༄༅། །ཕྱི་ལོ་ ༢༠༢༣ ཟླ་བ་ ༡༡ ཚེས་ ༢༠ ནས་ ༢༣ བར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཁེ་ན་ཊའི་རྒྱལ་ས་ཨོ་ཊ་ཝར་ཁེ་ན་ཊའི་གྲོས་ཚོགས་འཐུས་མི་དང་། གཞུང་འབྲེལ་གནད་ཡོད་མི་སྣ། བསམ་མཛོད་བསྟི་གནས་ཁང་གི་མི་སྣ། ས་གནས་བོད་མི་དང་མཇལ་འཕྲད་གནང་ཡོད་པ་མ་ཟད་གསར་འགོད་པའི་བཅར་འདྲི་ཁག་ལ་ལན་འདེབས་གནང་ཡོད་པ་རེད།
དེ་ཡང་དཔལ་ལྡན་སྲིད་སྐྱོང་མཆོག་གིས་ཁེ་ན་ཊ་གཞུང་གི་བློན་ཆེན་ཨ་རིབ་ཝི་ར་ནི་ (Arif Virani) ལགས་དང་། བློན་ཆེན་ཊོ་མི་ནིག་ལི་བེ་ལེག་ (Dominic LeBlanc) ལགས། བློན་ཆེན་ཀ་མལ་ཁེ་ར་ (Kamal Khera) ལགས། བློན་ཆེན་གྷེ་རེ་ཨ་ནནྡ་སང་ག་རེ་ (Gary Anandasangaree) ལགས། དེ་བཞིན་གྲོས་ཚོགས་འཐུས་མི་གྲངས་ ༣༢ ལྷན་མཇལ་མོལ་གྱིས་བོད་དོན་འཐབ་རྩོད་དང་། བོད་ནང་གི་ཛ་དྲག་གནས་སྟངས། ཁེ་ན་ཊ་གཞུང་ངོས་ནས་བོད་དོན་ལ་རྒྱབ་སྐྱོར་གནང་ཕྱོགས་སོགས་ཀྱི་སྐོར་གྲོས་བསྡུར་གནང་ཡོད།
ཕྱི་ལོ་ ༢༠༢༣ ཟླ་བ་ ༡༡ ཚེས་ ༢༢ ཉིན་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ཁེ་ན་ཊའི་གྲོས་ཚོགས་ནང་ཕེབས་བསུ་ཞུས་ཤིང་། སྐབས་དེར་གྲོས་ཚོགས་ཀྱི་ཚོགས་གཙོ་སྐུ་ཞབས་གྷེ་རེག་ཕར་གུ་སི་ (Greg Fergus) མཆོག་དབུ་བཞུགས་ཐོག་གྲོས་ཚོགས་འཐུས་མི་ཇེམ་སི་མ་ལོ་ནི་ (James Maloney) ལགས་ཀྱིས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གྲོས་ཚོགས་སུ་ཕེབས་བསུ་ཞུས་ཡོད། དེ་བཞིན་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཁེ་ན་ཊའི་གྲོས་ཚོགས་ཀྱི་ཚོགས་གཙོ་སྐུ་ཞབས་གྷེ་རེག་ལགས་སུ་ཟུར་དུ་མཇལ་ཏེ་ཁོང་ཉིད་ལ་འཚམས་འདྲི་དང་སྦྲགས། བོད་ནང་གི་ཛ་དྲག་དཀའ་ངལ་སྐོར་སྙན་སེང་ཞུས་ཡོད།
གཞན་ཡང་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཁེ་ན་ཊའི་ཕྱི་སྲིད་ལྷན་ཁང་གི་གནད་ཡོད་ལས་བྱེད་དང་མཇལ་འཕྲད་གནང་སྟེ་རྒྱ་ནག་གཞུང་གི་སྟངས་འཛིན་འོག་ཡོད་པའི་མི་སེར་སྤེལ་ཡུལ་གཏན་འཇགས་སློབ་གྲྭ་ཁག་ཏུ་བོད་ཕྲུག་བཙན་འཇུག་བྱེད་བཞིན་པའི་ཛ་དྲག་གནས་ཚུལ་དང་། བོད་མིའི་ཆོས་དད་རང་དབང་ལ་རྡོག་རོལ་གཏོང་བཞིན་པའི་སྐོར་སྙན་སེང་ཞུ་སྐུལ་གནང་ཡོད་པ་རེད།
བོད་དོན་ཞུ་གཏུག་དང་ཆབས་ཅིག་དཔལ་ལྡན་སྲིད་སྐྱོང་མཆོག་གིས་ས་གནས་བོད་མི་རྣམས་དང་མཇལ་འཕྲད་ཀྱིས་བོད་མིའི་སྒྲིག་འཛུགས་ངོས་ནས་རྒྱལ་སྤྱིའི་སྡིངས་ཆའི་སྟེང་དུ་བོད་དོན་ཞུ་གཏུག་གི་ལས་གཞི་སྤེལ་བཞིན་པའི་སྐོར་དང་། ཕྱི་རྒྱལ་ཁག་ཏུ་གནས་པའི་བོད་མི་རྣམས་ནས་བོད་ཀྱི་ཆོས་དང་རིག་གཞུང་མི་ཉམས་རྒྱུན་འཛིན་གནང་གལ་སྐོར་གསུང་བཤད་གནང་།
ཕྱི་ཚེས་ ༢༣ ཉིན་དཔལ་ལྡན་སྲིད་སྐྱོང་མཆོག་གིས་གྲོས་ཚོགས་འཐུས་མི་ཇེམ་སི་མ་ལོ་ནི་ (James Maloney) ལགས་དང་། གྲོས་ཚོགས་འཐུས་མི་ཇོན་མེག་ཀེ་ (John McKay) ལགས། གྲོས་ཚོགས་འཐུས་མི་ཨི་སི་ཀོཊ་ཨན་ཊར་སོན་ (Scott Anderson) ལགས། གྲོས་ཚོགས་འཐུས་མི་ཇུ་ཊི་སག་རོ་ (Judy Sgro) ལགས། གྲོས་ཚོགས་འཐུས་མི་ཨ་ནི་ཊ་ (Anita Vandenbeld) ལགས། གྲོས་ཚོགས་འཐུས་མི་ཇུ་ལི་ཝིག་ནོ་ (Julie Vignola) ལགས་ལྷན་དུ་ཉིན་གུང་གསོལ་ཚིགས་མཉམ་དུ་མཆོད་རྗེས་ཨོ་ཊ་ཝ་ཁུལ་གྱི་མཛད་འཆར་ཁག་ལེགས་པར་མཇུག་སྒྲིལ་ཡོད་པ་བཅས།། 
