༄༅། །ཕྱི་ལོ་ ༢༠༢༣ ཟླ་བ་ ༡༡ ཚེས་ ༡༣ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཇལ་ཁ་ཞུས་ཏེ་ཉེ་ལམ་ལྷོ་བྱང་ཨ་རི་ཁུལ་དུ་གཞུང་འབྲེལ་ཕྱོགས་ཕེབས་དང་། གཏན་འཇགས་ཐབས་བྱུས་འཆར་འགོད་ཚོགས་ཆུང་ཐེངས་ལྔ་པའི་སྐབས་སུ་གྲོས་མོལ་ཇི་བྱུང་གི་ལས་བསྡོམས་བཅས་སྙན་སེང་ཞུས་ཡོད་པ་རེད།
དེ་ཡང་མཇལ་ཁ་གྲུབ་མཚམས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་གཞུང་འབྲེལ་གསར་ཁང་གི་བཅར་འདྲིར་བཀའ་ལན་གནང་སྐབས། ད་ཐེངས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཇལ་ཁ་ཞུ་སྐབས་གཙོ་བོ་ནི། ཉེ་ལམ་ཕྱི་ཟླ་ ༡༠ ཚེས་ ༠༡ ནས་ ༢༤ བར་དཔལ་ལྡན་སྲིད་སྐྱོང་མཆོག་གིས་ལྷོ་བྱང་ཨ་རིའི་ཁུལ་དུ་གཞུང་འབྲེལ་ཕྱོགས་ཕེབས་ཀྱིས་གཞུང་གི་གནད་ཡོད་མི་སྣ་དང་། གྲོས་ཚོགས་འཐུས་མི། བོད་དོན་རྒྱབ་སྐྱོར་བ། ས་གནས་བོད་མི་སོགས་དང་མཇལ་འཕྲད་ཀྱིས་བོད་དོན་ཞུ་གཏུག་དང་དྲིལ་བསྒྲགས་ཇི་གནང་སྐོར་སྙན་སེང་དགོངས་སྐོར་དང་། དེ་དང་ཆབས་ཅིག་འདི་ཟླའི་ཚེས་ ༠༨ ནས་ ༡༠ བར་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ་འཚོགས་པའི་གཏན་འཇགས་ཐབས་བྱུས་འཆར་འགོད་ཚོགས་ཆུང་གི་ཚོགས་འདུ་ཐེངས་ལྔ་པའི་གྲོས་དོན་སྐོར་སྙན་སེང་ཞུས་ཡོད་སྐོར་གསུངས།
མཇལ་ཁའི་སྐབས་སུ་མགོན་པོ་མཆོག་གིས་དཔལ་ལྡན་སྲིད་སྐྱོང་མཆོག་ལ་མགོན་པོ་གང་ཉིད་མཆོག་གིས་རྒྱ་ནག་གཞུང་ལ་བོད་རང་བཙན་རྩོད་ཀྱི་མེད་པར་མིང་དོན་མཚུངས་པའི་རང་སྲིད་རང་སྐྱོང་ཡོང་ཐབས་ལ་འབད་རྩོལ་གནང་གི་ཡོད་སྐོར་དང་། བོད་ཀྱི་ཆོས་དང་རིག་གཞུང་སྤྱི་དང་། ཡང་སྒོས་བོད་ཀྱི་སྐད་ཡིག་གི་གལ་གནད་ཤེས་རྟོགས་ཀྱིས་མི་ཉམས་རྒྱུན་འཛིན་དགོས་པའི་ལམ་སྟོན་གནང་ཡོད་པ་འགྲེལ་བརྗོད་གནང་ཡོད་པ་བཅས།།
