༄༅། །ཕྱི་ལོ་ ༢༠༢༣ ཟླ་བ་ ༡༡ ཚེས་ ༡༩ ཉིན་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་ནིའུ་ཛི་ལེནྚ་གྱི་གྲོང་ཁྱེར་ཝེ་ལིང་ཀྲོན་དུ་ཕེབས་འབྱོར་སྐབས་ས་གནས་བོད་དོན་རྒྱབ་སྐྱོར་ཚོགས་པའི་ལས་བྱེད་རོ་བིན་གི་རིན་བག་ (Robin Greenberg) ལགས་ཀྱིས་ཕེབས་བསུ་ཞུས་ཡོད།

དེ་ནས་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་ཝེ་ལིང་ཀྲོན་དུ་རྟེན་གཞི་བྱས་པའི་བོད་དོན་རྒྱབ་སྐྱོར་བ་རྣམས་ནས་བོད་དོན་ལ་རྒྱབ་སྐྱོར་མུ་མཐུད་གནང་བར་ཐུགས་རྗེ་ལེགས་འབུལ་དང་སྦྲགས། བོད་ནང་གི་ཛ་དྲག་གནས་སྟངས་སྤྱི་དང་། བྱེ་བྲག་ཏུ་རྒྱ་གཞུང་གིས་བོད་ཀྱི་ཆོས་དང་རིག་གཞུང་རྩ་མེད་གཏོང་བཞིན་པའི་གནས་སྟངས། དེ་བཞིན་དབུ་མའི་ལམ་གྱི་སྲིད་བྱུས། བོད་རྒྱའི་དཀའ་རྙོག་སོགས་ཀྱི་སྐོར་སྙན་སེང་ཞུས་ཡོད།

ཕྱི་ཚེས་ ༢༠ ཉིན་ཕྱི་དྲིལ་བཀའ་བློན་མཆོག་གིས་ཨེ་ཤི་ཡ་དང་ཞི་བདེ་རྒྱ་མཚོ་མངའ་ཁུལ་གྱི་བདེ་འཇགས་གསར་གཏོད་གླེང་སྟེགས་སུ་ (Soft Power Statecraft) ཞེས་པའི་བརྗོད་གཞིའི་ཐོག་གསུང་བཤད་དང་། ཕྱི་ཚེས་ ༢༡ ཉིན་ནིའུ་ཛི་ལེནྚ་གནས་སྡོད་བོད་རིགས་མང་ཚོགས་དང་མཇལ་འཕྲད་གནང་རྒྱུ་ཡིན་པ་རེད།

ཕྱི་དྲིལ་བཀའ་བློན་མཆོག་དང་ལྷན་དུ་ཨོསྟྲེ་ལི་ཡཱའི་སྐུ་ཚབ་དོན་གཅོད་ཀརྨ་སེངྒེ་ལགས་ལྷན་བཅར་ཞུས་ཡོད་པ་བཅས།།