༄༅། །ཕྱི་ལོ་ ༢༠༢༣ ཟླ་བ་ ༡༡ ཚེས་ ༢༢ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ཁེ་ན་ཊའི་གྲོས་ཚོགས་ནང་ཕེབས་བསུ་ཞུས་ཡོད་པ་རེད།

དེ་ཡང་དེང་སྐབས་དཔལ་ལྡན་སྲིད་སྐྱོང་མཆོག་ཁེ་ན་ཊའི་ནང་དུ་གཞུང་འབྲེལ་ཕྱོགས་ཕེབས་གནང་བཞིན་པ་དང་བསྟུན་གྲོས་ཚོགས་ཀྱི་ཚོགས་གཙོ་སྐུ་ཞབས་གྷེ་རེག་ཕར་གུ་སི་(Greg Fergus)མཆོག་དབུ་བཞུགས་ཐོག་གྲོས་ཚོགས་འཐུས་མི་ཇེམ་སི་མ་ལོ་ནི་ (James Maloney) ལགས་ཀྱིས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ཁེ་ན་ཊའི་གྲོས་ཚོགས་སུ་ཕེབས་བསུ་ཞུས་ཡོད། སྐབས་དེར་ཁོང་གིས་སྲིད་སྐྱོང་མཆོག་ནི་འཛམ་གླིང་ཁྱོན་ཡོངས་ཀྱི་བོད་མིའི་སྐུ་ཚབ་ཡིན་ཞེས་ནན་བརྗོད་དང་བཅས་གྲོས་ཚོགས་འཐུས་མི་རྣམས་ལ་ཁེ་ན་ཊའི་ནང་གནས་སྡོད་མིའི་ཁྱད་དུ་འཕགས་པའི་ཆོས་དང་རིག་གཞུང་སྐོར་སྙན་སེང་དང་། ཁེ་ན་ཊའི་ས་གནས་ཨི་ཊོ་བི་ཀོག་ (Etobicoke Lakeshore) ཏུ་ཡོད་པའི་གངས་ལྗོངས་ཆོས་ལྡན་གླིང་གི་དམིགས་ཡུལ་གཙོ་བོ་བོད་ཀྱི་ཆོས་དང་རིག་གཞུང་མི་ཉམས་རྒྱུན་འཛིན་གནང་རྒྱུ་ཡིན་སྐོར་གསལ་བཤད་གནང་ཡོད།

དེ་བཞིན་མུ་མཐུད་ཁོང་གིས་འཚེ་བ་མེད་པ་དང་ཞི་བདེ་ནི་འགྲོ་བ་མི་རིགས་ཡོངས་ཀྱི་མངོན་འདོད་ཡིན་པ་དང་། དཔལ་ལྡན་སྲིད་སྐྱོང་མཆོག་གིས་དེའི་ཚབ་མཚོན་ཐུབ་པ་ཡིན་ཞེས་གསུངས་པ་དང་འབྲེལ། སྲིད་སྐྱོང་སྤེན་པ་ཚེ་རིང་མཆོག་གི་བོད་དོན་འཐབ་རྩོད་ཆེད་སྐུ་ལས་སྐྱོན་བཞིན་པར་བསྔགས་བརྗོད་དང་། ཁོང་རང་ཉིད་ནས་ཀྱང་བོད་དོན་ལ་རྒྱབ་སྐྱོར་མུ་མཐུད་གནང་རྒྱུའི་ཞལ་བཞེས་གནང་ཡོད་པ་བཅས།།