༄༅། །ཕྱི་ལོ་ ༢༠༢༣ ཟླ་བ་ ༡༡ ཚེས་ ༢༩ སྔ་དྲོ་ཨོསྟྲི་ཡཱ་རྒྱལ་ཡོངས་གསར་ཁང་ (ORF Austrian Radio/Television) དང་། (International Desk And Asian Politics Of Der Standar) དེ་བཞིན་གསར་འགོད་པ་ (Saransh SEHGAL)  བཅས་བརྒྱུད་ལམ་ཁག་གསུམ་ལ་བཅར་འདྲི་དང་ལེན་གནང་བ་དང་། ཉིན་རྒྱབ་བོད་དོན་རྒྱབ་སྐྱོོར་ཚོགས་པ་ (Save Tibet) ཞེས་པའི་ཚོགས་གཙོ་ (Madeleine PETROVIV) ལགས་དང་། ཚོགས་གཅོ་ཟུར་པ་ (Amala ZIMMERMANN) ལགས། ཚོགས་མི་ (Karl LEITNIER) ལགས་དང་མཇལ་འཕྲད་ཀྱིས་ཁོང་རྣམས་ནས་ཡུན་རིང་རྒྱབ་སྐྱོར་གནང་བར་ཐུགས་རྗེ་ཆེ་གསུང་། དེའི་རྗེས་བོད་རིགས་ཚོགས་པའི་རྒྱུན་ལས་ལྷན་དུ་ཚོགས་མོལ་དང་། དེ་བཞིན་དང་བླངས་བོད་དོན་ཞུ་གཏུག་ལས་འགུལ་གྱི་གཞོན་སྐྱེས་ཚོགས་མི་ཟུར་དུ་མཇལ་མོལ་གནང་། ཕྱི་དྲོ་རང་རིགས་མང་ཚོགས་མཇལ་འཕྲད་དང་གསུང་བཤད་གནང་། དེའང་དཔལ་ལྡན་སྲིད་སྐྱོང་མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་རྗེས་དྲན་དང་བཀའ་དྲིན་བསམ་ཤེས་ཀྱིས་མགོན་པོ་མཆོག་གི་བཀའ་དགོངས་བཞིན་གྲུབ་དགོས་པ་དང་བཀའ་ཤག་གིས་དེ་ལྟར་གྲུབ་བཞིན་ཡོད་སྐོར། བོད་ནང་གི་ཛ་དྲག་གནས་སྟངས། བོད་ཀྱི་རྒྱལ་རབ་ལོ་རྒྱུས་སྙིང་བསྡུས་ཤིག་ངོ་སྤྲོད་དང་འབྲེལ་གཞོན་སྐྱེས་རྣམས་ནས་བོད་ཀྱི་ལོ་རྒྱུས་དང་བོད་སྐོར་ཤེས་རྟོག་དང་དེ་ལུགས་རྒྱལ་ཁབ་གཞན་གྱི་མི་སྣར་འགྲེལ་བརྗོད་གནང་རྒྱུ་གལ་ཆེན་པོ་ཡིན་པ། བོད་ཀྱི་ཆོས་རིག་དང་སྐད་ཡིག་གལ་གནད་ཆེ་བའི་སྐོར། དང་བླངས་བོད་དོན་ཞུ་གཏུག་ལས་འགུལ་གྱི་སྒྲོམ་གཞི་དང་སྡིངས་ཆ་གསར་འཛུགས་གནང་ཡོད་པར་གཞོན་སྐྱེས་རྣམས་ལས་འགུལ་ནང་མཉམ་ཞུགས་དགོས་ངེས་དང་། དེ་བཞིན་བོད་མིའི་མི་འབོར་དང་། བོད་ནས་གསར་དུ་ཕེབས་མཁན་ཉུང་དུ་འགྲོ་བཞིན་པའི་སྐོར་བཅས་གསུང་། སྐབས་དེར་དང་བླངས་ཞུ་གཏུག་ལས་འགུལ་གྱི་ཚོགས་མི་རྣམས་ནས་མང་ཚོགས་ལ། ཉེ་སྔོན་བཞུགས་སྒར་དུ་ཕེབས་མཁན་ཨོ་སི་ཊེ་རི་ཡ་གྲོས་ཚོགས་འཐུས་མི་ (Dolores Bakos) མཆོག་ནས་རྒྱ་ནག་གཞུང་གིས་བོད་ནང་འགྲོ་བ་མིའི་ཐོབ་ཐང་བརྩི་མེད་རྡོག་རོལ་གཏོང་བཞིན་པར་སྐྱོན་བརྗོད་དང་བོད་མིའི་འཐབ་རྩོད་ལ་རྒྱབ་སྐྱོར་ཡོད་སྐོར། དེ་བཞིན་རྒྱལ་སྤྱིའི་མང་ཚོགས་ནས་ཀྱང་རྒྱབ་སྐྱོར་གནང་དགོས་སྐོར་ཨོ་སི་ཊེ་རི་ཡ་གྲོས་ཚོགས་ནང་གསུང་བཤད་གནང་ཡོད་པར་མཁྱེན་རྟོགས་སླད་གསལ་བསྒྲགས་གནང་།

དེ་བཞིན་ཁོང་རྣམས་ནས་འབྱུང་འགྱུར་ལས་དོན་ཤུགས་ཆེ་རུ་གཏོང་རྒྱུ་ཡིན་པར་དང་བླངས་ཞུ་གཏུག་ལས་འགུལ་ནང་མཉམ་ཞུགས་གནང་རྒྱུར་འབོད་བསྐུལ་ཞུས། དེའི་རྗེས་དཔལ་ལྡན་སྲིད་སྐྱོང་མཆོག་ནས་མང་ཚོགས་ཁྲོད་ནས་དྲི་བ་གནང་བར་ལན་འདེབས་གསལ་བཤད་གནང་། 

དཔལ་ལྡན་སྲིད་སྐྱོང་མཆོག་སང་ཉིན་དགུང་ཝིཡི་ན་ནས་ཕ་རན་སི་རྒྱལ་ས་པེ་རི་སིར་ཕེབས་ཐོན་གནང་རྒྱུ་བཅས། །