བོད་མི་མང་སྤྱི་འཐུས་ལྷན་ཚོགས་ཀྱི་བོད་དོན་ཞུ་སྐུལ་ཚོགས་ཆུང་གིས་ཨུ་ཏར་པར་དེ་ཤི་མངའ་སྡེའི་ནང་བོད་དོན་ཞུ་སྐུལ་གནང་འགོ་འཛུགས་པ།

གསར་ལས་ཁང་གི་གསར་འགོད་པས།

༢༠༢༣-༡༡-༢༦

༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། བོད་མི་མང་སྤྱི་འཐུས་སློབ་དཔོན་ཐུབ་བསྟན་རྒྱལ་མཚན་ལགས་དང་། སྤྱི་འཐུས་དབང་འདུས་རྡོ་རྗེ་ལགས། སྤྱི་འཐུས་པདྨ་མཚོ་ལགས་བཅས་ལས་གྲུབ་པའི་བོད་མི་མང་སྤྱི་འཐུས་ལྷན་ཚོགས་ཀྱི་བོད་དོན་ཞུ་སྐུལ་ཚོགས་ཆུང་གིས་ཕྱི་ལོ་ ༢༠༢༣ ཟླ་ ༡༡ པའི་ཚེས་ ༢༠ ནས་ ༢༣ བར་ཉིན་གྲངས་བཞིའི་རིང་ཨུ་ཏར་ཁན་ཌི་མངའ་སྡེའི་ནང་བོད་དོན་ཞུ་སྐུལ་ལེགས་པར་གྲུབ་རྗེས། ཕྱི་ཚེས་ ༢༤ ནས་རྒྱ་གར་བྱང་ཕྱོགས་ཨུ་ཏར་པར་དེ་ཤི་མངའ་སྡེའི་ནང་བོད་དོན་ཞུ་སྐུལ་གནང་འགོ་འཛུགས་ཡོད་པ་རེད།

དེ་ཡང་ཕྱི་ཚེས་ ༢༤ ཉིན་སྤྱི་འཐུས་རྣམ་པ་མཁའ་ལམ་བརྒྱུད་རྒྱ་གར་གྱི་མངའ་སྡེ་ཆེ་ཤོས་གཉིས་པ་ཨུ་ཏར་པར་ཌེ་ཤིའི་ནང་ཕེབས་འབྱོར་བྱུང་ཞིང་། སྐབས་དེར་གནམ་ཐང་ལ་ལག་ནོ་རུ་གནས་བཞུགས་ས་གནས་བོད་མིའི་སུད་ཚོང་ཚོགས་པའི་འཐུས་མི་ཚེ་རིང་དོན་འགྲུབ་ལགས་དང་། བསོད་ནམས་ལགས་རྣམ་གཉིས་ནས་ཕེབས་བསུའི་སྣེ་ལེན་ཞུས་གནང་ཡོད་འདུག

ཕྱི་ཚེས་ ༢༥ ཉིན་རྒྱལ་ས་ལག་ནོ་རུ་ཡོད་པའི་བོད་དོན་རྒྱབ་སྐྱོར་ཚོགས་པ་ (Core Group for Tibetan Cause-India) ཡི་ཨུ་ཏར་ཁན་ཌི་དང་ཨུ་ཏར་པར་དེ་ཤིའི་འབྲེལ་མཐུད་འགན་འཛིན་དང་། བོད་དོན་རྒྱབ་སྐྱོར་ཚོགས་པ་ (Bharat Tibbat Samvad Manch) ཡི་རྒྱ་གར་རྒྱལ་ཡོངས་ཀྱི་ཚོགས་གཙོ་སྐུ་ཞབས་སན་ཇེ་ཤུག་ལ་ (Dr.Sanjey Shukla) ལགས་དང་མཇལ་འཕྲད་ཀྱིས་མངའ་སྡེའི་ནང་བོད་དོན་ཞུ་སྐུལ་གནང་ཕྱོགས་སྐོར་བཀའ་བསྡུར་གནང་རྗེས། ཉིན་རྒྱབ་ཆུ་ཚོད་ ༡ པོའི་ཐོག་ཨུ་ཏར་པར་དེ་ཤི་མངའ་སྡེའི་ཆབ་སྲིད་ཚོགས་པ་ (Samajwadi Party) ཡི་མངའ་སྡེའི་གྲོས་ཚོགས་འཐུས་མི་སྐུ་ཞབས་ཤི་ཝི་པལ་སིངྒ་ཡ་དེབ་ (Shri. Shivpal Singh Yadav) མཆོག་དང་ལྷན་མཇལ་འཕྲད་ཀྱིས་བོད་དོན་ཞུ་སྐུལ་དང་། ཕྱི་དྲོ་ཆུ་ཚོད་ ༤།༣༠ ཐོག་རྒྱལ་ས་ལག་ནོ་ཡི་གྲོང་ཁྱེར་སྤྱི་ཁྱབ་ལྕམ་སྐུ་སུ་ཤི་མ་ཀར་ཝལ་ (Smt Sushma Karkwal) མཆོག་དང་ལྷན་མཇལ་འཕྲད་གནང་ཡོད་འདུག

ལག་ནོ་གྲོང་ཁྱེར་སྤྱི་ཁྱབ་མཆོག་གི་གཞུང་ལས་ཁང་དུ་ས་གནས་ཀྱི་གནད་ཡོད་མི་སྣ་ ༤༠ ཙམ་དང་། གསར་འགོད་པ་བཅས་ལྷན་འཛོམས་ཐོག གྲོང་ཁྱེར་སྤྱི་ཁྱབ་མཆོག་ནས་བོད་མི་མང་སྤྱི་འཐུས་རྣམ་པ་གསུམ་ལ་ཕྱག་རྟགས་དང་། སྣེ་ལེན་ཟབ་རྒྱས་ཞུས་ཡོད་པ་དང་། བོད་མི་མང་སྤྱི་འཐུས་ལྷན་ཚོགས་ཀྱི་བོད་དོན་ཞུ་སྐུལ་ཚོགས་ཆུང་ནས་ཀྱང་ལྕམ་སྐུ་མཆོག་ལ་ཕྱག་རྟགས་དང་། བོད་དོན་ཞུ་སྐུལ་གྱི་སྙན་ཞུ་སོགས་ཕུལ་རྗེས། གྲོང་ཁྱེར་སྤྱི་ཁྱབ་མཆོག་ནས་ཁོང་ཉིད་དུས་རྒྱུན་དུ་ནས་བོད་དོན་ཐོག་ཐུགས་ཁུར་གནང་བཞིན་ཡོད་པའི་སྐོར་དང་། ལག་ནོ་གྲོང་ཁྱེར་ནང་ཡོད་པའི་བོད་མི་སུད་ཚོང་བར་དཀའ་ངལ་གང་ཡོད་པ་ཡིན་ནའང་། ཡར་ཞུས་པ་ཡིན་ན་གཟིགས་སྐྱོང་གང་ཡོང་གནང་རྒྱུའི་ཞལ་བཞེས་སོགས་གནང་ཡོད་པ་དང་། བོད་མི་མང་སྤྱི་འཐུས་རྣམ་པས་བོད་ནང་གི་ད་ལྟའི་ཛ་དྲག་གནས་སྟངས་དང་། ལྷག་པར་དུ་བོད་ནང་རྒྱ་ནག་དམར་གཞུང་གིས་ལག་བསྟར་བྱེད་བཞིན་པའི་སྲིད་བྱུས་ངན་པའི་ཤུགས་རྐྱེན་འོག བོད་ཀྱི་སྐད་ཡིག་དང་། རིག་གཞུང་། ཁོར་ཡུག་བཅས་ལ་དོ་ཕོག་བསམ་ཡུལ་ལས་འདས་པ་འབྱུང་བཞིན་ཡོད་པའི་སྐོར་དང་། བོད་ནི་ལོ་རྒྱུས་ཐོག་རང་བཙན་གཙང་མའི་རྒྱལ་ཁབ་ཅིག་ཡིན་པ། རྒྱ་ནག་གཞུང་གིས་བོད་ས་བཙན་བཟུང་བྱས་པའི་ཉེར་ལེན་ལ་བརྟེན་ནས་རྒྱ་གར་གྱི་ས་ཁོངས་སུའང་རྒྱ་དམར་གཞུང་གིས་བཙན་འཛུལ་བྱེད་ཀྱི་ཡོད་པ་དེར་མཐའ་གཅིག་ཏུ་གདོང་ལེན་བྱེད་གལ་ཆེ་བ། ལོ་རྒྱུས་ཐོག་རྒྱ་གར་དང་རྒྱ་ནག་གི་ས་མཚམས་ཟེར་བ་ཞིག་གཏན་ནས་མེད་པ་སོགས་ངོ་སྤྲོད་དང་།

