༄༅། །འདི་གར་ཐའེ་ཝན་བོད་ཀྱི་སྐུ་ཚབ་དོན་གཅོ
སྐབས་དེར་ཐའེ་ཝན་བོད་ཀྱི་སྐུ་ཚབ་དོན་གཅོད་ལས་ཁུངས་ཀྱི་སྐུ་ཚབ་དོན་གཅོད་དབུ་པའི་ལས་བྱེད་རྣམ་པ་དང་། གཞན་ཡང་ཐའེ་ཝན་གནས་བཞུགས་སེར་སྐྱ་མི་མང་ནས་མཉམ་ཞུགས་ཀྱིས་མ་ཎི་ཡིག་དྲུག་དང་། སྒྲོལ་མ་རྒྱས་པ། འཁྲུངས་ལྷ་ཨ་མྱེས་སྐྱེས་རིག་གསོལ་མཆོད་བཅས་སྒྲུབ་གསོག་ཞུས་ཐུབ་པ་བྱུང་ཡོད།
ཞབས་རིམ་གྱི་མཇུག་བསྡོམས་གཏམ་བཤད་ཐོག་ཐའེ་ཝན་བོད་ཀྱི་སྐུ་ཚབ་དོན་གཅོད་ཀྱིས་ཉེ་ལམ་ཐའེ་ཝན་མང་གཙོ་ཐབས་རྩེའི་འགན་འཛིན་དང་། སློབ་སྟོན་པ། འབྲེལ་ཡོད་ལས་འཆར་ཉམས་ཞིབ་འགན་འཛིན་གཞོན་པ་བཅས་དང་ལྷན་དུ་རྡ་སར་གཞུང་འབྲེལ་འཚམས་གཟིགས་སྐབས་སུ་སྤྱི་ནོར་༸གོང་ས་༸སྐྱབས་མགོན་ཆེན་མཆོག་ལ་མཇལ་བཅར་དང་བོད་མིའི་སྒྲིག་འཛུགས། གཞུང་དང་གཞུང་ཁོངས་མིན་པའི་ཚོགས་པ་ཁག བོད་ཁྱིམ་སློབ་གྲྭ་སོགས་ལ་འཚམས་གཟིགས་ལེགས་གྲུབ་བྱུང་བའི་སྐོར་དང་འབྲེལ་སྐུ་ཚབ་དོན་གཅོད་ལས་ཁུངས་ནས་གོ་སྒྲིག་ཞུ་བཞིན་པའི་མ་འོངས་ལས་འཆར་ཁག་ངོ་སྤྲོད་དང་། ཐའེ་སྡོད་བོད་རིགས་ཚོགས་པ་ནས་ད་ཐེངས་ཞབས་རིམ་གོ་སྒྲིག་གནང་བ་རྗེས་སུ་ཡི་རང་དང་བསྔགས་བརྗོད་ཞུས།
དེ་ནས་ཐའེ་སྡོད་བོད་རིགས་ཚོགས་པའི་ཚོགས་གཙོ་བཀྲ་ཤིས་ཚེ་རིང་ལགས་ནས་ཞབས་རིམ་གསོག་སྒྲུབ་ཞུས་དགོས་པའི་དམིགས་ཡུལ་དང་༧རྒྱལ་བའི་སྐུ་ཕྱྭ། བོད་ཀྱི་བསྟན་སྲིད་བདེ་ཐབས། འཛམ་གླིང་ཞི་བདེ་སོགས་ཀྱི་ཆེད་དུ་མུ་མཐུད་ཞབས་རིམ་གསོག་སྒྲུབ་ཞུ་རྒྱུའི་འཆར་གཞི་ཡོད་སྐོར་གསུང་གནང་སོང་། ཞབས་རིམ་གྲུབ་རྗེས་ཐའེ་ཝན་སྐུ་ཚབ་དོན་གཅོད་དབུ་བཞུགས་ཐོག་ཐའེ་སྡོད་བོད་རིགས་ཚོགས་པའི་ཚོགས་གཙོ་དང་རྒྱུན་ལས་རྣམ་པ་བཅས་ལྷན་འཛོམས་ཀྱི་འབྱུང་འགྱུར་ཕྱི་ཟླ་ ༡༢ ཚེས་ ༡༠ ཉིན་སྤྱི་ནོར་༧གོང་ས་༧སྐྱབས་མགོན་༧རྒྱལ་བའི་དབང་པོ་སྐུ་ཕྲེང་བཅུ་བཞི་པ་ཆེན་པོ་མཆོག་ལ་ནོ་བྷེལ་ཞི་བདེའི་གཟེངས་རྟགས་འབུལ་བཞེས་བསྐྱངས་ཏེ་ལོ་ངོ་ ༣༤ འཁོར་བའི་དུས་ཆེན་དང་། ཐའེ་ཝན་བོད་ཀྱི་སྐུ་ཚབ་དོན་གཅོད་དབུ་བརྙེས་ནས་ལོ་ ༢༥ འཁོར་བའི་མཛད་སྒོ་སྲུང་བརྩི་ཞུ་ཕྱོགས་ཐད་ཚོགས་འདུ་ཚོགས་ཏེ་གོ་བསྡུར་ཞུས་ཡོད་པ་མ་ཟད། དགོང་མོ་རྒྱ་གར་གཞུང་ཚབ་ཁང་ནས་གོ་སྒྲིག་ཞུས་པའི་རྒྱ་གར་ལོ་གསར་གྱི་རྟེན་འབྲེལ་མཛད་སྒོ་ལའང་མཉམ་ཞུགས་ཞུས་ཡོད་བཅས།།
