དེ་ཡང་ཐོག་མར་སྐུ་མགྲོན་རྣམ་པ་གྲོས་ཚོགས་ཀྱི་ཚོགས་ཁང་ནང་གཟིགས་སྐོར་སྣེ་ཁྲིད་དང་། དེ་རྗེས་སྤྱི་འཐུས་རྒྱུན་ལས་ཚོགས་ཁང་ནང་དཔལ་ལྡན་ཚོགས་གཙོ་སྦྲེལ་པོ་མཆོག་གིས་གཙོས་པའི་སྤྱི་འཐུས་རྒྱུན་ལས་རྣམ་པ་དང་། སྐུ་མགྲོན་རྣམ་པ་ལྷན་འཛོམས་ཐོག་དཔལ་ལྡན་ཚོགས་གཙོ་མཆོག་གིས་ཐོག་མར་འཚམས་འདྲི་དང་། དེ་ནས་བོད་མི་མང་སྤྱི་འཐུས་ལྷན་ཚོགས་དང་། སྤྱི་འཐུས་རྒྱུན་ལས་ཀྱི་ལས་དོན་སྐོར་ངོ་སྤྲོད་དང་སྦྲགས་གཙོ་བོ་གསུང་དོན། ང་ཚོ་ཆབ་སྲིད་ཀྱི་གནས་བབ་ཐོག་ནས་རྒྱ་གར་ལ་བསྡད་ནས་ལོ་ངོ་ ༦༤ ལྷག་འགྲོ་ཡི་ཡོད་པ་དང་། དེའི་རིང་གཙོ་བོ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་ཐུགས་རྗེའི་བཀའ་དྲིན་དང་། རྒྱ་གར་གཞུང་མང་གཉིས་ཀྱི་མཐུན་འགྱུར་གནང་བ་བཅས་ལ་བརྟེན་ནས་བོད་ཀྱི་འཐབ་རྩོད་དང་། དེ་བཞིན་བོད་ཀྱི་ཆོས་དང་། རིག་གཞུང་གསོན་པོར་གནས་ཐུབ་པའི་གནས་སྟངས་སྐོར་དང་། དེ་བཞིན་ཆབ་སྲིད་ཀྱི་གནས་བབ་ཐོག་ལ་ཨ་རིའི་གཞུང་དང་། ཡུ་རོབ་མཐུན་ཚོགས། ཡུ་རོབ་རྒྱལ་ཁབ་ཁག་གིས་བོད་དོན་ཐོག་རྒྱབ་སྐྱོར་དང་། ལྷག་པར་དུ་ཨ་རིའི་གཞུང་གིས་བོད་དོན་ཐོག་ཁྲིམས་འཆར་གཏན་འབེབས་གནང་བ་བཅས་ཀྱིས་བོད་ནང་ཡོད་པའི་བོད་མི་ཚོར་སེམས་ཤུགས་འཕར་གཞིའི་གནས་སྟངས་ཆགས་ཀྱི་ཡོད་པ།གཞན་ཡང་སྐུ་ཞབས་ཧན་སེ་གྷར་ཊི་པོ་ཊེ་རིང་མཆོག་དེ་སྔ་ཡུ་རོབ་གྲོས་ཚོགས་ཀྱི་ཚོགས་གཙོའི་ཐུགས་འགན་བཞེས་སྐབས། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ཡུ་རོབ་གྲོས་ཚོགས་ནང་གདན་ཞུས་གནང་བ་དེ་བཞིན་བོད་མི་ཚོས་དུས་ནམ་ཡང་བརྗེད་ཐབས་མེད་པའི་སྐོར། ཡུ་རོབ་མཐུན་ཚོགས་ཀྱི་ཐོག་ནས་བོད་ནང་གི་འགྲོ་བ་མིའི་ཐོབ་ཐང་དང་། མང་གཙོ། སྐད་ཡིག