༄༅། །འདི་གར་མོན་གྷོ་འདོད་རྒུ་གླིང་བོད་མིའི་གཞིས་ཆགས་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༣ ཟླ་ ༡༡ ཚེས་ ༡༤ ནས་ ༡༦ བར་ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་པདྨ་མཁའ་འགྲོ་མཆོག་མོན་གྷོ་འདོད་རྒུ་གླིང་ས་གནས་སུ་ཆིབས་བསྒྱུར་གྱི་ཉིན་གསུམ་གྱིས་མཛད་རིམ་བསྐྱངས་ཡོད།

དེ་ཡང་ཕྱི་ལོ་ ༢༠༢༣ ཟླ་བ་ ༡༡ ཚེས་ ༡༤ ཉིན་ཧུབ་ལི་གནམ་ཐང་ནས་ཉིན་གུང་ཆུ་ཚོད་ ༡ ཙམ་ལ་ལྷ་རྒྱལ་རིན་པོ་ཆེ་མཆོག་དང་། རི་སྐྱ་རིན་པོ་ཆེ་མཆོག ལྷོ་སྤྱི་འཇིགས་མེད་ཚུལ་ཁྲིམས་ལགས། མོན་གྷོ་ས་གནས་འགོ་འཛིན་གྱིས་གཙོས་གནད་ཡོད་མི་སྣ། དེ་བཞིན་གདན་སའི་ཕྱག་མཛོད་རྣམ་པས་སྤྱི་ཁྱབ་བློན་ཆེན་མཆོག་ལ་ཕེབས་བསུ་ཞུས་ཏེ། མོན་གྷོ་ས་གནས་སུ་འབྱོར་མཚམས་སམ་བྷོ་ཊའི་སློབ་ཕྲུག་ནས་རྔ་རོལ་དང་བཅས་བཀྲ་ཤིས་ཞོལ་པའི་འཁྲབ་སྟོན་གྱིས་སེར་སྐྱ་མི་མང་ནས་སྣེ་ལེན་ཕེབས་བསུ་ཞུས་རྗེས་དགའ་ལྡན་བྱང་རྩེ་གྲྭ་ཚང་གི་མགྲོན་ཁང་དུ་བཞུགས་གནང་།

ཕྱི་ཚེས་ ༡༥ ཉིན་གྱི་སྔ་དྲོ་ཆུ་ཚོད་ ༦ ལ་དགའ་ལྡན་བླ་སྤྱིར་ལྷ་རྒྱལ་རིན་པོ་ཆེ་རྗེ་བཙུན་ཐུབ་བསྟན་འཇིགས་མེད་དཔལ་བཟང་པོ་མཆོག་གི་ཡང་སྤྲུལ་སྐུ་ཕྲེང་བཅུ་པ་བསྟན་འཛིན་དབང་ཆེན་རིན་པོ་ཆེ་མཆོག་གི་ཚོགས་ཆེན་སྤྲུལ་སྐུའི་མཛད་སྒོ་དང་། སྔ་དྲོ་ཆུ་ཚོད་ ༨ དགའ་ལྡན་བྱང་རྩེ་གྲྭ་ཚང་དུ་ཁྲི་འདོན་མཛད་སྒོ་བཅས་སུ་སྤྱི་ཁྱབ་བློན་ཆེན་མཆོག་དང་། ཧིན་བོད་མཛའ་འབྲེལ་ཚོགས་པའི་ཚོགས་གཙོ་སྐུ་ཞབས་རིན་ཆེན་མཁའ་འགྲོ་ལགས་ཀྱིས་གཙོས་སྐུ་འཁོར་ལྷན་རྒྱས། ལྷོ་སྤྱི་འཇིགས་མེད་ཚུལ་ཁྲིམས་ལགས། བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་སྐུ་ཚབ་ས་གནས་འགོ་འཛིན་ལྷག་པ་སྒྲོལ་མ་ལགས་བཅས་མཛད་སྒོར་ཕེབས་ཞུགས་གནང་ཡོད།

