༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱིས་རྒྱ་གར་མངའ་སྡེ་ཁག་ནང་མངའ་སྡེ་སོ་སོའི་སྲིད་སྐྱོང་དང་། གྲོས་ཚོགས་ཀྱི་ཚོགས་གཙོ། སྤྱི་ཁྱབ་བློན་ཆེན། དབུས་དང་མངའ་སྡེའི་བློན་ཆེན་ཁག གྲོས་ཚོགས་འཐུས་མི་རྣམ་པ། བོད་དོན་རྒྱབ་སྐྱོར་ཚོགས་པ་ཁག རྒྱ་གར་མང་ཚོགས་བཅས་ལ་བོད་ཀྱི་དངོས་ཡོད་གནས་སྟངས་ངོ་སྤྲོད་དང་། བོད་དོན་ཞུ་སྐུལ་གནང་རྒྱུའི་ལས་རིམ་ཡོད་པ་ལྟར། བོད་མི་མང་སྤྱི་འཐུས་གསེར་རྟ་ཚུལ་ཁྲིམས་ལགས་དང་། སྤྱི་འཐུས་ལྷ་རྒྱ་རི་རྣམ་རྒྱལ་སྒྲོལ་དཀར་ལགས། སྤྱི་འཐུས་དཀོན་མཆོག་ཡང་འཕེལ་ལགས། སྤྱི་འཐུས་དགེ་བཤེས་ཨ་ཀྲོང་རིན་ཆེན་རྒྱལ་མཚན་ལགས་བཅས་ལས་གྲུབ་པའི་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་ཞིག་ཕྱི་ལོ་ ༢༠༢༣ ཟླ་ ༡༡ པའི་ཚེས་ ༢༥ ཟླ་ ༡༢ པའི་ཚེས་ ༡༠ བར་རྒྱ་གར་མངའ་སྡེ་པན་ཇབ་ (Punjab) དང་། ཧར་ཡ་ན་ (Haryana)  ལྡི་ལི་ (Delhi) བཅས་སུ་བོད་དོན་ཞུ་སྐུལ་གནང་རྒྱུའི་ཆེད་གཞུང་འབྲེལ་ཕྱོགས་ཕེབས་གནང་གཏན་ཁེལ་ཡོད།

དེ་ཡང་ཕྱི་ཟླ་ ༡༡ པའི་ཚེས་ ༢༦ ཉིན་སྤྱི་འཐུས་གསེར་རྟ་ཚུལ་ཁྲིམས་ལགས་བཞུགས་གནས་སྦིར་དང་། སྤྱི་འཐུས་ལྷ་རྒྱ་རི་རྣམ་རྒྱལ་སྒྲོལ་དཀར་ལགས་དང་། སྤྱི་འཐུས་དགེ་བཤེས་ཨ་ཀྲོང་རིན་ཆེན་རྒྱལ་མཚན་ལགས་རྣམ་གཉིས་བཞུགས་སྒར་རྡ་ས་བཅས་ནས་ཅན་དྷི་གྷར་ཕེབས་ཐོན་གནང་རྒྱུ་དང་། སྤྱི་འཐུས་དཀོན་མཆོག་ཡང་འཕེལ་ལགས་ཕྱི་ཚེས་ ༢༥ ཉིན་བཞུགས་གནས་སྦེལ་ཀོབ་ནས་ཕེབས་ཐོན་གནང་རྒྱུ། ཕྱི་ཚེས་ ༢༧ ནས་ཕྱི་ཟླ་ ༡༢ པའི་ཚེས་ ༢ བར་པན་ཇབ་དང་། ཧར་ཡ་ན་མངའ་སྡེའི་ནང་བོད་དོན་ཞུ་སྐུལ། ཕྱི་ཟླ་ ༡༢ པའི་ཚེས་ ༤ ནས་ ༩ བར་རྒྱལ་ས་ལྡི་ལིར་བོད་དོན་ཞུ་སྐུལ། ཕྱི་ཟླ་ ༡༢ པའི་ཚེས་ ༡༠ ཉིན་སྤྱི་འཐུས་རྣམ་པ་བཞུགས་གནས་སུ་ཕྱིར་ཕེབས་གནང་རྒྱུ་ཡིན་པ་བཅས། །