༄༅། །ཕྱི་ལོ་ ༢༠༢༣ ཟླ་བ་ ༡༡ ཚེས་ ༠༨ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་གི་མཇལ་འཕྲད་ཁང་དུ་ཡུ་རོབ་ཁུལ་གྱི་ཞི་བདེའི་ལས་འགུལ་བ་ཁག་ཅིག་དང་མཇལ་འཕྲད་ཀྱིས་བཀའ་སློབ་ལམ་སྟོན་སྩལ་ཡོད་པ་རེད།
སྐབས་དེར་ལས་འགུལ་བའི་འགོ་ཁྲིད་ལྕམ་ཨི་སི་ཀྲིལ་རེ་ཝེར་ (Stril-Rever) ལགས་ཀྱིས་བཟང་སྤྱོད་དང་བྱམས་བརྩེ་ལ་བརྟེན་ནས་འཛམ་གླིང་ལ་ཞི་བདེ་ཇི་ལྟར་སྐྲུན་ཐུབ་ཚུལ་སྐོར་བཀའ་འདྲི་ཞུས་པར་མགོན་པོ་མཆོག་གིས་བཀའ་ལན་སྩལ་དོན། ང་ཚོ་འགྲོ་བ་མི་ཡིན་པའི་ཆ་ནས་ང་ཚོར་སྐྱེས་མ་ཐག་ནས་མའི་བྱམས་བརྩེ་ཐོབ་ཡོད། ཆུང་དུས་ང་ཚོས་ཕྲུ་གུ་གཞན་མཉམ་དུ་རྩེད་པ་ལས། ཕྲུ་གུ་དེ་གང་ནས་ཡིན་མིན་དང་། ཁོའི་ནང་མིས་གང་ལ་ཡིད་ཆེས་བྱེད་མིན་སོགས་སྣང་བར་འཇོག་གི་མེད། དེ་ལྟ་བུའི་གུ་ཡངས་ཀྱི་བསམ་བློ་ནི་འགྲོ་བ་མིའི་གཞི་རྩའི་རང་བཞིན་ཡིན་པ་རེད།
ང་ཚོ་ནར་སོན་པའི་རྗེས་སུ་མི་གཞན་ལ་ལྟ་སྐབས་ཆབ་སྲིད་ཀྱི་ལངས་ཕྱོགས་དང་ཆོས་ལུགས་མི་འདྲ་བ་ལ་གཞི་བྱས་ཏེ་ང་ཚོ་དང་ཁོ་ཚོ་ཞེས་དབྱེ་བ་འབྱེད་ཀྱི་ཡོད། གལ་ཏེ་ང་ཚོས་ཞི་བདེ་གོང་མཐོར་གཏོང་དགོས་ན། གཞི་རྩའི་ཐོག་ནས་ང་ཚོས་འགྲོ་བ་མི་ཚང་མ་གཅིག་པ་ཡིན་པ་དེ་ངོས་འཛིན་བྱེད་ཐུབ་དགོས། ང་ཚོ་ཚང་མར་ཉམས་མྱོང་ཐུན་མོང་བ་ཞིག་ཡོད། དེ་མ་ཟད། ང་ཚོ་སྐྱེ་དུས་གཅིག་མཚུངས་སྐྱེས་ཤིང་མཐའ་མ་འཆི་དུས་ཀྱང་གཅིག་མཚུངས་འཆི་རྒྱུ་རེད།
མི་རིགས་དང་ཆོས་དད་མི་འདྲ་བར་ཤུགས་རྒྱག་པ་དེ་ནི་ཕན་ཚུན་གསོད་རེས་གཏང་རྒྱུར་ཁ་གཡར་བ་ཙམ་རེད། དེ་ནི་བསམ་ཡུལ་ལས་འདས་པ་ཞིག་ཡིན། ཐ་ན་དུད་འགྲོ་ཡན་ཆད་ཕན་ཚུན་མཉམ་དུ་བདེ་སྐྱིད་ལྡན་པའི་ངང་གནས་སྡོད་བྱེད་ཀྱི་ཡོད། གལ་ཏེ་ང་ཚོས་གནས་སྟངས་དེ་འགྱུར་བ་གཏོང་དགོས་ན། ང་ཚོ་འཛམ་བུ་གླིང་གི་མི་མང་ཐེར་འབུམ་བརྒྱད་ཚང་མ་གོ་ལ་འདིའི་སྟེང་མཉམ་དུ་སྡོད་ཤེས་པ་བྱེད་དགོས་པ་མ་ཟད། ང་ཚོ་ཚང་མ་འགྲོ་བ་མི་གཅིག་མཚུངས་ཡིན་པ་དེར་ངོས་འཛིན་བྱེད་དགོས་པ་ཡིན། དེར་བརྟེན་ངོས་ཀྱིས་མི་གསར་པ་ཞིག་དང་ཐུག་པའི་སྐབས་རྟག་ཏུ་ཕ་རོལ་པོ་དེ་ངོས་རང་ལྟ་བུའི་འགྲོ་བ་མི་ཞིག་ཏུ་ལྟ་གི་ཡོད། དེ་ལྟར་ངོས་ཀྱིས་ང་ཚོ་ཚང་མ་འགྲོ་བ་མིའི་ཁྱིམ་ཚང་ཞིག་གི་ནང་མིར་ངོས་འཛིན་བྱེད་ཀྱི་ཡོད། ཅེས་བཀའ་སྩལ་ཡོད་པ་རེད།
དེ་རྗེས་མགོན་པོ་གང་ཉིད་མཆོག་ལ་གོ་ལའི་གནམ་གཤིས་འགྱུར་ལྡོག་གི་དཀའ་ངལ་སྐོར་བཀའ་འདྲི་ཞུ་དུས། མགོན་པོ་མཆོག་གིས་འགྱུར་བ་དེ་ནི་ང་ཚོའི་སྟངས་འཛིན་གྱི་ནུས་པ་ལས་འགལ་བ་ལྟ་བུར་མངོན་གྱི་འདུག་ཅེས་དང་། ང་ཚོ་འགྲོ་བ་མི་ཚང་མ་གཅིག་མཚུངས་ཡིན་པས། ང་ཚོ་མཉམ་དུ་གནས་རྒྱུ་ཙམ་མ་ཡིན་པར་ང་ཚོའི་སྤྱི་མཐུན་གྱི་ཁེ་ཕན་ཆེད་མཉམ་རུབ་ཀྱི་ལས་ཀ་བྱེད་དགོས་ཞེས་བཀའ་སྩལ།
དེ་བཞིན་མགོན་པོ་མཆོག་གིས། ད་ལྟ་ང་ཚོར་དུས་ཚོད་ཡོད་དུས་ཕུ་ནུའི་འདུ་ཤེས་བཅངས་ཏེ་ཕན་ཚུན་རོགས་པ་བྱེད་དགོས་པ་དང་། ང་ཚོ་སྐྱེས་པའི་སྐབས་སུ་ཨ་མས་སྤྲད་པའི་འགྲོ་བ་མིའི་གཞི་རྩའི་བྱམས་བརྩེ་རྒྱུན་སྲིང་ཐབས་ཀྱི་ལམ་འཚོལ་དགོས་པ་ཡིན། ཞེས་བཀའ་སྩལ་རྗེས།
མཐར་མགོན་པོ་མཆོག་ལ་ཆོས་ལུགས་ཀྱིས་མ་འོངས་པར་འཛམ་བུ་གླིང་ལ་ཤུགས་རྐྱེན་ཇི་ལྟར་སྤྲོད་མིན་སྐོར་བཀའ་འདྲི་ཞུས་པར། མགོན་པོ་མཆོག་གིས་ཆོས་ལུགས་ཀྱི་སྙིང་པོ་བྱམས་སྙིང་རྗེ་ཡིན། ཆོས་ལུགས་སོ་སོར་ལྟ་གྲུབ་མི་འདྲ་བ་ཡོད་ནའང་ཚང་མས་བྱམས་སྙིང་རྗེའི་སྐོར་གསུང་གི་ཡོད། སྙིང་པོ་དེ་བྱམས་སྙིང་རྗེ་ཡིན་ལ། དེ་ཉམས་ལེན་བྱེད་པ་ལ་བརྟེན་ནས་ཀུན་ལ་ཕན་ཐོགས་པ་ཡིན་ཞེས་བཀའ་སློབ་ལམ་སྟོན་སྩལ་གནང་ཡོད་པ་བཅས།།