རིག་གཞུང་དང་བཅས་པ་སྲུང་སྐྱོབ་ཐོག་ཐུགས་སྣང་ཆེན་པོ་གནང་བཞིན་ཡོད་པར་འདི་ནས་དགའ་བསུ་ཞུ་ཡི་ཡོད་པ། རྒྱ་ནག་དམར་གཞུང་གིས་འཛུགས་བསྐྲུན་ལ་ཁ་གཡར་ཏེ་བོད་ནང་གི་འགྲོ་བ་མིའི་ཐོབ་ཐང་བརྡལ་བཤིག་དང་། དངོས་ཡོད་གནས་ཚུལ་རྣམས་འཁྱོག་བཤད་བྱེད་བཞིན་ཡོད་སྐོར། ཡུ་རོབ་ནང་གི་བོད་དོན་ཞུ་སྐུལ་གྱི་ལས་འཆར་ཁག་བཅས་ཀྱི་ཐོག་རྒྱབ་སྐྱོར་གནང་རྒྱུའི་འབོད་སྐུལ་བཅས་ཞུས་གནང་སོང་།དཔལ་ལྡན་ཚོགས་གཞོན་མཆོག་གིས་གཙོ་བོ་གསུང་དོན། ད་རེས་སྐུ་ཞབས་ཁོང་གྲོས་ཚོགས་སུ་ཕེབས་པ་འདིས་རྒྱ་ནག་དམར་གཞུང་ལ་བོད་ཀྱི་རྩ་དོན་འཐབ་རྩོད་ཐོག་བོད་པ་གཅིག་པུ་མིན་པའི་བརྡ་ལན་གསལ་པོར་བསྟན་ཡོད་པའི་སྐོར་དང་། བོད་ནང་བྱིས་པ་སྟོང་ཕྲག་མང་པོ་རྒྱ་ནག་དམར་གཞུང་གི་བཅའ་སྡོད་སློབ་གྲྭའི་ནང་བཙན་ཤེད་ཐོག་སློབ་འཇུག་བྱེད་བཅུག་སྟེ། བོད་རིགས་རྣམས་རྒྱ་རིགས་སུ་བསྒྱུར་ཐབས་བྱེད་བཞིན་ཡོད་པ་སོགས་བོད་ནང་གི་ད་ལྟའི་ཛ་དྲག་གནས་སྟངས་སྐོར། འཛམ་གླིང་གནམ་གཤིས་འགྱུར་ལྡོག་ཐོག་བོད་ཀྱི་ཁོར་ཡུག་གི་གལ་གནད་དང་། དེའི་ཐོག་རྒྱལ་སྤྱིའི་མཉམ་འབྲེལ་རྒྱལ་ཚོགས་ཀྱིས་ཚན་རིག་དང་མཐུན་པའི་ཐོག་ནས་ཞིབ་འཇུག་ཚད་ལྡན་གནང་དགོས་སྐོར་སོགས་གསུངས་གནང་སོང་།ཡུ་རོབ་གྲོས་ཚོགས་ཀྱི་ཚོགས་གཙོ་ཟུར་པ་འབུམ་རམས་པ་སྐུ་ཞབས་ཧན་སེ་གྷར་ཊི་པོ་ཊེ་རིང་ (Dr. Hans-Gert Pottering) མཆོག་གིས་ཁོང་ཉིད་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་གུས་བརྩི་ཆེན་པོ་ཡོད་པ་དང་། མགོན་པོ་གང་ཉིད་ཀྱིས་བཀའ་སློབ་ལམ་སྟོན་ཐོག་ནས་སེམས་འགུལ་ཆེན་པོ་ཐེབས་ཡོད་སྐོར། དེ་སྔ་ཁོང་ཉིད་ཡུ་རོབ་གྲོས་ཚོགས་ཀྱི་ཚོགས་གཙོ་གནང་སྐབས་མགོན་པོ་གང་ཉིད་མཆོག་ཡུ་རོབ་གྲོས་ཚོགས་གདན་ཞུས་གནང་ཡོད་པའི་སྐོར། བོད་དོན་དྲིལ་བསྒྲགས་གནང་རྒྱུ་སོགས་མུ་མཐུད་བོད་དོན་ཐོག་རྒྱབ་སྐྱོར་གནང་རྒྱུའི་ཞལ་བཞེས་བཅས་གནང་སོང་།

ཡུ་རོབ་གྲོས་ཚོགས་ཀྱི་ཚོགས་གཙོ་ཟུར་པ་མཆོག་དང་ལྷན་འཇར་མན་གྱི་ཆབ་སྲིད་སློབ་སྟོན་བསྟི་གནས་ (Konrad Adenauer Foundation) ཞེས་པའི་ལྡི་ལི་ཁུལ་གྱི་འགན་འཛིན་འབུམ་རམས་པ་ཨེ་ཌི་རེ་ཡན་ཧེག་ (Dr. Adrain Haack) མཆོག་དང་། སྦར་སིལ་སྐུ་ཚབ་དོན་གཅོད་རིག་འཛིན་ཆོས་སྒྲོན་ལགས་མཉམ་བཅར་ཞུས་གནང་འདུག་པ་བཅས། །