བོད་མི་མང་སྤྱི་འཐུས་ལྷན་ཚོགས་ཀྱི་བོད་དོན་ཞུ་སྐུལ་ཚོགས་ཆུང་ནས་ཨུ་ཏར་ཁན་ཌི་མངའ་སྡེའི་ནང་གི་བོད་དོན་ཞུ་སྐུལ་ལས་འགུལ་ལེགས་གྲུབ་བྱུང་བ།

གསར་ལས་ཁང་གི་གསར་འགོད་པས།

༢༠༢༣-༡༡-༢༤

༄༅། ། ཕྱི་ལོ་ ༢༠༢༣ ཟླ་ ༡༡ པའི་ཚེས་ ༢༣ ཉིན་བོད་མི་མང་སྤྱི་འཐུས་སློབ་དཔོན་ཐུབ་བསྟན་རྒྱལ་མཚན་ལགས་དང་། སྤྱི་འཐུས་དབང་འདུས་རྡོ་རྗེ་ལགས། སྤྱི་འཐུས་པདྨ་མཚོ་ལགས་བཅས་ལས་གྲུབ་པའི་བོད་མི་མང་སྤྱི་འཐུས་ལྷན་ཚོགས་ཀྱི་བོད་དོན་ཞུ་སྐུལ་ཚོགས་ཆུང་གིས་རྒྱ་གར་བྱང་ཕྱོགས་ཨུ་ཏར་ཁན་ཌི་མངའ་སྡེའི་ནང་ཉིན་གྲངས་བཞིའི་རིང་གི་བོད་དོན་ཞུ་སྐུལ་གྱི་ལས་རིམ་ཁག་ལེགས་གྲུབ་བྱུང་ཡོད།

དེ་ཡང་ཕྱི་ཚེས་ ༢༣ ཉིན་གྱི་སྔ་དྲོ་ཆུ་ཚོད་ ༡༡ ཙམ་ལ་བོད་མི་མང་སྤྱི་འཐུས་ལྷན་ཚོགས་ཀྱི་བོད་དོན་ཞུ་སྐུལ་ཚོགས་ཆུང་ནས་རྒྱ་གར་བྱང་ཕྱོགས་ཨུ་ཏར་ཁན་ཌི་མངའ་སྡེའི་གྲོང་ཁྱེར་ཧ་རི་དྷི་ཝར་ (Haridwar) ནང་བཞུགས་པའི་རྒྱ་གར་གྱི་ཡོ་ག་སློབ་སྟོན་པ་གྲགས་ཅན་སྭ་མི་རཱམ་དེབ་ (Swami Ramdev) མཆོག་གི་བཞུགས་གནས་སུ་ཁོང་དང་ལྷན་མཇལ་འཕྲད་གནང་ཞིང་། སྐབས་དེར་སྤྱི་འཐུས་རྣམ་པས་ཐོག་མར་ཡོ་ག་སློབ་སྟོན་པ་སྭ་མི་རཱམ་དེབ་མཆོག་ལ་འཚམས་འདྲིའི་མཇལ་དར་ཕུལ་བ་དང་། དེ་ནས་བོད་མི་མང་སྤྱི་འཐུས་ལྷན་ཚོགས་ཀྱི་དོན་ཚན་བཅུ་ཅན་གྱི་བོད་དོན་ཞུ་སྐུལ་སྙན་ཞུ་དང་། དེ་བཞིན་ཕྱག་རྟགས་དེབ་དང་། འགྲེམས་ཤོག་བཅས་ཕུལ་རྗེས། ད་བར་རྒྱ་གར་དབུས་སའི་གཞུང་མང་གཉིས་ནས་བོད་མི་རྣམས་ལ་མཐུན་འགྱུར་དང་གཟིགས་སྐྱོང་གནང་བར་བརྟེན་ནས་བོད་ཀྱི་ཆོས་དང་། རིག་གཞུང་། མི་རིགས་ཀྱི་ངོ་བོ་བཅས་པ་མི་ཉམས་པར་རྒྱུན་འཛིན་གནང་དང་གནང་མུས་ཡིན་པའི་སྐོར་དང་། སྭ་མི་རཱམ་དེབ་མཆོག་གཞི་རྩའི་ཆོས་པ་ཞིག་ཡིན་ནའང་བོད་དོན་ཐོག་ངེས་པར་དུ་ཐུགས་སྣང་དང་རྒྱབ་སྐྱོར་ཡོང་བའི་འབོད་སྐུལ་ཞུས་པར། ཁོང་གིས་བོད་ནང་གི་དགོན་པ་དང་། སློབ་གྲྭ་སོགས་ཀྱི་གནས་སྟངས་ཇི་ལྟར་ཆགས་ཡོད་མེད་སྐོར་ཐུགས་སྣང་ཆེན་པོས་བཀའ་འདྲི་གནང་ཡོད་པ་མ་ཟད། རྒྱུན་དུ་ནས་བོད་མི་རྣམས་ལ་བློ་ཉེ་པོ་ཡོད་པ་དང་། ལྷག་པར་དུ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ནི་ཚང་མས་གུས་བརྩི་ཆེན་པོ་ཞུ་སའི་སྐྱེས་ཆེན་ཞིག་ཡིན་སྟབས། མགོན་པོ་གང་ཉིད་མཆོག་ལ་འཚམས་འདྲི་ཞུ་རོགས་ཅེས་དང་། མུ་མཐུད་བོད་དོན་ཐོག་རྒྱབ་སྐྱོར་གནང་རྒྱུའི་ཞལ་བཞེས་གནང་ཡོད་འདུག

