༄༅། །འདི་གར་ཆོས་རིག་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༣ ཟླ་ ༡༡ ཚེས་ ༡༤ ནས་ ༡༧ བར་བོན་གཞིས་ཌོ་ལན་ཇིར་རྟེན་གཞི་བྱས་པའི་བཙུན་དགོན་རཏྣ་སྨན་གླིང་ནས་སྐབས་གཉིས་པའི་དགེ་བཤེས་མའི་མཛད་སྒོ་འཚོགས་ཡོད་ཅིང་། ཉིན་མཐའ་མའི་མཛད་སྒོར་ཆོས་རིག་ལས་ཁུངས་ཀྱི་དྲུང་འཕར་ཀུན་དགའ་རྒྱལ་མཚན་ལགས་མཛད་སྒོའི་སྐུ་མགྲོན་གཙོ་བོར་ཕེབས་ཡོད།

དེ་ཉིན་མཛད་སྒོའི་ཐོག་མར་སྔ་དྲོ་ཆུ་ཚོད་ ༡༠ ཐོག་སྐབས་གཉིས་པའི་བཀའ་རམས་པ་རྣམས་བཀྲ་ཤིས་དམ་བཅའ་ལ་བཞུགས་པ་དང་། ཕྱེད་ཡོལ་ཆུ་ཚོད་ ༡ཿ༣༠ ཐོག་༸སྐྱབས་རྗེ་སྨན་རིའི་དཔོན་སློབ་རིན་པོ་ཆེ་མཆོག་གིས་སྐབས་གཉིས་པའི་བཀའ་རམས་པ་རྣམས་ལ་དགེ་བའི་བཤེས་གཉེན་གྱི་མཚན་གནང་། དེ་ནས་ཞྭ་དཀར་བསྟན་པའི་གཙུག་རྒྱན་༸སྐྱབས་རྗེ་སྨན་རིའི་ཁྲི་འཛིན་རིན་པོ་ཆེ་མཆོག་གིས་སྐབས་གཉིས་པའི་བཀའ་རམས་པ་རྣམས་ལ་དགེ་བའི་བཤེས་གཉེན་གྱི་ཕྱག་འཁྱེར་གནང་། དེའི་རྗེས་སྐབས་གཉིས་པའི་བཀའ་རམས་པ་རྣམས་ཀྱིས་མཆོད་ཚིག་དང་བཀྲ་ཤིས་གསོལ།

དེ་ནས་མཛད་སྒོའི་སྐུ་མགྲོན་གཙོ་བོ་དྲུང་འཕར་ཀུན་དགའ་རྒྱལ་མཚན་ལགས་ནས་གསུང་བཤད་གནང་དོན། ཐོག་མར་མཛད་སྒོར་ཕེབས་པ་རྣམས་ལ་འཚམས་འདྲི་དང་། ལྷག་པར་དུ་དགེ་བཤེས་མའི་ཕྱག་འཁྱེར་བཞེས་མཁན་རྣམས་ལ་དམིགས་བསལ་བཀྲ་ཤིས་བདེ་ལེགས་ཀྱི་འཚམས་འདྲི་ཞུས། དེ་བཞིན་དགེ་བཤེས་མ་ཚོའི་ངོས་ནས་གསན་བསམ་སྒོམ་གསུམ་མུ་མཐུད་གནང་དགོས་པ་སོགས་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཆོས་ཚོགས་ཐེངས་ལྔ་པའི་ཐོག་བཀའ་སློབ་ཕེབས་དོན་བཞིན་དཔལ་གཤེན་བསྟན་སྨན་རིའི་གླིང་དང་བཙུན་དགོན་རཏྣ་སྨན་གླིང་གཉིས་ནས་གཞིས་མི་ཚོའི་ཆོས་ཀྱི་ཤེས་ཚད་ཡར་རྒྱས་གཏོང་ཐབས་ལ་ཐུགས་འགན་བཞེས་དགོས་པ། སྤྱི་ཡོངས་ནས་བོད་ཀྱི་སྐད་ཡིག་སྲུང་སྐྱོབ་གནང་དགོས་པའི་གསུང་བཤད་གནང་ཡོད།

དེ་ཉིན་མཛད་སྒོའི་ཐོག་བོད་མི་མང་སྤྱི་འཐུས་དགེ་བཤེས་ཨ་ཀྲོང་རིན་ཆེན་རྒྱལ་མཚན་ལགས་དང་། བོད་ཀྱི་བོན་པོ་ཚོགས་པའི་ཚོགས་གཞོན། བོན་གཞིས་ས་གནས་འགོ་འཛིན། བོན་གཞིས་སཾབྷོ་ཊའི་སློབ་སྤྱི། དེ་བཞིན་ཕྱོགས་མཐའ་ནས་ཕེབས་པའི་སྐུ་མགྲོན་ཁག་དང་། བོན་གཞིས་སཾབྷོ་ཊའི་དགེ་ལས་སློབ་དང་། གཞིས་མི། གློ་བུར་དུ་ལྷགས་པའི་མི་མང་བཅས་ཕེབས་ཡོད། །