༄༅། །བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་ཨོསྟྲེ་ལི་ཡཱ་དང་ནིའུ་ཛི་ལེནྜ་རྒྱལ་ཁབ་ནང་དུ་བདུན་ཕྲག་གཅིག་ཙམ་གྱི་གཞུང་འབྲེལ་མཛད་འཆར་ཡོད་པ་ལྟར། ཕྱི་ལོ་ ༢༠༢༣ ཟླ་བ་ ༡༡ ཚེས་ ༡༤ རེས་གཟའ་མིག་དམར་ཉིན་ཨོསྟྲེ་ལི་ཡཱའི་གྲོང་ཁྱེར་སིཊ་ནི་གནམ་ཐང་དུ་ཕེབས་འབྱོར་བྱུང་ཡོད། སྐབས་དེར་གནམ་ཐང་དུ་ཨོ་གླིང་སྐུ་ཚབ་དོན་གཅོད་ཀརྨ་སེང་གེ་ལགས་ཀྱིས་གཙོས་སིཌ་ནི་བོད་རིགས་མཐུན་ཚོགས་ཀྱི་རྒྱུན་ལས་རྣམ་པས་ཕེབས་བསུའི་སྣེ་ལེན་ཞུས་ཡོད་པ་རེད།ཕྱི་ཚེས་ ༡༥ རེས་གཟའ་ལྷག་པའི་ཉིན་ཕྱི་དྲིལ་བཀའ་བློན་མཆོག་གིས་ལོ་ཝི་བསྟི་གནས་ཁང་གི་ཉམས་ཞིབ་པ་བགྲེས་པ་རི་ཅཊ་མེག་གྲི་རི་གོར་ (Richard Mcgregor) ལགས་དང་། Bill Crews ཐེབས་རྩ་ཁང་དུ་ཆེད་ཕེབས་ཀྱིས་སྐུ་ཞབས་བྷིལ་ཀི་རུ་ལགས་སོ་སོར་མཇལ་འཕྲད་གནང་འདུག ཉིན་རྒྱབ་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གྲོང་ཁྱེར་ཁེན་བྷེ་རར་ཕེབས་འབྱོར་གྱིས་སྐུ་ཚབ་དོན་གཅོད་ཟུར་པ་ཁག་ཅིག་དང་ཁེན་བྷ་ར་བོད་རིགས་མཐུན་ཚོགས་ཀྱི་རྒྱུན་ལས་རྣམ་པ་དང་མཇལ་མོལ་གནང་འདུག་ཅིང་། སྐབས་དེར་ཕེབས་བསུའི་གསོལ་སྟོན་ཐོག་ཕྱི་དྲིལ་ལས་ཁུངས་ཀྱི་དྲུང་ཆེ་ཀརྨ་ཆོས་དབྱིངས་ལགས་དང་ཕྱི་དྲིལ་བོད་དོན་ཞུ་གཏུག་ཚན་པའི་ལས་བྱེད་ཚེ་བརྟན་སྒྲོལ་མ་ལགས་མཉམ་ཞུགས་གནང་འདུགཕྱི་ཚེས་ ༡༦ རེས་གཟའ་ཕུར་བུའི་ཉིན་ཕྱི་དྲིལ་བཀའ་བློན་མཆོག་གིས་ཨོསྟྲེ་ལི་ཡཱའི་ཕྱི་སྲིད་ལས་དོན་དང་འབྲེལ་བའི་ཕྱོགས་འགལ་ཚོགས་པའི་བློན་ཆེན་སྐུ་ཞབས་སི་མོན་བྷིར་མིང་གྷམ་ (Simon Brimingham) ལགས་དང་། ཨོ་གླིང་གྲོས་ཚོགས་འཐུས་མི་སྐུ་ཞབས་པི་ཊར་ཁ་ལིལ་ (Peter Khalil) ལགས་སོ་སོར་མཇལ་འཕྲད་ཀྱི་བོད་དོན་སྐོར་བཀའ་མོལ་ལྷུག་པོ་གནང་ཡོད། ལྷག་པར་ཨོསྟྲེ་ལི་ཡཱའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པས་གོ་སྒྲིག་ཞུས་པའི་ (Tibet Briefing) ཞེས་བོད་དོན་ངོ་སྤྲོད་ཀྱི་གསུང་བཤད་ལས་རིམ་ཐོག་ཕེབས་ཞུགས་ཀྱིས་བོད་ནང་གི་ཛ་དྲག་གནས་སྟངས་དང་། བོད་རྒྱ་འབྲེལ་མོལ་གྱི་གནས་བབ་སྐོར་གསུང་འདུག ལས་རིམ་འདིའི་ཐོག་ཨོསྟྲེ་ལི་ཡཱའི་གྲོས་ཚོགས་འོག་མའི་ཚོགས་གཞོན་ལྕམ་སྐུ་ཤཱ་རོན་(Sharon Claydon) ལགས་དང། ཨོ་གླིང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཟུང་འབྲེལ་ཚོགས་གཙོ་ལྕམ་སྐུ་སུ་སན་ཊམ་པལ་མན་ (Susan Templeman) ལགས། གྲོས་ཚོགས་འཐུས་མི་སྐུ་ཞབས་ Dean Smith ལགས། གྲོས་ཚོགས་འཐུས་མི་ལྕམ་སྐུ་ཇེ་ནིཊ་རེ་སི་ (Janet Rice) ལགས་སོགས་ཆབ་སྲིད་ཚོགས་པ་འདྲ་མིན་གྱི་གྲོས་ཚོགས་འཐུས་མི་རྣམ་པ་ལྷན་ཞུགས་གནང་འདུགཐེངས་འདིར་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་ཨོ་གླིང་རྒྱལ་ཁབ་ནང་གཞུང་འབྲེལ་འཚམས་གཟིགས་འདི་བཞིན་བཀའ་བློན་གྱི་ལས་འཁུར་བཞེས་ནས་ཡུལ་དེའི་ནང་འཚམས་གཟིགས་གནང་བ་ཆེས་ཐོག་མ་དེ་ཆགས་ཀྱི་ཡོད་པ་རེད།།