༄༅། །ཕྱི་ལོ་ ༢༠༢༣ ཟླ་བ་ ༡༡ ཚེས་ ༡༧ ཉིན་བོད་མིའི་སྒྲིག་འཛུགས་ཀྱི་ཕྱི་དྲིལ་ལས་ཁུངས་དང་ཨོསྟྲེ་ལི་ཡཱའི་སྐུ་ཚབ་དོན་གཅོད་ཀྱི་གོ་སྒྲིག་འོག་ཨསྟྲེ་ལི་ཡཱའི་རྒྱལ་ས་ཀེན་བྷེ་རར་དང་བླངས་བོད་དོན་ཞུ་གཏུག་ལས་འགུལ་སྤེལ་ཕྱོགས་ཀྱི་ཐབས་བྱུས་ཚོགས་འདུ་དང་ཟབ་སྦྱོང་དབུ་འཛུགས་གནང་ཡོད།

དེ་ཡང་དབུ་འབྱེད་མཛད་སྒོའི་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་དང་། ཆེ་བསྟོད་སྐུ་མགྲོན་གྲོས་ཚོགས་འཐུས་མི་ལྕམ་སྐུ་ཇེ་ནིཊ་རེ་སི་ (Janet Rice)  ལགས་ཕེབས་ཡོད།སྐབས་དེར་སྐུ་མགྲོན་གཙོ་བོ་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་བོད་རིགས་གཞོན་སྐྱེས་རྣམས་བོད་མིའི་རང་དབང་འཐབ་རྩོད་ཀྱི་ལས་འགུལ་ནང་མཉམ་ཞུགས་མུ་མཐུད་གནང་དགོས་གལ་དང་། ལས་འགུལ་དེ་ཉིད་རྒྱ་སྐྱེད་གནང་ཕྱོགས་སོགས་ཀྱི་གསུང་བཤད་གནང་ཡོད།

དེ་རྗེས་ལས་རིམ་ཀྱི་ཐོག་མ་ཡུལ་དེའི་བདེ་སྲུང་བློན་ཆེན་ཟུར་པ་སྐུ་ཞབས་ཀེ་ཝན་ཨེན་ཌུས་མཆོག་གིས་བོད་དང་ཨོསྟྲེ་ལི་ཡཱ། རྒྱ་ནག་གསུམ་གྱི་འབྲེལ་ལམ་ཐོག་གསུང་བཤད་དང་། སྐུ་ཞབས་གྷེབ་རིལ་ལ་ཕི་ཊེ་ (Gabriel Lafitte) ལགས་ཀྱིས་གོ་ལའི་གནམ་གཤིས་འགྱུར་ལྡོག་སྤྱི་དང་། ལྷག་པར་བོད་ནང་རྒྱ་གཞུང་གིས་གློག་རྫས་དང་རྫས་གཞན་བཟོ་བསྐྲུན་ཆེད་བེད་སྤྱོད་བྱེད་རྒྱུ་གཏེར་རྫས་རྒྱ་ཆེར་སྔོག་འདོན་བྱེད་བཞིན་པར་ཐེར་འདོན་གྱིས་དེ་འབྲེལ་གསུང་བཤད་གནང་ཡོད།གཞན་ཡང་སྤྱི་འཐུས་རྡོ་རིང་བསྟན་འཛིན་ཕུན་ཚོགས་ལགས་ཀྱིས་བོད་མིའི་འཐབ་རྩོད་ཀྱི་ལས་དོན་གཉེར་བར་བོད་རིགས་གཞོན་སྐྱེས་ཀྱི་ལས་འགན་དང་། ལྷག་པར་ཡུལ་དེའི་གཞོན་སྐྱེས་འགོ་ཁྲིད་དང་ལྷན་དུ་ཆབ་སྲིད་ཀྱི་ལས་དོན་ནང་མཉམ་ཞུགས་གནང་དགོས་གལ་ཆགས་ཡོད་པར་མ་ཟད། ཁུལ་དེར་གནས་སྡོད་བོད་མིའི་སྤྱི་ཚོགས་དང་རིག་གཞུང་། དཔལ་འབྱོར་བཅས་ཀྱི་ལས་དོན་ནང་ཞུགས་དགོས་གལ་ཡིན་པ་སོགས་གསུངས་འདུགཨོསྟྲེ་ལི་ཡཱའི་བོད་དོན་ལྷན་ཁང་གི་འཛིན་སྐྱོང་འགན་འཛིན་ཛའོ་བྷེ་ཌི་ཕོར་ཌི་ (Dr. Zoe Bedford) ལགས་ཀྱིས་ཞུ་གཏུག་དང་འགྲོ་བ་མིའི་ཐོབ་སྐོར་གསུང་བཤད་གནང་བ་དང་། ཨོསྟྲེ་ལི་ཡཱར་རྟེན་གཞི་བྱས་པའི་རྒྱལ་སྤྱིའི་ཉེས་ཡངས་ཚོགས་པ་དང་བོད་ཀྱི་འགྲོ་བ་མིའི་ཐོབ་ཐང་གི་ལས་འགུལ་བ་སྤྱི་ཟུར་སྐྱིད་འཛོམས་གདོང་འདུས་ལགས་ཀྱིས་ལས་འགུལ་གྱི་གྲུབ་ཆ་དང་ཆབ་སྲིད་ཀྱི་ཞུ་གཏུག་ཐབས་བྱུས་སོགས་དང་འབྲེལ་ནས་གསུང་བཤད་གནང་ཡོད། །