དེ་བཞིན་ཕྱི་ཚེས་ ༡༦ སྔ་དྲོ་ཆུ་ཚོད་ ༩ ཐོག་ཇི་ལྟར་ས་གནས་འགོ་འཛིན་ལས་ཁུངས་ནས་འབོད་བསྐུལ་ཞུས་པ་བཞིན། ཞི་བ་འཚོ་མི་མང་དཔེ་མཛོད་ཁང་དུ་ས་གནས་ཀྱི་ཚོགས་སྡེ་ཁག་ ༢༦ དང་། གནད་ཡོད་མི་སྣ་བཅས་ལྷན་འཛོམས་ཐོག་སྤྱི་ཁྱབ་བློན་ཆེན་མཆོག་ལ་བོད་མི་མང་དང་སྒོས་སུ་ས་གནས་མང་ཚོགས་ངོས་ནས་ཐུགས་རྗེ་ཆེ་ཞུའི་མཛད་སྒོ་སྟབས་བདེ་ཞིག་བསྐྱངས་ཡོད། མཛད་སྒོའི་ཐོག་སྤྱི་ཁྱབ་བློན་ཆེན་སྐུ་ཞབས་པདྨ་མཁའ་འགྲོ་མཆོག་དང་ལྷན་ཨ་རུ་ན་ཅལ་གྱི་གྲོས་ཚོགས་འཐུས་མི་སྐུ་ཞབས་ཕུར་པ་ཚེ་རིང་ལགས་དང་། སྐུ་ཞབས་ཀརྨ་ལགས། མངའ་གཞུང་ཆོས་རིག་ལས་ཁུངས་ཀྱི་དབུ་འཛིན་སྐུ་ཞབས་འཇམ་དཔལ་དབང་འདུས་ལགས་ཀྱིས་གཙོས་མོན་གྱི་སྐུ་མགྲོན་རྣམ་པ། ལྷོ་སྤྱི་འཇིགས་མེད་ཚུལ་ཁྲིམས་ལགས། ས་གནས་ས་འཐུས་ཚོགས་གཙོ། ས་གནས་འགོ་འཛིན། རང་བདེན་ཚོགས་གཙོ། སཾ་བྷོ་ཊའི་སློབ་སྤྱི་དང་དགེ་ཆེ་རྣམ་པ། མཉམ་འབྲེལ་ཚོགས་གཙོ་དང་དྲུང་ཆེ། ས་གནས་འཕྲོད་བསྟེན་སྨན་ཁང་གི་འགན་འཛིན། དམར་ཟུར་ཚོགས་པའི་ཚོགས་གཙོ། ས་གནས་སྨན་རྩིས་ཁང་གི་འགན་འཛིན་དང་སྨན་པ། ས་གནས་གཞོན་ནུའི་ཚོགས་གཙོ། ས་གནས་བེུད་ཚོགས་གཙོ། གཞིས་གྲོང་བཅུའི་སྤྱི་མི། དགོན་སྡེ་ཆེ་ཁག་དགུའི་ཕྱག་མཛོད་རྣམ་པ་བཅས་འཛོམས་ཡོད།

མཛད་སྒོའི་ཐོག་མར་ལྷོ་སྤྱི་འཇིགས་མེད་ཚུལ་ཁྲིམས་ལགས་ནས་ངོ་སྤྲོད་གསུང་བཤད་དང་། དེའི་རྗེས་ས་གནས་འགོ་འཛིན་ནས་ཐུགས་རྗེ་ཆེ་ཞུས་པ་དང་སྦྲགས་ས་གནས་ཀྱི་དགོས་མཁོའི་ལས་གཞི་ཁག་ཅིག་སྙན་སེང་ཞུས། དེ་ནས་སྤྱི་ཁྱབ་བློན་ཆེན་མཆོག་ནས་ཚོགས་བཅར་བ་ཡོངས་ལ་གསུང་བཤད་ཟབ་རྒྱས་གནང་ཞིང་། སྤྱི་ཁྱབ་བློན་ཆེན་མཆོག་གིས་ནང་པའི་ཆོས་བདག་གཉེར་བྱ་རྒྱུའི་གལ་ཆེ་སྐོར་དང་། དེའི་ཐོག་མུ་མཐུད་འབད་བརྩོན་གནང་རྒྱུ། དེ་བཞིན་ཨ་རུ་ན་ཅལ་གྱི་གྲྭ་བ་མང་པོ་ཞིག་གདན་ས་ཁག་ཏུ་སློབ་གཉེར་གནང་མུས་ཡིན་པ་དང་། བོད་མི་དང་ཨ་རུ་ན་ཅལ་མི་མང་བར་འབྲེལ་འདྲིས་བཟང་པོ་ཡོད་པས་བོད་མིའི་དཀའ་ངལ་ཇི་ཡོད་ཐོག་ཕྱག་རོགས་དང་རྒྱབ་སྐྱོར་གང་ཐུབ་ཞུས་དང་ཞུ་མུས་ཡིན་གསུངས།

