༄༅། །ཕྱི་ལོ་ ༢༠༢༣ ཟླ་བ་ ༡༡ ཚེས་ ༡༥ ཉིན་རྒྱ་གར་ནང་བོད་དོན་ཞུ་གཏུག་སྤེལ་ཕྱོགས་ཀྱི་ལག་བསྟར་འཆར་གཞི་གཏན་འབེབས་དང་བཅས་རྒྱ་གར་ནང་དང་བླངས་བོད་དོན་ཞུ་གཏུག་ལས་འགུལ་སྤེལ་ཕྱོགས་ཀྱི་ཐབས་བྱུས་ཚོགས་འདུ་དང་ཟབ་སྦྱོང་མཇུག་སྒྲིལ་ཡོད་པ་རེད།
དེ་ཡང་འདི་ཟླའི་ཕྱི་ཚེས་ ༡༣ ནས་དབུ་འཛུགས་ཞུས་པའི་རྒྱ་གར་ནང་དང་བླངས་བོད་དོན་ཞུ་གཏུག་ལས་འགུལ་སྤེལ་ཕྱོགས་ཀྱི་ཐབས་བྱུས་ཚོགས་འདུ་དང་ཟབ་སྦྱོང་ཐོག་ཚོགས་བཅར་བ་རྣམས་ས་གནས་སོ་སོའི་སྡེ་ཁག་ཏུ་ཆ་བགོས་ཀྱིས་རྒྱ་གར་ནང་དུ་བོད་དོན་ཞུ་གཏུག་ལས་འགུལ་སྤེལ་ཕྱོགས་སྐོར་བགྲོ་གླེང་དང་། ཞུ་གཏུག་གནང་ཚེས་སོགས་གཏན་འབེབས་གནང་ཡོད་པ་རེད།
ཉིན་གྲངས་གསུམ་གྱི་ཐབས་བྱུས་ཚོགས་འདུའི་ཐོག་སིམ་སྤྱི་ཚེ་དབང་ཕུན་ཚོགས་ལགས་དང་། འཕགས་བོད་འབྲེལ་མཐུད་ལས་ཁུངས་ཀྱི་ལས་བྱེད་བཀྲ་ཤིས་བདེ་སྐྱིད་ལགས་གཉིས་ནས་རྒྱ་གར་ནང་དུ་བོད་དོན་ཞུ་གཏུག་སྤེལ་ཕྱོགས་ཀྱི་ཐབས་བྱུས་སྐོར་ངོ་སྤྲོད་དང་། ཕྱི་དྲིལ་དྲུང་འཕར་བསྟན་འཛིན་ལེགས་བཤད་ལགས་ཀྱིས་དང་བླངས་བོད་དོན་ཞུ་གཏུག་ལས་འགུལ་གྱི་ངོ་བོ་དང་། དམིགས་ཡུལ། ལས་དོན་བྱེད་ཕྱོགས་སྐོར་འགྲེལ་བརྗོད་གནང་།
དེ་ནས་ཕྱི་དྲིལ་བོད་དོན་ཞུ་གཏུག་ཚན་པའི་ལས་བྱེད་རིན་ཆེན་ལགས་ཀྱིས་རྒྱལ་སྤྱིའི་བོད་ཀྱི་གཞོན་སྐྱེས་ཚོགས་ཆེན་ཐོག་གཏན་ལ་ཕབ་པའི་བོད་དོན་ཞུ་གཏུག་སྤེལ་ཕྱོགས་ཀྱི་ལག་བསྟར་འཆར་གཞི་ཁག་ངོ་སྤྲོད་གནང་རྗེས་ཚོགས་བཅར་བ་རྣམས་སྡེ་ཁག་སོ་སོར་བ་བགོས་ཀྱིས་རྒྱ་གར་ནང་ས་གནས་སོ་སོར་བོད་དོན་ཞུ་གཏུག་སྤེལ་ཕྱོགས་ཀྱི་བགྲོ་གླེང་དང་ལག་བསྟར་འཆར་གཞི་འཆར་འགོད་གནང་ཡོད།
ཚོགས་འདུའི་ཉིན་མཐའ་མར་ཆབ་སྲིད་བཙོན་ཟུར་ངག་དབང་འོད་འབར་ལགས་ཀྱིས་བོད་ནང་རྒྱ་ནག་གི་བཙན་གནོན་ལ་ངོ་རྒོལ་གནང་རིམ་དང་། དེ་རྗེས་རྒྱའི་བཙོན་ཁང་དུ་སྡུག་སྦྱོང་མྱངས་ཚུལ་དང་འབྲེལ་བའི་སྒེར་གྱི་མྱོང་ཚོར་གསུངས་པ་དང་ཆབས་ཅིག ད་ལྟའི་བོད་ནང་གི་ཛ་དྲག་གནས་སྟངས་དང་། བོད་མི་གཞོན་སྐྱེས་རྣམས་ནས་བོད་ཀྱི་གནས་སྟངས་རྒྱ་གར་གཞུང་དམངས་ལ་གོ་རྟོགས་དང་ཞུ་གཏུག་སྤེལ་བར་འབད་རྩོལ་གནང་དགོས་པའི་རེ་སྐུལ་གནང་ཡོད།
དེ་ནས་ཕྱི་དྲིལ་བོད་དོན་ཞུ་གཏུག་ཚན་པའི་ལས་བྱེད་བསྟན་འཛིན་ཀུན་མཁྱེན་ལགས་ཀྱིས་བོད་ནང་གི་ཛ་དྲག་གནས་སྟངས་སྤྱི་དང་། ཡང་སྒོས་རྒྱ་ནག་གཞུང་གིས་བོད་མིའི་འགྲོ་བ་མིའི་ཐོབ་ཐང་དང་། ཆོས་དད་རང་དབང་རྡོག་རོལ་བརྩིས་མེད་གཏོང་བཞིན་པ་མ་ཟད། རིག་གཞུང་བཙན་སྒྱུར་དང་། བོད་མི་རྣམས་ལ་ཉེས་མེད་བཙོན་འཇུག་བྱེད་བཞིན་པའི་གནས་སྟངས་གསལ་བཤད་གནང་ཡོད།
ཚོགས་འདུའི་མཇུག་མཐར་ཚོགས་བཅར་བ་ཐུན་མོང་ནས་རྒྱ་གར་ནང་བོད་དོན་ཞུ་གཏུག་སྤེལ་ཕྱོགས་ཀྱི་ལག་བསྟར་འཆར་གཞི་གཏན་འབེབས་དང་སྦྲགས། ཕྱི་དྲིལ་དྲུང་འཕར་བསྟན་འཛིན་ལེགས་བཤད་ལགས་ཀྱིས་ཚོགས་བཅར་བ་རྣམས་ནས་རྒྱ་གར་ནང་དང་བླངས་བོད་དོན་ཞུ་གཏུག་ལས་འགུལ་སྤེལ་ཕྱོགས་ཀྱི་ཚོགས་འདུ་དང་ཟབ་སྦྱོང་ལ་མཉམ་ཞུགས་ཀྱིས་བགྲོ་གླེང་ཞིབ་ལྷུག་གནང་བར་བསྔགས་བརྗོད་གནང་ཡོད་པ་བཅས།། 
