༄༅། །ཕྱི་ལོ་ ༢༠༢༣ ཟླ་བ་ ༡༡ ཚེས་ ༥ ཉིན་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱིས་ཇར་མ་ནིའི་ཕ་རེང་ཕཏ་ཏུ་གོ་སྒྲིག་ཞུས་པའི་ཡུ་རོབ་ས་གནས་དང་བླངས་བོད་དོན་ཞུ་གཏུག་ལས་འགུལ་གྱི་ཚོགས་འདུ་དང་ཟབ་སྦྱོང་ལེགས་པར་མཇུག་སྒྲིལ་ཡོད།
སྐབས་དེར་ཡུ་རོབ་སྤྱི་འཐུས་དགེ་བཤེས་ཐུབ་བསྟན་དབང་ཆེན་ལགས་དང་སྤྱི་འཐུས་ཐུབ་བསྟན་རྒྱ་མཚོ་ལགས། ཨིན་ཡུལ་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས། བྷེལ་ཇམ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས། པེ་རི་སིའི་འབྲེལ་མཐུད་པ་ཐུབ་བསྟན་ཚེ་རིང་ལགས། ཕྱི་དྲིལ་ལས་ཁུངས་ཀྱི་དྲུང་འཕར་བསྟན་འཛིན་ལེགས་བཤད་ལགས། དེ་བཞིན་རྒྱལ་ཁབ་མི་འདྲ་བ་བདུན་གྱི་བོད་རིགས་སྤྱི་མཐུན་ཚོགས་པའི་སྐུ་ཚབ། ཡུ་རོབ་རྒྱལ་ཁབ་དགུ་ནས་ཚོགས་བཅར་ཞུས་པའི་དང་བླངས་བོད་དོན་ཞུ་གཏུག་ལས་འགུལ་གྱི་ཚོགས་མི་བཞི་བཅུ་ཞེ་ལྔ་མཉམ་ཞུགས་གནང་ཡོད་པ་རེད།
ཉིན་གཉིས་པའི་སྐབས་ཕྱི་དྲིལ་ལས་ཁུངས་ཀྱི་དྲུང་འཕར་བསྟན་འཛིན་ལེགས་བཤད་ལགས་ཀྱིས་དང་བླངས་བོད་དོན་ཞུ་གཏུག་ལས་འགུལ་གྱི་ངོ་སྤྲོད་དང་། དེའི་གལ་གནད་བཅས་ཀྱི་སྐོར་གསུང་བཤད་གནང་ཡོད། དེ་ནས་ཕྱི་དྲིལ་ལས་ཁུངས་ཀྱི་བོད་དོན་ཞུ་གཏུག་ཚན་པའི་ལས་བྱེད་བསྟན་འཛིན་དཔལ་མོ་ལགས་ཀྱིས་རྒྱལ་སྤྱིའི་བོད་ཀྱི་གཞོན་སྐྱེས་ཚོགས་ཆེན་གྱི་ལག་བསྟར་འཆར་གཞིའི་སྐོར་གསལ་བཤད་གནང་བ་མ་ཟད། ཚོགས་བཅར་བ་རྣམས་ཀྱི་དྲི་བ་ཁག་ལ་ལན་འདེབས་གནང་ཡོད།
སྐབས་དེར་ཚོགས་བཅར་བ་རྣམས་མ་འོངས་པའི་ལས་འགུལ་ཚགས་ཚུད་ཡོང་ཆེད་རྒྱལ་ཁབ་གཞིར་བཟུང་སྡེ་ཚན་ཁག་ཏུ་བགོས་ནས་ལས་འཆར་རྒྱས་པ་བཟོ་ཐབས་དང་། ཕྱི་ལོ་ ༢༠༢༣ ལོར་རྡ་སར་འཚོགས་པའི་རྒྱལ་སྤྱིའི་གཞོན་སྐྱེས་ཚོགས་ཆེན་སྐབས་གྲོས་བསྡུར་བྱས་པའི་དོན་གནད་ཁག་གི་སྐོར་བགྲོ་གླེང་ལྷུག་པོ་གནང་། ཚོགས་འདུའི་ཉིན་མཐའ་མའི་སྐབས་པོ་ལནྡ་གྱི་དང་བླངས་བོད་དོན་ཞུ་གཏུག་ལས་འགུལ་གྱི་ཚོགས་མི་བསྟན་འཛིན་དཔལ་སྒྲོན་ལགས་དང་། ལན་ཊན་གྱི་དང་བླངས་བོད་དོན་ཞུ་གཏུག་ལས་འགུལ་གྱི་ཚོགས་མི་ཏཱ་ར་ལྷ་མོ་ལགས་གཉིས་ཀྱིས་ཡུ་རོབ་ཀྱི་ལས་འཆར་ཕྱོགས་བསྡོམས་ངོ་སྤྲོད་གནང་། ལས་འཆར་དེ་ནི་ཡོ་རོབ་རྒྱལ་ཁབ་དགུ་ཐུན་མོང་གི་དམིགས་དོན་སྒྲུབ་ཆེད་ཀྱི་འབད་རྩོལ་ཞིག་ཡིན་པ་རེད།
མཐའ་དོན་ཕྱོགས་བཞུགས་སྤྱི་འཐུས་ཐུབ་བསྟན་དབང་ཆེན་ལགས་དང་ཐུབ་བསྟན་རྒྱ་མཚོ་ལགས། ཨིན་ཡུལ་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས། བྷེལ་ཇམ་སྐུ་ཚབ་དོན་གཅོད་རིག་འཛིན་ཆོས་སྒྲོན་ལགས་བཅས་ནས་མཇུག་སྡོམ་གསུང་བཤད་གནང་ཡོད་པ་དང་། དྲུང་འཕར་བསྟན་འཛིན་ལེགས་བཤད་ལགས་ཀྱིས་གཞོན་སྐྱེས་རྣམས་ནས་བོད་དོན་ཐོག་ལྷག་བསམ་ལྡན་པའི་ཐོག་ནས་འགན་ཁུར་བར་བསྔགས་བརྗོད་གནང་ཡོད་པ་བཅས།། 
