༄༅། །ཕྱི་ལོ་ ༢༠༢༣ ཟླ་བ་ ༡༡ ཚེས་ ༡༩ ཉིན་བོད་སྐྱོབས་འབྲེལ་མཐུད་ཁང་དང་ཉི་འོང་སྐུ་ཚབ་དོན་གཅོད་ལས་ཁུངས་གཉིས་ཟུང་སྦྲེལ་འོག་རྒྱ་ནག་གཞུང་གིས་འདི་ལོའི་ཕྱི་ཟླ་ ༠༩ ནང་འདོན་སྤེལ་བྱས་པའི་ཆོས་ཕྱོགས་ཀྱི་བྱེད་སྒོར་སྟངས་འཛིན་བྱེད་པའི་བཀའ་ཁྱབ་ཨང་ ༡༩ ཞེས་པའི་སྐོར་ཉི་འོང་གི་རྒྱལ་ས་ཀྲོག་ཡོའི་ཤིན་ཇུ་ཀོ་འགྲེམས་སྟོན་ཁང་ (Shinjuku Historical Museum) དུ་བསྐོང་ཚོགས་གནང་ཡོད།

བགྲོ་གླེང་ཐོག་ཉི་འོང་གྲོས་ཚོགས་འཐུས་མི་མི་ཀྲུ་བ་ཡ་ཤི་ཧི་རོ་མི་ (Mitusbayashi Hiromi) ལགས་དང་མི་ཡ་ཝ་ཀི་ཇུན་ཀོ་ (Miyawaki Junko) ལགས། ཉི་འོང་དགེ་འདུན་ལྷན་ཚོགས་ཀྱི་ཚོགས་གཞོན་ཀོ་བ་ཡ་ཤི་ཤུ་ཧི་ (Kobayashi Shuei) ལགས། ལྷོ་སོག་མཐུན་ཚོགས་ཀྱི་སྤྱི་ཁྱབ་དྲུང་ཆེ་གུབ་རུབ་ཨར་ཅ་ (Govrud Archa) ལགས། ཉི་འོང་ཡུ་གུར་ཚོགས་པའི་ས་ཧུཊ་མོ་ཧ་མཊ་ (Sawut Mohamed) ལགས། ཉི་འོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ལྷན་ཞུགས་ཀྱིས་རྒྱ་ནག་གཞུང་གིས་གཏན་ལ་ཕབ་པའི་བཀའ་ཁྱབ་དེའི་ཉེན་ཚབས་སྐོར་བགྲོ་གླེང་གནང་ཡོད་པ་རེད། དེ་ཡང་བོད་སྐྱོབས་འབྲེལ་མཐུད་ཁང་གི་ཚོགས་གཙོ་མ་ཀི་ནོ་སི་ཤུ་ལགས་ཀྱིས་གསུང་བཤད་པ་དང་ཚོགས་བཅར་བ་རྣམས་ལ་ཕེབས་བསུ་དང་སྦྲགས། ཕྱི་ཟླ་དགུ་པའི་ནང་རྒྱ་ནག་གཞུང་གིས་ཆོས་ཕྱོགས་ཀྱི་བྱེད་སྒོར་དམ་བསྒྲགས་སྔར་ལྷག་གཏང་རྒྱུར་དམིགས་ཏེ་བཀའ་ཁྱབ་ཨང་ ༡༩ ཞེས་པའི་གཏན་འབེབས་ཁྱབ་བསྒྲགས་བྱས་ཡོད་སྐོར་དང་། རྒྱ་གཞུང་གིས་འཁྱོག་བཤད་ལོག་འགྲེལ་བརྒྱུད་དེ་བྱིས་པ་རྣམས་ལ་དམར་ཤོག་གི་ལྟ་བ་སློབ་སྤེལ་བྱེད་བཞིན་པ་སོགས་ཀྱི་སྐོར་གསུང་བཤད་གནང་།

ཉི་འོང་གྲོས་ཚོགས་འཐུས་མི་མི་ཀྲུ་བ་ཡ་ཤི་ཧི་རོ་མི་ལགས་ཀྱིས་ཁོང་གིས་ཤར་ཏུར་ཀིསྟན་མི་མང་དང་མཉམ་ལས་བྱེད་པའི་མྱོང་ཚོར་གསུངས་པ་དང་སྦྲགས། བོད་མི་དང་། ཡུ་གུར་བ། ལྷོ་སོག་མི་མང་རྣམས་ནས་རྒྱ་ནག་གཞུང་གི་སྡང་ཟུག་ཆེ་བའི་སྲིད་བྱུས་སྐོར་བགྲོ་གླེང་གནང་བཞིན་པར་དགའ་ཚོར་ཆེན་པོ་བྱུང་སྐོར་དང་། ཁོང་ཉིད་ཉི་འོང་གྲོས་ཚོགས་ཀྱི་རྒྱ་ནག་གི་འགྲོ་བ་མིའི་ཐོབ་ཐང་ལ་ལྟ་ཞིབ་བྱེད་པོའི་ཚོགས་ཆུང་གི་དྲུང་ཆེ་དང་། ཉི་འོང་གྲོས་ཚོགས་འཐུས་མིའི་ཡུ་གུར་བར་རྒྱབ་སྐྱོར་ཚོགས་ཆུང་གི་ཚོགས་མི་ཡིན་པའི་ཆ་ནས་སྲིད་བྱུང་དེའི་སྐོར་ཉི་འོང་གྲོས་ཚོགས་ནང་གླེང་སློང་གནང་རྒྱུ་ཡིན་པ་གསུངས་ཡོད། གཞན་ཡང་གསུང་བཤད་པ་གཞན་རྣམས་ནས་རྒྱ་ནག་གཞུང་གི་དྲག་གནོན་ཆེ་བའི་སྲིད་བྱུས་འོག་བོད་དང་། ལྷོ་སོག ཡུ་གུར་བ་སོགས་དཀའ་སྡུག་ཚད་མེད་མྱོང་བཞིན་པའི་གནས་སྟངས་ངོ་སྤྲོད་དང་། ཉི་འོང་དགེ་འདུན་ལྷན་ཚོགས་ཀྱི་དྲུང་ཆེས་བོད་བརྒྱུད་ནང་བསྟན་གྱི་སྤྲུལ་སྐུའི་ཡང་སྲིད་ངོས་འཛིན་གནང་ཕྱོགས་ཀྱི་གལ་གནད་དང་། ཆོས་དད་མེད་པའི་རྒྱ་ནག་དམར་ཤོག་གཞུང་གིས་བོད་ཀྱི་ཆོས་ཕྱོགས་ཀྱི་གནང་སྒོར་ཐེ་བྱུས་བྱེད་བཞིན་པའི་སྐོར་འགྲེལ་བརྗོད་གནང་།