སྐབས་དེར་རྒྱ་གར་བོད་དོན་རྒྱབ་སྐྱོར་ཚོགས་པ་ (Bharat-Tibet Samanvaya Sangh) ཞེས་པའི་རྒྱལ་ཡོངས་ཚོགས་གཙོ་སློབ་དཔོན་པི་ཌི་ཇུ་ཡུལ་ (Prof. P. D Juyul) ལགས་དང་། སྡེ་ར་ལྡུན་ས་གནས་ཀྱི་ཚོགས་གཙོ་སྨན་པ་ཇི་རེ་ཤི་སིངྒ་ནི་གྷི་ (Dr. Giresh Singh Negi) ལགས། ཚོགས་མི་སྤྱི་ཚོགས་ཞབས་ཞུ་བ་དང་། བུད་མེད་ཁེ་ལས་པའི་སློབ་སྟོན་པ་ལྕམ་སྐུ་རཱ་མཱ་གྷོ་ཡལ་ (Mrs Rama Goyal) ལགས་བཅས་མཉམ་བཅར་ཞུས་ཡོད་འདུག

ཕྱི་དྲོ་ཆུ་ཚོད་ ༤ པའི་ཐོག་བདེ་སྐྱིད་གླིང་ས་གནས་འགོ་འཛིན་ལས་ཁུངས་ཀྱི་གོ་སྒྲིག་འོག སྡེ་ར་ལྡུན་གྱི་གསར་འགོད་ལྷན་ཚོགས་ཀྱི་ཚོགས་ཁང་ (Press Club, Dehradun) ནང་དུ་གསར་འགོད་ལྷན་ཚོགས་ཤིག་བསྐོངས་ཤིང་། སྐབས་དེར་རྒྱ་གར་གྱི་དུས་བབ་ (Times of India) སོགས་ཀྱི་གསར་འགོད་པ་རྣམས་ལ་ཐེངས་འདིའི་བོད་དོན་ཞུ་སྐུལ་གྱི་ལས་འགུལ་སྐོར་དང་། བོད་ནང་གི་ཛ་དྲག་གནས་སྟངས། རྒྱ་ནག་དམར་གཞུང་གིས་བོད་ས་བཙན་བཟུང་བྱས་ཏེ་བོད་མི་ཁྲི་ཕྲག་མང་པོ་དམར་གསོད་བཏང་བའི་སྐོར། བོད་ཀྱི་ཆོས་དང་། རིག་གཞུང་། མི་རིགས་ཀྱི་ངོ་བོ་དང་བཅས་པ་རྩ་མེད་གཏོང་རྒྱུའི་སྲིད་བྱུས་ལག་བསྟར་བྱས་དང་བྱེད་མུས་ཡིན་པ་མ་ཟད། ཁྱིམ་མཚེས་རྒྱལ་ཁབ་རྒྱ་གར་ལའང་བཙན་འཛུལ་དང་ཧམ་བཟུང་བྱ་རྒྱུ་མགོ་བརྩམས་ཟིན་པའི་སྐོར་དང་། དེའི་ཐོག་ང་ཚོ་ཚང་མ་རྡོག་རྩ་གཅིག་ཏུ་བསྒྲིལ་ནས་རྒྱ་ནག་དམར་གཞུང་ལ་ཁ་གཏད་གཅོག་དགོས་པའི་དུས་ཚོད་གནད་འགག་ཅིག་ལ་བསླེབས་ཟིན་ཡོད་པ་སོགས་ཀྱི་སྐོར་ལ་གསུང་བཤད་དང་། དྲི་བ་དྲིས་ལན་གནང་ཡོད་འདུག

དེ་རྗེས་ས་གནས་ཀྱི་བོད་དོན་རྒྱབ་སྐྱོར་ཚོགས་པ་གསར་པ་ (BTSS) ཐོག་མར་གསར་འཛུགས་གནང་མཁན་སྐུ་ཞབས་ཨིན་རྡ་ར་པལ་སིངྒ་ཀོ་ལི་ (Indra Pal Singh Kohli) ལགས་དང་ལྷན་མཇལ་འཕྲད་གནང་ཞིང་། སྐབས་དེར་སྐུ་ཞབས་ཁོང་གིས་ཁོང་ཉིད་དེ་སྔ་ནས་བོད་མི་རྣམས་དང་ཧ་ཅང་འདྲིས་པོ་ཡོད་པ་མ་ཟད། བོད་དོན་ཐོག་རྒྱུན་དུ་ཐུགས་སྣང་གནང་གི་ཡོད་པའི་སྐོར་ངོ་སྤྲོད་གནང་བ་དང་། བོད་མི་མང་སྤྱི་འཐུས་ལྷན་ཚོགས་ཀྱི་བོད་དོན་ཞུ་སྐུལ་ཚོགས་ཆུང་ནས་སྐུ་ཞབས་ཁོང་ལ་བོད་དང་། བོད་དོན་སྐོར་ངོ་སྤྲོད་གནང་ཡོད་འདུག

