༄༅། །ཕྱི་ལོ་ ༢༠༢༣ ཟླ་བ་ ༡༠ ཚེས་ ༢༨ ཉིན་ཨིན་ཡུལ་བོད་ཁྱིམ་སློབ་ཟུར་ཚོགས་པའི་གོ་སྒྲིག་འོག་བཀའ་ཟུར་རྗེ་བཙུན་པདྨ་མཆོག་ལ་བཀའ་དྲིན་རྗེས་དྲན་གྱི་མཛད་སྒོ་ཞིག་འཚོགས་པའི་ཐོག་ཨིན་ཡུལ་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་དང་དོན་ཁང་གི་ལས་བྱེད་རྣམས་མཉམ་ཞུགས་གནང་ཡོད།
དེ་ཡང་མཛད་སྒོའི་ཐོག་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་ནས་བཀའ་ཟུར་རྗེ་བཙུན་པདྨ་མཆོག་ལ་ཨིན་ཡུལ་བོད་མིའི་མངོན་བསྟོད་གཟེངས་རྟགས་ཕུལ་བ་སྦྲགས། བཀའ་ཟུར་རྗེ་བཙུན་པདྨ་མཆོག་གིས་བཙན་བྱོལ་བོད་ཕྲུག་གི་ཤེས་ཡོན་ཆེད་སྐུ་ལས་སྐྱོན་ཚུལ་དང་འབྲེལ་བའི་གནས་ཚུལ་ཁག་ཅིག་དྲན་གསོ་གནང་ཞིང་ལྕམ་སྐུ་མཆོག་ལ་ཐུགས་རྗེ་ལེགས་འབུལ་ཞུས་རྗེས་བཀའ་ཟུར་སྟག་ལྷ་སྐལ་བཟང་ལགས་ནས་བཀའ་ཟུར་རྗེ་བཙུན་པདྨ་མཆོག་ལ་བོད་ཁྱིམ་སློབ་ཟུར་གྱི་གཟེངས་རྟགས་ཕུལ། དེ་ནས་བཀའ་ཟུར་རྗེ་བཙུན་པདྨ་མཆོག་གིས་བོད་མི་རྣམས་ནས་བོད་ཀྱི་ཆོས་དང་རིག་གཞུང་མི་ཉམས་གཅེས་འཛིན་གནང་རྒྱུ་དང་། དམིགས་བསལ་ཆོལ་གསུམ་བོད་མི་ནང་ཁུལ་འཆམ་མཐུན་རྡོག་རྩ་ཆིག་སྒྲིལ་དགོས་རྒྱུ་གལ་གནད་ཆེན་པོ་ཡིན་སྐོར་གསུང་བཤད་གནང་ཡོད་པ་རེད།
ཕྱི་ཚེས་ ༢༩ ཉིན་བཀའ་ཟུར་རྗེ་བཙུན་པདྨ་མཆོག་དང་བཀའ་ཟུར་བསྟན་པ་ཚེ་རིང་རྣམ་པ་གཉིས་ཨིན་ཡུལ་བོད་ཁང་ཁྱབ་ཁོངས་བོད་ཀྱི་སྐད་ཡིག་དང་རིག་གཞུང་སློབ་གྲྭར་འཚམས་གཟིགས་སུ་ཕེབས་ཏེ་དགེ་སློབ་ལྷན་མཇལ་མོལ་གནང་བ་དང་ཆབས་ཅིག ཕ་མ་རྣམས་ནས་བོད་ཕྲུག་ཚོར་བོད་ཀྱི་སྐད་དང་རིག་གཞུང་སློབ་རྒྱུར་འགན་ཁུར་དགོས་པའི་ལམ་སྟོན་གནང་།
ཕྱི་ཚེས་ ༣༠ ཉིན་ཁོང་གཉིས་ཨིན་ཡུལ་སྐུ་ཚབ་དོན་ཁང་དུ་ཆེད་ཕེབས་གནང་བ་ལྟར། དོན་གཅོད་ཕར་སི་བསོད་ནམས་ཚེ་རིང་ལགས་ནས་ཕེབས་བསུ་དང་བཅས་དོན་ཁང་གི་ད་ཡོད་གནས་སྟངས་དང་ལས་དོན་བྱེད་ཕྱོགས་སོགས་ཀྱི་སྐོར་སྙན་སེང་ཞུས། དེ་ཉིན་ཕྱི་དྲོར་བཀའ་ཟུར་རྗེ་བཙུན་པདྨ་མཆོག་ནས་ལོན་ཊོན་ཚོང་ལས་སློབ་གྲྭར་བྱམས་བརྩེ་ལྡན་པའི་སློབ་ཁྲིད་ཅེས་པའི་བརྗོད་གཞིའི་ཐོག་གསུང་བཤད་གནང་ཡོད་པ་དང་། སྐབས་དེར་ཁོང་མོས་བོད་ཕྲུག་ཁྱིམ་སྡེ་ཐོག་མར་གསར་འཛུགས་སྐབས་ཀྱི་གནས་ཚུལ་དང་། དེ་རྗེས་ཀྱི་དཀའ་སྡུག་གདོང་ལེན། བོད་ཁྱིམ་གྱིས་ཤེས་ཡོན་ཐོག་སྲིད་བྱུས་འཛིན་སྟངས་སོགས་ཀྱི་སྐོར་གསུངས་ཡོད་པ་བཅས།། 
