༄༅། །ཕྱི་ལོ་ ༢༠༢༣ ཟླ་བ་ ༡༡ ཚེས་ ༠༣ རེས་གཟའ་པ་སངས་ཉིན་བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་བུད་མེད་ནུས་སྟོབས་གོང་སྤེལ་ཚན་པའི་གོ་སྒྲིག་འོག་བཙན་བྱོལ་བོད་མིའི་སྤྱི་ཚོགས་ནང་བུད་མེད་ནུས་སྟོབས་གོང་སྤེལ་དང་མ་འོངས་མདུན་བསྐྱོད་གནང་ཕྱོགས་ཀྱི་ཚོགས་འདུ་དབུ་འཛུགས་གནང་ཡོད་པ་རེད།དེ་ཡང་ཚོགས་འདུ་དབུ་འབྱེད་མཛད་སྒོའི་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོོག་གིས་གསུང་བཤད་གནང་བའི་ནང་། ཚོགས་འདུ་དེ་བཞིན་སྐབས་ ༡༦ པའི་བཀའ་ཤག་གིས་ལས་འཁུར་ཞུས་རྗེས་བུད་མེད་ནུས་སྟོབས་གོང་སྤེལ་དང་འབྲེལ་བའི་བགྲོ་གླེང་ཚོགས་འདུ་ཐེངས་དང་པོ་དེ་ཆགས་ཀྱི་ཡོད་པ་དང་། བགྲོ་གླེང་ཚོགས་འདུ་འདིའི་ཐོག་ཕེབས་པ་ཡོངས་ཀྱིས་གོ་བསྡུར་ལྷུག་པོ་གནང་བ་བརྒྱུད། རང་རེའི་སྤྱི་ཚོགས་ཀྱི་གནས་བབ་དང་མཐུན་པའི་ལག་བསྟར་ཐུབ་པའི་དགོངས་ཚུལ་བསྡུ་རུབ་ཀྱིས་བོད་ཀྱི་བུད་མེད་ནུས་སྟོབས་གོང་སྤེལ་གྱི་སྲིད་བྱུས་ལ་བསྐྱར་ཞིབ་ཐད་དགོངས་འཆར་འབུལ་ཐུབ་ན་དགེ་མཚན་ཆེན་པོ་ཡོང་རྒྱུ་ཡིན་པ་གསུང་སོང་།

དེ་བཞིན་དཔལ་ལྡན་སྲིད་སྐྱོང་མཆོག་གིས། བོད་པའི་སྤྱི་ཚོགས་དེ་བཞིན་དེང་དུས་ཀྱི་སྤྱི་ཚོགས་དང་། དུས་དང་མཐུན་པའི་སྒོ་ནས་གོམ་པ་མདུན་སྤོ་བྱ་ཐུབ་པ་ཞིག་དགོས་རྒྱུ་གལ་ཆེན་པོ་ཡིན་པ་དང་། བཙན་བྱོལ་བོད་མིའི་སྤྱི་ཚོགས་ནང་ཕོ་མོ་སོགས་ཀྱི་དབྱེ་བ་གཞིར་བཞག་ཐོག་རྩུབ་སྤྱོད་དམ་དྲག་སྤེལ་བའི་གནས་སྟངས་རེ་བཟུང་ཡོང་གི་ཡོད་པ་དེ་དག་ཀྱང་རྩ་མེད་བཟོ་རྒྱུ་ཧ་ཅང་གི་གལ་ཆེན་པོ་ཡིན་སྐོར་གསུང་ཡོད་པ་རེད། དམིགས་བསལ་སྐུ་མགྲོན་ཨ་རིའི་རོགས་ཚོགས་ཀྱི་ལས་འཆར་དོ་དམ་པ་ལྕམ་པུ་ནམ་ལགས་ཀྱིས་ཀྱང་སྤྱི་ཚོགས་གང་འདྲ་ཞིག་ཡིན་རུང་གོམས་གཤིས་དང་སྲོལ་མི་འདྲ་བ་ཡོད་པ་དང་། དེ་དག་གི་ཁྲོད་རྟགས་སམ་མཚན་མའི་ཐོག་དབྱེ་བ་དེ་ཡང་མངོན་གསལ་དང་མངོན་གསལ་མེད་པའི་ཐོག་ནས་སྤྱི་ཚོགས་མང་ཆེ་བའི་གོམས་སྲོལ་ནང་ཡོད་པ་གསལ་པོ་ཡིན་སྟབས། བོད་པའི་སྤྱི་ཚོགས་ནང་ལའང་དེ་ལྟ་བུའི་གནད་དོན་ཐོག་གླེང་སློང་དང་བསམ་ཚུལ་བསྡུ་རུབ་བྱེད་པའི་ཚོགས་ཆེན་ནམ་འདུ་འཛོམས་འདི་ལྟ་བུ་གོ་སྒྲིག་གནང་ཐུབ་པར་བསྔགས་བརྗོད་གནང་ཡོད་པ་རེད།ཐེངས་འདིའི་ཚོགས་འདུ་འདི་བཞིན་ཕྱི་ཚེས་ ༣ ནས་འགོ་འཛུགས་ཀྱིས་ཉིན་གྲངས་གསུམ་རིང་འཚོགས་གནང་གི་འདུག ཚོགས་འདུ་འདིའི་ཐོག་བོད་མིའི་སྒྲིག་འཛུགས་ཀྱི་བུད་མེད་འགོ་ཁྲིད་དང་། གཞི་རིམ་མི་མང་གི་བུད་མེད་འགོ་ཁྲིད། བུད་མེད་དང་འཕྲོད་བསྟེན། བུད་མེད་དང་སེམས་ཁམས་འཕྲོད་བསྟེན། ཤེས་ཡོན་དང་ཕོ་མོའི་སྐོར། ཁྲིམས་དང་ཕོ་མོའི་སྐོར། བུད་མེད་ལ་འཚེ་བ་བཅས་བརྗོད་གཞི་ཁག་གི་ཐོག་བགྲོ་གླེང་གནང་གི་ཡོད་པ་རེད།བོད་མིའི་སྒྲིག་འཛུགས་ཀྱི་ལས་ཁུངས་ཁག་གི་དྲུང་ཆེ་རྣམ་པ་ཚོགས་ཆེན་དབུ་འབྱེད་ཀྱི་མཛད་སྒོར་ཕེབས་བཞུགས་གནང་ཡོད་པ་དང་། བོད་མིའི་སྒྲིག་འཛུགས་ཀྱི་ལས་ཁུངས་ཁག་གི་ནང་རྩུབ་སྤྱོད་འགོ་ཐབས་ཀྱི་ཚོགས་ཆུང་གི་ཚོགས་མི་དང་། གཞུང་ཁོངས་མ་ཡིན་པའི་ཚོགས་པ་ཁག་གི་སྐུ་ཚབ་སོགས་ཁྱོན་མི་གྲངས་ ༦༤ ལྷག་མཉམ་བཞུགས་གནང་གི་ཡོད་པ་རེད། །