༄༅། །ཕྱི་ལོ་ ༢༠༢༣ ཟླ་བ་ ༡༡ ཚེས་ ༡༠ ཉིན་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་ཁྱབ་ཁོངས་ས་གནས་འགོ་འཛིན་རྣམས་ཀྱི་འཛིན་སྐྱོང་ཚོགས་ཆེན་ཐེངས་བཅོ་ལྔ་པ་ལེགས་པར་འཇུག་སྒྲིལ་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་དགུ་པའི་ཐོག་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་དང་ནང་སྲིད་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་དང་། ནང་སྲིད་དྲུང་ཆེ་དཔལ་ལྡན་དོན་གྲུབ་ལགས། ནང་སྲིད་དྲུང་འཕར་བསྟན་འཛིན་ནོར་བུ་ལགས་དང་བྱམས་པ་ཕུན་ཚོགས་ལགས། ཟུང་དྲུང་བསྟན་འཛིན་ཀུན་བཟང་ལགས། ཚོགས་བཅར་བ་ས་གནས་འགོ་འཛིན་རྣམ་པ་ཚང་འཛོམས་ཐོག་ནང་སྲིད་ལས་ཁུངས་ཀྱི་ཁྱབ་ཁོངས་ས་གནས་འགོ་འཛིན་རྣམས་ཀྱི་འཛིན་སྐྱོང་ཚོགས་ཆེན་ཐེངས་བཅོ་ལྔ་པའི་མཇུག་སྡོམ་མཛད་སྒོ་ཚོགས་ཡོད་པ་རེད།
མཛད་སྒོའི་ཐོག་མར་ནང་སྲིད་དྲུང་ཆེ་དཔལ་ལྡན་དོན་གྲུབ་ལགས་ཀྱིས་མཇུག་སྡོམ་གསུང་བཤད་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་། ༸སྐྱབས་རྗེ་བཀའ་བློན་ཁྲི་ཟུར་སློབ་དཔོན་ཟམ་གདོང་རིན་པོ་ཆེ་མཆོག་རྣམ་གཉིས་ཀྱིས་ས་གནས་འགོ་འཛིན་རྣམས་ལ་རྩལ་བའི་བཀའ་སློབ་ལམ་སྟོན་རྣམས་མ་བརྗེད་པར་ལག་བསྟར་གནང་དགོས་སྐོར་གསུངས་རྗེས་དཔལ་ལྡན་སྲིད་སྐྱོང་དང་ནང་སྲིད་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་གིས་མཇུག་སྡོམ་མཛད་སྒོ་དང་འབྲེལ་བའི་གསུང་བཤད་གནང་ཞིང་། སྐབས་དེར་དཔལ་ལྡན་སྲིད་སྐྱོང་མཆོག་གིས་ས་གནས་འགོ་འཛིན་རྣམས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་བཞེད་བསྒྲུབ་རྒྱུ་དང་། ༸སྐྱབས་རྗེ་བཀའ་བློན་ཁྲི་ཟུར་སློབ་དཔོན་ཟམ་གདོང་རིན་པོ་ཆེ་མཆོག་གིས་བཀའ་སློབ་ལམ་སྟོན་གནང་བ་རྣམས་ཡིད་ལ་བཅངས་ཏེ་ལས་དོན་གནང་དགོས་སྐོར་དང་། དེ་བཞིན་ས་གནས་འགོ་འཛིན་རྣམས་ནས་མི་མང་གི་དགོས་མཁོ་དང་བསྟུན་ནས་ལས་གཞི་སྤེལ་དགོས་སྐོར་ལམ་སྟོན་གནང་ཡོད།
དེ་མཚུངས་ཁོང་གིས་ས་གནས་འགོ་འཛིན་རྣམས་ཀྱིས་ས་གནས་སོ་སོའི་གྲངས་ཐོ་ཚད་ལྡན་བཟོ་རྒྱུ་དང་། གཞིས་ཆགས་སོ་སོའི་ས་ཆའི་ཡིག་ཆ་ཚད་ལྡན་བདག་གཉེར་བྱེད་དགོས་པ་མ་ཟད། གཞིས་ཆགས་སྲ་བརྟན་ཡོང་ཐབས་སུ་གཞིས་ཆགས་ཁག་ཡུལ་སྐོར་སྤྲོ་འཆམ་གྱི་གནས་སུ་གྱུར་ཐབས་སོགས་ཀྱི་ལས་གཞི་སྤེལ་རྒྱུར་འབད་རྩོལ་གནང་དགོས་པའི་ལམ་སྟོན་དང་འབྲེལ། ས་གནས་ས་ོསོར་བོད་མི་དང་ཡུལ་མི་བར་མཐུན་ལམ་གོང་མཐོར་གཏོང་བར་འབད་རྩོལ་གནང་དགོས་པའི་འབོད་སྐུལ་གནང་ཡོད་པ་བཅས།། 
