༄༅། །རྒྱ་གར་བོད་དོན་རྒྱབ་སྐྱོར་བ་སཾ་དེཤ་མེཤྲཱམ་མམ་བསམ་གཏན་ཡེ་ཤེས་ལགས་ཀྱིས་ཕྱི་ལོ་ ༢༠༢༣ ཟླ་བ་ ༡༡ ཚེས་ ༠༥ ཉིན་རྒྱ་གར་གྱི་གྲོང་ཁྱེར་ཀལ་ཀཏྟཱ་ནས། བོད་ཀྱི་རང་དབང་། རྒྱ་གར་གྱི་བདེ་འཇགས། ཞེས་པའི་འབོད་ཚིག་འོག་བོད་དོན་གོ་རྟོགས་ཀྱི་རྐང་འཁོར་འགྲུལ་བཞུད་ལས་འགུལ་ཐེངས་ལྔ་པ་དབུ་འཛུགས་གནང་ཡོད།
དེ་ཡང་ཀལ་ཀཏྟཱ་ནང་པའི་དགོན་པ་རུ་རྒྱ་གར་བོད་དོན་རྒྱབ་སྐྱོར་ཚོགས་པ་སྡེ་ཚན་ནང་མའི་ཚོགས་མི་ཟུར་པ་རུ་བི་མུ་ཁར་ཇི་ལགས་དང་། རྒྱ་གར་བོད་དོན་རྒྱབ་སྐྱོར་བ། ས་གནས་བོད་མི་ཚང་འཛོམས་ཐོག་རྐང་འཁོར་འགྲུལ་བཞུད་ལས་འགུལ་དངོས་སུ་དབུ་འབྱེད་གནང་ཡོད་ཅིང་། སྐབས་དེར་ལས་འགུལ་བ་བསམ་གཏན་ཡེ་ཤེས་ལགས་ཀྱིས་ལས་འགུལ་གྱི་ངོ་སྤྲོད་དང་། དམིགས་ཡུལ། ཡུན་ཚད་སོགས་འགྲེལ་བརྗོད་གནང་རྗེས་ལས་འགུལ་དབུ་འཛུགས་གནང་ཡོད།
ཐེངས་འདིའི་བོད་དོན་གོ་རྟོགས་ཀྱི་རྐང་འཁོར་འགྲུལ་བཞུད་ཀྱི་ལས་འགུལ་རྒྱ་གར་གྱི་གྲོང་ཁྱེར་ཀལ་ཀཏྟཱ་ནས་དབུ་འཛུགས་ཀྱིས་ནུབ་བྷང་གྷལ་དང་། ཇྷཱཱར་ཁནྜ། བི་ཧཱར། ཨུཏྟར་པྲདེཤ། མདྱ་པྲདེཤ རཱཇསྠན། ཧ་རི་ཡཱ་ཎཱ་བརྒྱུད་ཁྱོན་ཀི་ལོ་མི་ཊར་ ༢༥༠༠ བརྒལ་ཏེ་ཕྱི་ལོ་ ༢༠༢༣ ཟླ་བ་ ༡༢ ཚེས་ ༡༠ ཉིན་རྒྱ་གར་གྱི་རྒྱལ་ས་ལྡི་ལིར་མཇུག་བསྡུ་འཆར་ཡོད།
རྐང་འཁོར་འགྲུལ་བཞུད་ལས་འགུལ་གྱི་དམིགས་ཡུལ་གཙོ་བོ་ནི་རྒྱ་གར་མང་ཚོགས་ཁྲོད་བོད་དོན་སྤྱི་དང་། ཡང་སྒོས་བོད་ནང་གི་ཛ་དྲག་གནས་སྟངས་སྐོར་གོ་རྟོགས་སྤེལ་རྒྱུའི་ཐོག རྒྱ་ནག་གཞུང་ནས་བོད་མི་ཆབ་སྲིད་བཙོན་པ་ཡོངས་དང་། བྱེ་བྲག་ཏུ་བོད་མི་ཁོར་ཡུག་ལས་འགུལ་བ་ཀརྨ་བསམ་གྲུབ་ལགས་ལ་ཉེས་མེད་ཉེས་འཛུགས་ཀྱིས་ལོ་ངོ་བཅོ་ལྔའི་བཙོན་འཇུག་ཁྲིམས་ཐག་བཅད་ཡོད་པ་འཕྲལ་དུ་གློད་བཀྲོལ་དགོས་པའི་ཞུ་སྐུལ་གནང་རྒྱུ་ཡིན་པ་རེད།
བོད་དོན་རྒྱབ་སྐྱོར་བ་བསམ་གཏན་ཡེ་ཤེས་ལགས་ཀྱིས་དེ་སྔོན་ཕྱི་ལོ་ ༢༠༡༤ ནས་འགོ་འཛུགས་ཀྱིས་བོད་དོན་གོ་རྟོགས་ཀྱི་རྐང་འཁོར་འགྲུལ་བཞུད་ལས་འགུལ་བཞི་སྤེལ་ཟིན་ཡོད་པ་བཅས།།
