། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་གསུང་ཆོས་དང་། བཀའ་སློབ། བཀའ་རྩོམ། གསུང་འཕྲིན། བཀའ་ཡིག སྐུ་པར་དང་གཟེངས་རྟགས་སོགས་ཉར་ཚགས་དང་བདག་གཅེས་སྲུང་སྐྱོབ་སླད། ཆེད་དུ་འཆར་འགོད་འཛུགས་སྐྲུན་བྱས་པ་ཞིག་ཡིན། དེ་ཉིད་དོན་གཉེར་ཅན་རྣམས་ལ་མགོན་པོ་གང་ཉིད་ཀྱི་མཛད་འཕྲིན་སྐོར་ཞིབ་འཇུག་གི་རྒྱུ་ཆ་མཁོ་སྤྲོད་གནང་ས་དང་། མི་རབས་རྗེས་མ་རྣམས་ཀྱིས་སློབ་གཉེར་བྱ་ཆོག་པའི་ལྟེ་གནས་ཁང་ཞིག་ཡིན་པ་མ་ཟད། ལྷག་པར་དུ་མགོན་པོ་གང་གིས་ད་ལྟ་དང་མ་འོངས་པའི་མི་རབས་རྣམས་ལ་གནང་བའི་རྩ་ཆེ་བའི་ཤེས་རབ་ཀྱི་མཛད་རྗེས་ཡོངས་རྫོགས་དེང་དུས་ཚན་རིག་དང་མཐུན་པའི་ལམ་ནས་ཉར་ཚགས་དང་སྲུང་སྐྱོབ་ཁྱབ་སྤེལ་གནང་སའི་མཛོད་ཁང་ཞིག་ཀྱང་ཡིན་པ་བཅས།།