༄༅། །ཕྱི་ལོ་ ༢༠༢༣ ཟླ་བ་ ༡༡ ཚེས་ ༡༦ ཉིན་ཨོསྟྲེ་ལི་ཡཱ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པས་ཨོསྟྲེ་ལི་ཡཱའི་ཕྱི་སྲིད་བློན་ཆེན་པེ་ནི་ཝོང་ལགས་སུ་ཕྱག་བྲིས་ཕུལ་ཏེ་ཡོང་འགྱུར་ཕྱི་ལོ་ ༢༠༢༤ ཟླ་བ་ ༠༡ ནང་རྒྱལ་ཚོགས་ཀྱི་རྒྱ་ནག་དང་འབྲེལ་བའི་དུས་མཚམས་ཅན་གྱི་བསྐྱར་ཞིབ་སྐབས་བོད་དོན་དང་། འགྲོ་བ་མིའི་ཐོབ་ཐང་སྐོར་གླེང་སློང་གནང་དགོས་པའི་འབོད་སྐུལ་ཞུས་འདུག

དེ་ཡང་ཨོསྟྲེ་ལི་ཡཱ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཟུང་སྦྲེལ་ཚོགས་གཙོ་ཊིན་ཨི་སི་མིཊ་ (Dean Smith) ལགས་དང་། སུ་སན་ཀྲམ་པལ་མན་ (Susan Templeman) ལགས། ཇེ་ནེཊ་ར་ཧི་སི་ (Janet Rice) ལགས་བཅས་ནས་ཨོསྟྲེ་ལི་ཡཱའི་ཕྱི་སྲིད་བློན་ཆེན་མཆོག་ལ་རྒྱལ་ཚོགས་ཀྱི་རྒྱ་ནག་དང་འབྲེལ་བའི་དུས་མཚམས་ཅན་གྱི་བསྐྱར་ཞིབ་གནང་སྐབས་བོད་དོན་ཐད་ཀར་གླེང་སློང་གནང་བ་ལས། རྒྱ་ནག་གཞུང་གིས་བེད་སྤྱོད་བྱེད་པའི་ཐ་སྙད་གྲངས་ཉུང་མི་རིགས་ལྟ་བུ་བཀོལ་སྤྱོད་གནང་སྐྱོང་མི་ཡོང་བའི་འབོད་སྐུལ་ཞུས་འདུག

ཕྱག་བྲིས་ནང་རྒྱ་ནག་གཞུང་གིས་མི་སེར་སྤེལ་ཡུལ་གཏན་འཇགས་སློབ་གྲྭ་བརྒྱུད་བོད་ཀྱི་རིག་གཞུང་དང་ངོ་བོ་རྩ་བརླག་ཏུ་གཏོང་བྱུས་བྱེད་བཞིན་པ་དང་། ལག་ཤེས་སྦྱོང་བརྡར་ལ་བསྙད་དེ་བོད་མི་རྣམས་ལ་བཙན་པོས་ངལ་རྩོལ་བཀོད་འདོམས་བྱེད་བཞིན་པའི་གནས་སྟངས་ལ་ཐུགས་འཚབ་བསྟན་པ་དང་ཆབས་ཅིག རྒྱ་ནག་གཞུང་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུས་པའི་བོད་བརྒྱུད་ནང་བསྟན་གྱི་བླ་སྤྲུལ་རྣམ་པའི་ཡང་སྲིད་ངོས་འཛིན་གནང་སྒོར་ཐེ་བྱུས་བྱེད་བཞིན་པར་ཨོསྟྲེ་ལི་ཡཱ་གཞུང་ངོས་ནས་རྒྱ་གཞུང་ལ་དེ་ལྟར་མཚམས་འཇོག་ཡོང་བའི་འབོད་སྐུལ་གནང་སྐྱོང་ཡོང་བའི་རེ་སྐུལ་གནང་འདུག

མཐར་བོད་དོན་ལ་རྒྱབ་སྐྱོར་གནང་མཁན་ཨོསྟྲེ་ལི་ཡཱའི་གྲོས་ཚོགས་འཐུས་མི་རྣམས་ཀྱིས་ཨོསྟྲེ་ལི་ཡཱ་སྲིད་གཞུང་ངོས་ནས་རྒྱལ་ཚོགས་ཀྱི་རྒྱ་ནག་དང་འབྲེལ་བའི་དུས་མཚམས་ཅན་གྱི་བསྐྱར་ཞིབ་ལ་བརྩི་སྲུང་དང་། ཨོསྟྲེ་ལི་ཡཱས་བོད་མིའི་དཀའ་སྡུག་གི་ཚབ་བྱས་ཏེ་འགྲོ་བ་མིའི་ཐོབ་ཐང་གི་ཁས་ལེན་བསྒྲུབས་ཤིང་། རྒྱ་ནག་ལྷན་དུ་ཚོང་འབྲེལ་བསྐྱར་འཛུགས་སླད་ཁས་ལེན་དེ་དག་སྣང་མེད་དུ་མི་འཇོག་པའི་རེ་བ་ཡོད་ཅེས་གསུངས་འདུག་པ་བཅས།།