ཉི་འོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་རྒྱ་ནག་གཞུང་གིས་ད་ལྟ་བར་དུ་ཆོས་དད་རང་དབང་རྡོག་རོལ་གཏོང་བཞིན་སླེབས་ཡོད་པ་དང་། ད་ཆ་བཀའ་ཁྱབ་ཨང་ ༡༩ ཞེས་པ་འདི་བརྒྱུད་ཆོས་དད་རང་དབང་རྡོག་རོལ་གཏོང་བཞིན་པ་དེ་ཁྲིམས་མཐུན་བཟོ་ཐབས་རྩོམ་གྱི་ཡོད་སྐོར་གསལ་བཤད་གནང་རྗེས་དྲི་བ་དྲིས་ལན་གནང་ཡོད། མཐར་བོད་སྐྱོབས་འབྲེལ་མཐུད་ཁང་གི་ཚོགས་གཙོ་མ་ཀི་ནོ་སི་ཤུ་ལགས་ཀྱིས་གསུང་བཤད་ལས་རིམ་མཇུག་བསྡུས་ཏེ་གྲོས་ཆོད་གཏན་འབེབས་གནང་། གྲོས་ཆོད་ནང་དུ། ང་ཚོས་ཚོགས་འདུ་འདི་བརྒྱུད་ཤེས་རྟོགས་བྱུང་བ་ལྟར་ན། རྒྱ་ནག་གི་བཀའ་ཁྱབ་ཨང་ ༡༩ འདི་ནི། རྒྱ་ནག་དང་རྒྱ་ནག་གིས་བཙན་བཟུང་བྱས་པའི་ས་ཁུལ་དུ་ཆོས་ཉམས་ལེན་བྱེད་མཁན་ཚོར་གནོད་འཚེ་ཅན་ཞིག་ཡིན་པ་ཙམ་དུ་མ་ཟད། རྒྱལ་སྤྱིའི་སྤྱི་ཚོགས་སྤྱི་ལའང་གནོད་འཚེ་ཅན་ཞིག་ཡིན། དེར་བརྟེན། བགྲོ་གླེང་འདིའི་གོ་སྒྲིག་པ་དང་ཚོགས་ཞུགས་པ་ཚོས་རྒྱ་ནག་གི་ཆོས་ལུགས་ཀྱི་སྒྲིག་སྲོལ་བཅུ་དགུ་པ་དེར་སྐྱོན་བརྗོད་བྱས་ཏེ། རྒྱ་ནག་གི་འགོ་ཁྲིད་ཚོར་ཆོས་ལུགས་ལ་སྐུར་འདེབས་བྱེད་པའི་སྒྲིག་སྲོལ་འདི་འཕྲལ་དུ་ཕྱིར་འཐེན་བྱེད་དགོས་པའི་རེ་སྐུལ་ཞུ་བཞིན་ཡོད། ང་ཚོས་ཉི་ཧོང་གི་མི་མང་དང་། ལྷ་ཁང་། ཡེ་ཤུའི་ལྷ་ཁང་། ཁ་ཆེའི་ལྷ་ཁང་། དེ་བཞིན་འཛམ་གླིང་ཁྱོན་ཡོངས་ཀྱི་ཆོས་ཕྱོགས་ཀྱི་སྒྲིག་འཛུགས་ཁག་ནས་རྒྱ་གཞུང་གིས་ཆོས་ལ་དམར་ཤོག་གི་ལྟ་བ་བསྲེས་ལྷད་གཏོང་བའི་འབད་རྩོལ་འདིར་སྐྱོན་བརྗོད་གནང་དགོས་པའི་འབོད་སྐུལ་ཞུ་མ་ཟད། ང་ཚོས་རྒྱ་ནག་གཞུང་ལའང་མི་མང་གི་ཆོས་ཕྱོགས་ཀྱི་བྱེད་སྒོར་ཐེ་བྱུས་མ་བྱེད་རོགས་ཞེས་རེ་སྐུལ་ཞུ་རྒྱུ་ཡིན། ཞེས་འཁོད་ཡོད་པ་བཅས།།