༄༅། །བོད་ཀྱི་སྲིད་བྱུས་ཉམས་ཞིབ་ཁང་དང་ཅུ་ལ་ལོང་ཀོན་གཙུག་ལག་སློབ་གཉེར་ཁང་གཉིས་ཟུང་སྦྲེལ་གྱིས་གོ་སྒྲིག་ཞུས་པའི་བོད་ཀྱི་ཁོར་ཡུག་ཚོགས་འདུ་ཐེངས་བཞི་པའི་སྐབས་བོད་ནི་ཨེ་ཤི་ཡའི་ཆུ་བོ་ཆེ་ཁག་གི་འབྱུང་ཁུངས་ཡིན་ཞེས་པའི་བརྗོད་གཞིའི་ཐོག་གླེང་མོལ་གནང་ཡོད་པ་རེད།

དེ་ཡང་སྐབས་དེར་ལྷོ་ཤར་ཨེ་ཤི་ཡའི་སྐུ་ཚབ་བདུན་གྱིས་བརྗོད་གཞི་མི་འདྲ་བའི་གསུམ་ཐོག་གསུང་བཤད་གནང་ཡོད་པ་དང་། གསུང་བཤད་པ་རྣམས་ནས་བོད་མཐོ་སྒང་གི་ས་ཁམས་ཆགས་ཚུལ་གྱི་གལ་གནད་དང་། གནད་དོན་དེའི་ཐོག་མི་མང་གི་གོ་རྟོགས་དང་མཉམ་ཞུགས་གནང་རྒྱུ་གལ་ཆེན་པོ་ཡིན་པ་གསལ་འདོན་གནང་ཡོད།ཚོགས་འདུའི་མཇུག་སྡོམ་མཛད་སྒོར་ཅུ་ལ་ལོང་ཀོན་གཙུག་ལག་སློབ་གཉེར་ཁང་གི་ངེས་སྟོན་པ་ཟུར་པ་སློབ་དཔོན་སུ་རི་ཅའི་འུན་ (Professor Surichai Wun) ལགས་ཀྱིས་ད་ཆ་ཆུའི་དཀའ་ངལ་འཕྲད་བཞིན་པ་དེ་དག་རྒྱལ་ཁབ་གཅིག་གི་ལས་འགན་མིན་པར་ཐུན་མོང་གིས་འགན་འཁུར་དགོས་སྐོར་ནན་བརྗོད་གནང་ཡོད།

དེ་བཞིན་སྤྱི་ཚོགས་ཞིབ་འཇུག་ཁང་གི་འབུམ་རམས་པ་སུ་རང་རུཊ་ (Dr. Surangrut Jumnianpol) ལགས་ཀྱིས་ཐའེ་ལེནྜ་དང་རྫ་ཆུའི་དཔེ་མཚོན་བཀོད་དེ། བོད་མཐོ་སྒང་དུ་ཚད་ལས་བརྒལ་བའི་གཏེར་ཁ་སྔོག་འདོན་བྱས་པའི་ཤུགས་རྐྱེན་དེ་གཤམ་འོག་ཏུ་ཆགས་པའི་རྒྱལ་ཁབ་ཁག་ལ་ཕོག་གི་ཡོད་སྐོར་གསལ་བཤད་གནང་རྗེས། ཉི་འོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་ཚོགས་འདུ་འདི་ནི་ལྷོ་ཤར་ཨེ་ཤི་ཡའི་རྒྱལ་ཁབ་ཚང་མས་གཙང་པོའི་བདེ་འཇགས་དང་སྲུང་སྐྱོབ་ཆེད་མཉམ་ལས་བྱེད་དགོས་པའི་དྲན་སྐུལ་ཡིན་ཞེས་གསུངས་པ་མ་ཟད། གསུང་བཤད་པ་དང་གོ་སྒྲིག་ཚོགས་ཆུང་གི་ཚོགས་མི་རྣམས་ལ་བསྔགས་བརྗོད་ཞུས་ཡོད། 

མཐར་བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ་བདེ་ཆེན་དཔལ་མོ་ལགས་ཀྱིས་ཐུགས་རྗེ་ལེགས་འབུལ་གྱི་གསུང་བཤད་གནང་ཡོད་པ་བཅས།།