དེ་བཞིན་ས་གནས་བོད་མི་སུད་ཚོང་བ་རྣམས་ནི་དེ་སྔ་ནས་ས་གནས་དེར་ཚོང་ལས་གཉེར་ནས་སྡོད་བཞིན་ཡོད་སྟབས། ཁོང་རྣམས་ལ་གཟིགས་སྐྱོང་གང་ལེགས་གནང་སྐྱོང་ཡོང་བའི་འབོད་སྐུལ་བཅས་ཞུས་ཡོད་འདུག ཕེབས་བསུའི་མཛད་སྒོ་གྲུབ་རྗེས། གྲོང་ཁྱེར་སྤྱི་ཁྱབ་མཆོག་དང་བོད་མི་མང་སྤྱི་འཐུས་ལྷན་ཚོགས་ཀྱི་བོད་དོན་ཞུ་སྐུལ་ཚོགས་ཆུང་གི་ཚོགས་མི་རྣམ་པ་ཟུར་དུ་མཇལ་མོལ་གནང་ཡོད་པ་མ་ཟད། གསར་ཁང་ཁག་ཅིག་གི་གསར་འགོད་པའི་བཅར་འདྲིར་དང་ལེན་གནང་ཡོད་འདུག

དེ་རྗེས་དགོང་མོ་ཆུ་ཚོད་ ༧།༠༠ པ་ཙམ་གྱི་ཐོག་བྷི་ཇེ་པི་གཞུང་འཛིན་སྲིད་དོན་ཚོགས་པའི་ཨུ་ཏར་པར་དེ་ཤི་མངའ་སྡེའི་ཚོགས་གཙོ་སྐུ་ཞབས་དྷ་རམ་པལ་སིངྒ་ (Shri. Dharampal Singh) མཆོག་དང་ལྷན་མཇལ་འཕྲད་ཀྱིས་བོད་ནང་གི་ཛ་དྲག་གནས་སྟངས་དང་། འཕགས་བོད་གཉིས་དབར་གྱི་ལོ་རྒྱུས་འབྲེལ་བ་སོགས་ངོ་སྤྲོད་གནང་སྟེ། ད་བར་བོད་དོན་ཐོག་རྒྱབ་སྐྱོར་གནང་བར་ཐུགས་རྗེ་ཆེ་ཞུས་པ་དང་སྦྲགས། མུ་མཐུད་རྒྱབ་སྐྱོར་གནང་སྐྱོང་ཡོང་བའི་རེ་སྐུལ་ཞུས་ཡོད་པ་དང་། ཁོང་ནས་ཀྱང་ཁོང་ཉིད་ག་དུས་ཡིན་ནའང་བོད་མི་ཚོ་དང་མཉམ་དུ་ཡོད་པ་དང་། བོད་དོན་ཐོག་མུ་མཐུད་རྒྱབ་སྐྱོར་གནང་རྒྱུ་ཡིན་སྐོར་གསུངས་ཡོད་འདུག དགོང་དྲོ་ཆུ་ཚོད་ ༨ པའི་ཐོག་བོད་མི་མང་སྤྱི་འཐུས་རྣམ་པ་རྒྱལ་ས་ལག་ནོ་ནས་རྩྭ་མཆོག་གྲོང་དུ་ཕེབས་ཐོན་གནང་སྟེ། དེ་རིང་ཕྱི་ཚེས་ ༢༦ ཉིན་རྩྭ་མཆོག་གྲོང་དང་། ཨ་ཡོ་ཌཱ་ (Ayodhya) གྲོང་ཁྱེར་ནང་ཡོད་པའི་གནད་ཡོད་མི་སྣ་ཁག་ཅིག་དང་མཇལ་འཆར་གནང་རྒྱུ་ཡིན་པ་བཅས། །