གཞི་རྩའི་བོད་མི་མང་སྤྱི་འཐུས་ལྷན་ཚོགས་ཀྱི་བོད་དོན་ཞུ་སྐུལ་ཚོགས་ཆུང་འདིས་ཕྱི་ལོ་ ༢༠༢༣ ཟླ་ ༡༡ ཚེས་ ༢༠ ནས་ཉིན་གྲངས་ ༤ ཡི་རིང་ཨུ་ཏར་ཁན་ཌི་མངའ་སྡེའི་སྲིད་སྐྱོང་སྐུ་ཞབས་གྷུར་མིཊི་སིངྒ་ (Lt. Gen. Gurmit Singh, Governor of Uttarkhand) མཆོག་དང་། ཨུ་ཏར་ཁན་ཌི་མངའ་སྡེའི་སྤྱི་ཁྱབ་བློན་ཆེན་ཟུར་པ་དང་། མཱ་ཧཱ་ར་ཤི་ཌ་མངའ་སྡེའི་སྲིད་སྐྱོང་ཟུར་པ་སྐུ་ཞབས་བྷ་གྷ་ཏ་སིངྒ་ཀོ་ཤི་ཡ་རི་ (Shri. Bhagat Singn Koshyari) མཆོག སྡེ་ར་ལྡུན་གྲོང་ཁྱེར་གྱི་སྤྱི་ཁྱབ་སྐུ་ཞབས་སུ་ནིལ་ཨུ་ནི་ཡལ་ (Shri. Sunil Uniyal Gama, Mayor of Dehradun) མཆོག མངའ་སྡེའི་གྲོས་ཚོགས་འཐུས་མི་སྐུ་ཞབས་ཝི་ནུ་དི་ཆ་མོ་ལི་ (Shri.Vinod Chamoli, MLA Dehradun) མཆོག མངའ་སྡེའི་སྤྱི་ཁྱབ་དྲུང་ཆེ་སྐུ་ཞབས་སུག་བྷིར་སིངྒ་སན་དྷུ་ (Shri. Sukhbir Singh Sandhu) མཆོག མངའ་སྡེའི་ནང་སྲིད་དྲུང་འཕར་ལྕམ་སྐུ་ནི་ཝེ་དྷི་ཊ་ཀུ་ཀི་རེ་ཊི་ཀུ་མར་ (Smt. Nivedita Kukreti Kumar) མཆོག རྒྱ་གར་བོད་དོན་རྒྱབ་སྐྱོར་ཚོགས་པ་ (Bharat-Tibet Samanvay Sangh) ཞེས་པའི་རྒྱལ་ཡོངས་ཚོགས་གཙོ་སློབ་དཔོན་པི་ཌི་ཇུ་ཡུལ་ (Prof. P. D Juyul) ལགས། སྡེ་ར་ལྡུན་ས་གནས་ཀྱི་ཚོགས་གཙོ་སྨན་པ་ཇི་རེ་ཤི་སིངྒ་ནི་གྷི་ (Dr. Giresh Singh Negi) ལགས་སོགས་དང་མཇལ་འཕྲད་ཀྱིས་བོད་དོན་ཞུ་སྐུལ་གནང་ཡོད་པ་དང་། དེ་བཞིན་མངའ་སྡེའི་གཞུང་གི་དྲྭ་རྒྱ་དང་། གཞུང་འབྲེལ་གསར་ཁང་དྷུར་དྷར་ཤན་ (Doordarshan) ནང་བོད་དོན་ཞུ་སྐུལ་སྐོར་གྱི་གསར་འགྱུར་འགོད་སྤེལ་གནང་ཐུབ་པ། གསར་འགོད་ལྷན་ཚོགས་བསྐོངས་ཏེ་ས་གནས་ཀྱི་ཧིན་རྡི་དང་། ཨིན་ཡིག་ཐོག་གི་གསར་འགྱུར་བརྒྱུད་ལམ་མི་འདྲ་བ་དྲུག་ཙམ་གྱི་ནང་བོད་དོན་ཞུ་སྐུལ་སྐོར་གྱི་གསར་འགྱུར་འགོད་སྤེལ་བྱས་ནས་བོད་དོན་སྐོར་ལ་དྲིལ་བསྒྲགས་རྒྱ་གང་ཆེ་གནང་ཡོད་པ་དང་། མུ་མཐུད་རྒྱ་གར་ཨུ་ཏར་པར་དེ་ཤི་མངའ་སྡེའི་ནང་བོད་དོན་ཞུ་སྐུལ་གནང་རྒྱུ་ཡིན་པ་བཅས། །