དེ་བཞིན་སྤྱི་ཁྱབ་བློན་ཆེན་མཆོག་གིས་སྐུ་སྒེར་ངོས་ནས་གྲོང་སྡེ་བཅུ་པའི་སྤྱི་ཁང་གསར་པའི་ཆེད་ཞལ་འདེབས་ཧིན་སྒོར་འབུམ་སུམ་ཅུ་གནང་རྒྱུའི་ཞལ་བཞེས་བཟང་པོ་གནང་སོང་། སྤྱི་ཁྱབ་བློན་ཆེན་མཆོག་གི་བཀའ་སློབ་རྗེས་སུ་ས་གནས་འགོ་འཛིན་ནས་བོད་མི་མང་ཚོགས་ངོས་ནས་ཐུགས་རྗེ་བཀའ་དྲིན་ཆེ་ཞུས་མཚོན་སླད་ས་གནས་ཚོགས་སྡེ་ཁག་ ༢༦ ངོས་ནས་སྟོན་པའི་སྐུ་ཞིག་ཕུལ་བ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཛད་རྣམ་སྙིང་བསྡུས་ཨིན་ཡིག་ཐོག་ཡོད་པའི་ཕྱག་དེབ་ཅིག་བཅས་ཕུལ་ཐུབ་པ་བྱུང་ཡོད།

དེ་ནས་ཨ་རུ་ན་ཅལ་གྱི་གྲོས་ཚོགས་འཐུས་མི་སྐུ་ཞབས་ཕུར་པ་ཚེ་རིང་ལགས་དང་སྐུ་ཞབས་ཀརྨ་ལགས་གཉིས་ལའང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཛད་རྣམ་སྙིང་བསྡུས་ཨིན་ཡིག་ཐོག་ཡོད་པའི་ཕྱག་དེབ་རེ་རེ་འབུལ་ལམ་ཞུས། མཛད་སྒོའི་མཐའ་མར་གྲོང་སྡེ་བརྒྱད་པའི་སྤྱི་མི་འཕྲིན་ལས་རྒྱ་མཚོ་ལགས་ནས་ཐུགས་རྗེ་ཆེ་ཞུས་ཏེ་མཛད་སྒོ་གྲོལ་མཚམས་དམག་ཟུར་ནས་གདན་འདྲེན་ཞུས་དོན་བཞིན་དྲན་རྟེན་མཆོད་རྟེན་དུ་ཆིབས་བསྒྱུར་གནང་ཡོད། དེ་རྗེས་ཆུ་ཚོད་ ༡༠ ཐོག་སྤྱིི་ཁྱབ་བློན་ཆེན་མཆོག་གི་ལྷན་ལྷོ་སྤྱི་དང་ས་གནས་འགོ་འཛིན་རྣམ་པ་འབྲས་སྤུངས་བློ་གསལ་གླིང་གི་སྒོམ་སྒྲུབ་དང་ཚན་རིག་བསྟི་གནས་ཁང་དང་འབྲས་སྤུངས་བློ་གསལ་གླིང་འདུ་ཁང་དུ་རི་སྐྱ་ཪིན་པོ་ཆེ་མཆོག་གི་དགེ་བཤེས་མཚན་རྟགས་ཀྱི་གཏོང་སྒོའི་མཛད་སྒོར་ཆེད་ཕེབས་གནང་།

དེ་ནས་ཉིན་རྒྱབ་ཆུ་ཚོད་ ༢ དགའ་ལྡན་ཤར་རྩེ་འདུ་ཁང་དུ་ཨ་རུ་ན་ཅལ་ནང་པའི་སློབ་ཕྲུག་བདེ་དོན་ལྷན་ཚོགས་ཀྱི་ཚོགས་ཐེངས་ ༣ པའི་མཛད་སྒོར་ཕེབས་ནས་ཕྱི་དྲོ་ཆུ་ཚོད་ ༦།༣༠ ཐོག་སྤྱི་ཁྱབ་བློན་ཆེན་སྐུ་ཞབས་པདྨ་མཁའ་འགྲོ་མཆོག་ལ་དགའ་ལྡན་བྱང་རྩེ་མགྲོན་ཁང་དུ་ས་གནས་ཀྱི་གནད་ཡོད་མི་སྣ་དང་མི་མང་བཅས་ནས་ཕེབས་ཐོན་གནང་བ་དང་། ལྷ་རྒྱལ་རིན་པོ་ཆེའི་ཡང་སྲིད་སྤྲུལ་སྐུ་བསྟན་འཛིན་དབང་ཆེན་ཪིན་པོ་ཆེའི་གཙོས། སྤྲུལ་སྐུ་ཐུབ་བསྟན་རིན་པོ་ཆེ། རི་སྐྱ་རིན་པོ་ཆེ། ལྷོ་སྤྱི་འཇིགས་མེད་ཚུལ་ཁྲིམས་ལགས་ ས་གནས་འགོ་འཛིན་ལྷག་པ་སྒྲོལ་མ་ལགས། དགའ་ལྡན་བྱང་རྩེའི་ཕྱག་མཛོད་ཁྲི་པ་དགེ་བཤེས་རྣམ་རྒྱལ་རྒྱལ་མཚན་ལགས་བཅས་ནས་ཧུབ་ལི་གནམ་ཐང་དུ་ཕེབས་སྐྱེལ་ཞུས་ཐུབ་པ་བྱུང་ཡོད། །