༄༅། །འདི་གར་ཆོས་རིག་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༣ ཟླ་བ་ ༡༡ ཚེས་ ༢༧ ཉིན་གནས་མཆོག་རྡོ་རྗེ་གདན་དུ་བཙུན་མའི་འཇང་དགུན་ཆོས་ཀྱི་མཇུག་བསྡོམས་མཛད་སྒོ་དང་། སྐབས་ ༦ པའི་དགེ་བཤེས་མའི་བསླབ་པ་མཐར་སོན་པའི་མཛད་སྒོ་འཚོགས་ཡོད།
དེ་ཡང་གོང་ཚེས་ཉིན་གྱི་སྔ་དྲོ་མཛད་སྒོར་སྐུ་མགྲོན་གཙོ་བོ་རྡོར་གདན་རྒྱལ་སྤྱིའི་ནང་པའི་ཆོས་ཚོགས་ཀྱི་ཚོགས་གཙོ་ངག་དབང་བསྟན་འཛིན་ལགས་དང་། དམིགས་བསལ་སྐུ་མགྲོན་བཀའ་བརྒྱུད་སྨོན་ལམ་ཆེན་མོའི་སྤྱི་ཁྱབ་འགན་འཛིན་རྒན་ཀརྨ་ཆོས་གྲགས་རྒྱ་མཚོ་ལགས། བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་དྲུང་འཕར་ཀུན་དགའ་རྒྱལ་མཚན་ལགས། བོད་ཀྱི་བཙུན་མའི་ལས་འཆར་ཁང་གི་ངེས་སྟོན་པ་སྣང་ས་ཆོས་སྒྲོན་ལགས། སྐབས་གཉིས་པའི་དགེ་བཤེས་མའི་རྒྱུགས་སྤྲོད་དོ་དམ་ལྷན་ཚོགས་ཀྱི་ཚོགས་གཙོ་སྒྲོལ་མ་གླིང་གི་སློབ་སྤྱི་ངག་དབང་བསྟན་འཛིན་ལགས་བཅས་ཕེབས་ཡོད།
མཛད་སྒོའི་ཐོག་མར་སྔ་དྲོ་ཆུ་ཚོད་ ༩:༠༠ ཐོག་དབུ་མཛད་ནས་འདོན་པ་དབུ་སྐུལ་དང་རྟེན་འབྲེལ་གསོལ་ཇ་དང་འབྲས་སིལ་འདེགས་འབུལ་ཞུས། དེ་ནས་རྡོར་གདན་བྱང་ཆུབ་ཆེན་པོའི་ཆོས་ཚོགས་ཀྱི་དྲུང་ཆེས་མཛད་སྒོ་དེར་བཅར་རྒྱུ་བྱུང་བ་སྐལ་པ་བཟང་པོ་ཡིན་པ་དང་། བོད་པས་གནའ་བོའི་ཆོས་དང་རིག་གཞུང་ཉར་ཚགས་གནང་ཡོད་པ་སོགས་ཀྱི་གསུང་བཤད་གནང་། དེ་ནས་བོད་ཀྱི་བཙུན་མའི་ལས་འཆར་ཁང་གི་ངེས་སྟོན་པ་སྣང་ས་ཆོས་སྒྲོན་ལགས་ནས་བོད་ཀྱི་བཙུན་མའི་ལས་འཆར་ཁང་གི་ལས་དོན་ངོ་སྤྲོད་དང་། སྐབས་གཉིས་པའི་དགེ་བཤེས་མའི་རྒྱུགས་སྤྲོད་དོ་དམ་ལྷན་ཚོགས་ཀྱི་ཚོགས་གཙོ་སྒྲོལ་མ་གླིང་གི་སློབ་སྤྱི་ངག་དབང་བསྟན་འཛིན་ལགས་ནས་བཙུན་མའི་འཇང་དགུན་དང་དགེ་བཤེས་མའི་རྒྱབ་ལྗོངས་ཐོག་གསུང་བཤད་གནང་སོང་།
དེའི་རྗེས་སྐུ་མགྲོན་གཙོ་བོ་རྡོར་གདན་རྒྱལ་སྤྱིའི་ནང་པའི་ཆོས་ཚོགས་ཀྱི་ཚོགས་གཙོ་ངག་དབང་བསྟན་འཛིན་ལགས་ཀྱིས་དགེ་བཤེས་མ་རྣམས་ལ་ཕྱག་འཁྱེར་གནང་། དེ་བཞིན་བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་དྲུང་འཕར་ཀུན་དགའ་རྒྱལ་མཚན་ལགས་ནས་བསླབ་པ་མཐར་སོན་པའི་དགེ་བཤེས་མ་བདུན་ལ་ཆོས་རིག་ལས་ཁུངས་ཀྱི་རྟེན་འབྲེལ་ལེགས་སྐྱེས་ཕུལ་རྗེས། ཆོས་རིག་དྲུང་འཕར་ཀུན་དགའ་རྒྱལ་མཚན་ལགས་ནས་བསླབ་པ་མཐར་སོན་པའི་དགེ་བཤེས་མ་རྣམས་ལ་འཚམས་འདྲི་དང་བཅས་གསུང་བཤད་གནང་དོན། དགེ་བཤེས་མ་རྣམ་པས་ལྷ་རབ་བྱུང་ན་སྒྲུབ་པ་ཉམས་ལེན་གནང་རྒྱུ་གལ་ཆེན་པོ་ཡིན་པ་སོགས་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཆོས་ཚོགས་ཐེངས་ལྔ་པའི་ཐོག་བཀའ་སློབ་ཕེབས་དོན་བཞིན་བཙུན་དགོན་སོ་སོའི་ས་ཁུལ་གྱི་གཞིས་མི་ཚོའི་ཆོས་ཀྱི་ཤེས་ཚད་ཡར་རྒྱས་གཏོང་ཐབས་ལ་ཐུགས་འགན་བཞེས་དགོས་པ། ཆོས་རིག་ལས་ཁུངས་ནས་ལོ་ལྟར་བོད་ཀྱི་དཔེ་མཛོད་ཁང་དང་ལྷན་དུ་ཚན་རིག་ཟབ་སྦྱོང་གོ་སྒྲིག་ཞུ་དོན་དང་སྦྲེལ་ནས་ཆོས་སྡེ་ཁག་ནས་མཉམ་ཞུགས་གནང་གལ་སོགས་ཀྱི་གསུང་བཤད་གནང་ཡོད།
མཐའ་མ་སྐུ་མགྲོན་གཙོ་བོ་རྡོར་གདན་རྒྱལ་སྤྱིའི་ནང་པའི་ཆོས་ཚོགས་ཀྱི་ཚོགས་གཙོ་ངག་དབང་བསྟན་འཛིན་ལགས་ནས་གསུང་དོན། རྣམ་པ་ཆོས་སོ་སོའི་ཤེས་ཡོན་གང་སྦྱངས་པ་ཁྱབ་སྤེལ་གཏོང་བར་སྐད་གལ་ཆེན་པོ་ཡིན་པ་དང་། དགེ་བཤེས་མའི་རྒྱུགས་མ་ཕྲོད་པ་རྣམས་ནས་གློ་བུར་རྐྱེན་དབང་གིས་རྒྱུགས་མ་ཕྲོད་པ་ཙམ་ལས་དོན་ལ་གཞུང་ཆེན་སྦྱངས་ཡོད་སྟབས་སེམས་ཤུགས་ཆག་མི་དགོས་པ་སོགས་གསུངས།
དེ་ནས་དགེ་བཤེས་མ་བདེ་ལེགས་དབང་མོ་ལགས་ནས་བཙུན་དགོན་བཤད་གྲྭ་ཁག་གི་ཚབ་ཞུས་ནས་བཙུན་དགོན་བཤད་གྲྭ་ཁག་ལ་བཀའ་དྲིན་ཆེ་བའི་འབྲེལ་ཡོད་ཚོགས་སྡེ་ཁག་ལ་ཐུགས་རྗེ་ཆེ་ཞུའི་གསུང་བཤད་དང་། དེ་རྗེས་ཕྱི་ལོ་ ༢༠༢༣ ལོའི་བཙུན་མའི་ཚད་མའི་འཇང་དགུན་ཆོས་སྐབས་ ༢༧ པའི་རྒྱུན་ལས་ཚོགས་ཆུང་ནས་རྩིས་ཁྲ་སྙན་སྒྲོན་དང་ཐུགས་རྗེ་ཆེ་ཞུའི་གསུང་བཤད་གནང་། མཐར་དབུ་མཛད་ནས་བཀྲ་ཤིས་པའི་ཚིགས་བཅད་དང་འབྲེལ་བསྔོ་སྨོན་གསུངས་ཏེ་མཛད་སྒོ་རྒྱལ་ཁའི་ངང་གྲོལ།
ཕྱི་ཚེས་ ༢༥ དང་ ༢༦ ཉིན་དགེ་བཤེས་མ་རྣམས་ཀྱི་གྲྭ་སྐོར་དམ་འཇོག་གནང་ཡོད། དེ་ཉིན་མཛད་སྒོའི་ཐོག་དགོན་སྡེ་ཁག་གི་སྐུ་མགྲོན་དང་བཙུན་མའི་འཇང་དགུན་ཆོས་དང་དགེ་བཤེས་མའི་གྲྭ་སྐོར་ལ་ཕེབས་པའི་དགེ་ལས་བཙུན་མ་ ༥༡༤ བཅས་ལྷན་འཛོམས་སུ་ཕེབས་ཡོད། 
སྤྱིར་ཕྱི་ལོ་ ༢༠༡༦ ཟླ་ ༡༢ ཚེས་ ༢༢ ཉིན་མོན་གྷོ་འབྲས་སྤུངས་སུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་སྐབས་དང་པོའི་དགེ་བཤེས་མའི་བསླབ་པ་མཐར་སོན་པའི་བཙུན་མ་ ༢༠ ལ་དགེ་བཤེས་མའི་མཚན་རྟགས་ཀྱི་ཕྱག་འཁྱེར་གསོལ་སྩལ་མཛད་ཡོད་ཅིང་། ད་ལན་སྐབས་དྲུག་པར་དགེ་བཤེས་མ་བདུན་ཡོད་པ་བརྩིས་ནས་ད་ཕན་ལ་དགེ་བཤེས་མ་ ༦༠ བསླབ་པ་མཐར་སོན་པ་བྱུང་ཡོད།
དེ་བཞིན་བཙུན་མའི་འཇང་དགུན་ཆོས་དེ་ཐེངས་ ༢༧ ཆགས་ཀྱི་ཡོད་ཅིང་། ཕྱི་ལོ་ ༢༠༢༣ ཟླ་ ༡༠ ཚེས་ ༢༥ ནས་ཟླ་ ༡༡ ཚེས་ ༢༦ བར་འཚོགས་ཡོད་པ་དང་། བཙུན་དགོན་ཁག་བཅུ་དང་དགེ་སློབ་བསྡོམས་གྲངས་ ༥༡༤ ལྷག་བྱུང་ཡོད། །
