༄༅། །འདི་གར་ཆོས་རིག་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༡ ལོར་ཆོས་ཚོགས་བཅུ་གཅིག་པའི་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ལུང་རྟོགས་ཀྱི་བསྟན་པ་རིན་པོ་ཆེ་འཛིན་སྐྱོང་སྤེལ་གསུམ་གནང་ཕྱོགས་ཟབ་གསལ་ལམ་སྟོན་ཇི་སྙེད་ཕེབས་པ་དང་། ཆོས་རིག་ལས་ཁུངས་ནས་ ༢༠༡༣ ལོར་ཆོས་བརྒྱུད་རིས་མེད་དགོན་སྡེ་ཆེ་གྲས་ལྔ་བཅུའི་སྐོར་གྱི་སྐུ་ཚབ་གདན་ཞུས་ཀྱིས་བཤད་སྒྲུབ་བསྟན་པ་གོང་འཕེལ་ལྷན་ཚོགས་ཞེས་པ་བསྐོངས་ཚོགས་བགྱིས་ཏེ་བཀའ་བསྡུར་ཞིབ་ལྷུག་གནང་སྐབས་ཐག་གཅོད་གྲོས་ཆོད་གཏན་འབེབས་བྱུང་བ་བཞིན་ཚན་རིག་འཛིན་གྲྭ་མེད་པའི་ཆོས་སྡེ་ཁག་ལ་དམིགས་ཏེ་དེང་དུས་ཀྱི་ཚན་རིག་ངོ་སྤྲོད་ཟབ་སྦྱོང་ཞེས་བོད་ཀྱི་དཔེ་མཛོད་ཁང་དང་ཟུང་འབྲེལ་གྱིས་ལག་བསྟར་ཞུས་དང་ཞུ་མུས་ལྟར། དྷ་ས་བོད་ཀྱི་དཔེ་མཛོད་ཁང་དུ་ཕྱི་ལོ་ ༢༠༢༣ ཟླ་ ༡༡ ཚེས་ ༦ ནས་ ༡༧ བར་བདུན་ཕྲག་གཉིས་རིང་ཚན་རིག་འཛིན་གྲྭ་མེད་པའི་དགོན་སྡེ་ཁག་ནས་དགེ་བཙུན་གྲངས་བཅུ་བདུན་གདན་ཞུས་ཀྱིས་དེང་དུས་ཚན་རིག་གི་ཟབ་སྦྱོང་ཐེངས་བརྒྱད་པ་གོ་སྒྲིག་ཞུས་ཡོད།
ཕྱི་ལོ་ ༢༠༢༣ ཟླ་ ༡༡ ཚེས་ ༦ ཉིན་གྱི་སྔ་དྲོ་ཆུ་ཚོད་ ༡༠ ཐོག་དབུ་འབྱེད་མཛད་སྒོ་གནང་བ་དང་དེར་སྐུ་མགྲོན་གཙོ་བོ་ཆོས་རིག་ལས་ཁུངས་ཀྱི་དྲུང་འཕར་ཀུན་དགའ་རྒྱལ་མཚན་ལགས་ཕེབས་ཏེ་བཀའ་སློབ་ལམ་སྟོན་ཡང་གནང་། ཟབ་སྦྱོང་འདིར་སློབ་འཁྲིད་གནང་མཁན་བོད་ཀྱི་དཔེ་མཛོད་ཁང་གི་ཚན་རིག་སྡེ་ཚན་གྱི་དགེ་རྒན་བཞི་ཡོད། ད་ལན་ཟབ་སྦྱོང་ལ་མཉམ་ཞུགས་གནང་མཁན་ནི་དཔལ་སྤུངས་ཤེས་རབ་གླིང་ནས་དགེ་འདུན་པ་ ༡ དང་། བཙུན་དགོན་དགེ་ལྡན་ཆོས་གླིང་ནས་བཙུན་མ་ ༧། འབྲི་གུང་བྱང་ཆུབ་གླིང་ནས་དགེ་འདུན་པ་ ༢། ཟུར་མང་བཤད་གྲྭ་ནས་དགེ་འདུན་པ་ ༢། འབོ་དཀར་བཤད་གྲྭ་ནས་དགེ་འདུན་པ་ ༢། བཙུན་དགོན་སྒྲོལ་མ་གླིང་ནས་བཙུན་མ་ ༢། ཇོ་ནང་དུས་འཁོར་གྲྭ་ཚང་ནས་དགེ་འདུན་པ་ ༡། བཅས་ཁྱོན་དགེ་བཙུན་ ༡༧ བྱུང་ཡོད།
སྤྱིར་ཐེངས་འདིའི་ཟབ་སྦྱོང་ནང་མཉམ་བཞུགས་གནང་མཁན་དགེ་བཙུན་གྲངས་ ༢༧ འབྱོར་ཡོད་ནའང་དངོས་སུ་བཅར་ཐུབ་མཁན་ ༡༧ མ་གཏོགས་བྱུང་མེད་པ་བཅས།།
