༄༅། །ཕྱི་ལོ་ ༢༠༢༣ ཟླ་བ་ ༡༡ ཚེས་ ༠༩ ཉིན་༸སྐྱབས་རྗེ་བཀའ་བློན་ཁྲི་ཟུར་སློབ་དཔོན་ཟམ་གདོང་རིན་པོ་ཆེ་མཆོག་གིས་ནང་སྲིད་ལས་ཁུངས་ཀྱི་ཁྱབ་ཁོངས་ས་གནས་འགོ་འཛིན་རྣམས་ཀྱི་འཛིན་སྐྱོང་ཚོགས་ཆེན་ཐེངས་བཅོ་ལྔ་པར་ཕེབས་པའི་ཚོགས་བཅར་བ་ས་གནས་འགོ་འཛིན་རྣམས་ལ་ས་གནས་འགོ་འཛིན་རྣམས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་བཞེད་འགྲུབ་པ་ལ་དམིགས་བསལ་གྱིས་ཞབས་འདེགས་ཞུ་དགོས་གང་དང་གང་ཡོད་དམ་ཞེས་པའི་བརྗོད་གཞིའི་ཐོག་གསུང་བཤད་གནང་ཡོད།
དེ་ཡང་གོང་ཚེས་ཉིན་གྱི་ཕྱེད་ཡོད་ཆུ་ཚོད་གསུམ་པའི་ཐོག་ཏཱ་ལའི་བླ་མ་དགེ་རྩའི་གོ་སྒྲིག་འོག་༸གོང་ས་ཏཱ་ལའི་བླ་མ་དཔེ་མཛོད་དང་ཡིག་ཚགས་ཁང་དུ་༸སྐྱབས་རྗེ་བཀའ་བློན་ཁྲི་ཟུར་སློབ་དཔོན་ཟམ་གདོང་རིན་པོ་ཆེ་མཆོག་གིས་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་ཁྱབ་ཁོངས་ས་གནས་འགོ་འཛིན་རྣམས་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་བཞེད་འགྲུབ་པ་ལ་དམིགས་བསལ་གྱིས་ཞབས་འདེགས་ཞུ་དགོས་གང་དང་གང་ཡོད་དམ་ཞེས་པའི་བརྗོད་གཞིའི་ཐོག་གསུང་བཤད་གནང་སྐབས་ཐོག་མར་བོད་གངས་ཅན་ལྗོངས་ཀྱི་མེ་ཏོག་གང་ལ་ཕོག་པའི་ལྷ་སྐལ་འཕགས་མཆོག་སྤྱན་རས་གཟིགས་ཀྱི་རྣམ་སྤྲུལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་ཆགས་འཇིག་གི་གནས་སྟངས་སུ་ལྷུངས་པའི་སྐབས་ཡང་དག་པའི་དབུ་ཁྲིད་ལམ་སྟོན་གནང་བའི་མཛད་པ་འཕྲིན་ལས་སྤྱི་དང་། ཡང་སྒོས་བཙན་བྱོལ་དུ་ཕེབས་རྗེས་མང་གཙོའི་རང་བཞིན་ཅན་གྱི་སྒྲིག་འཛུགས་སླར་འཛུགས་བསྐྱངས་ཏེ་བོད་མིའི་རང་དབང་དང་། བོད་ཀྱི་ཆོས་དང་རིག་གཞུང་རྒྱུན་འཛིན་དར་སྤེལ་མཛད་པའི་འཕྲིན་ལས་སྐོར་ངོ་སྤྲོད་ཞིབ་རྒྱས་གནང་ཡོད།
དེ་ནས་ས་གནས་འགོ་འཛིན་རྣམས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་བཞེད་འགྲུབ་པ་ལ་དམིགས་བསལ་གྱིས་ཞབས་འདེགས་ཞུ་དགོས་གང་ཡོད་སྐོར་དང་འབྲེལ་ཏེ་རིན་པོ་ཆེ་མཆོག་གིས་སྤྱིར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཛད་པ་ལ་མཐའ་མེད་ཀྱང་། སྐབས་བབ་ས་གནས་འགོ་འཛིན་རྣམས་ནས་བཙན་བྱོལ་བོད་མིའི་བཅའ་ཁྲིམས་རིན་པོ་ཆེ་ནང་གསལ་ས་གནས་འགོ་འཛིན་རྣམ་པའི་རང་ཁྲིའི་ལས་འགན་ལེ་ཐོགས་མེད་པར་ཁྲིམས་སྒྲིག་དགོངས་དོན་བཞིན་བསྒྲུབ་རྒྱུ་དང་། བྱེ་བྲག་ཏུ་གཞིས་ཆགས་སྲ་བརྟན་ཡོང་ཐབས་སུ་འབད་རྩོལ་གནང་དགོས་པའི་ལམ་སྟོན་དང་སྦྲགས། མགོན་པོ་མཆོག་གི་ཐུགས་སྐྱེད་དམ་བཅའ་བཞི་ལས་འགྲོ་བ་མིའི་བཟང་སྤྱོད་གོང་མཐོར་གཏང་རྒྱུ་དང་འབྲེལ་ཏེ་ས་གནས་ཁག་ཏུ་མགོན་པོ་མཆོག་གི་དགོངས་གཞི་ལས་འཁྲུངས་པའི་ཆོས་ལུགས་ལ་མ་བརྟེན་པའི་བཟང་སྤྱོད་སློབ་སྤེལ་གནང་ཐབས་དང་། ཆོས་ལུགས་ཆོས་བརྒྱུད་ཕན་ཚུན་དབར་ཐུགས་མཐུན་ཁྲིམས་གཙང་ཡོང་ཐབས། བོད་ཀྱི་ཆོས་དང་རིག་གཞུང་སྐད་ཡིག་བཅས་པ་མི་ཉམས་རྒྱུན་འཛིན་གནང་ཐབས། རྒྱ་གར་གྱི་གནའ་བོའི་རིག་གཞུང་སླར་གསོ་གནང་ཐབས་ལ་འབད་རྩོལ་གནང་རྒྱུ་མ་ཟད། ས་གནས་སོ་སོར་ཤིང་སྣ་འདེབས་འཛུགས་དང་། རྫས་ངན་སྤངས་ཏེ་སྐྱེ་ལྡན་སོ་ནམ་ཞིང་ལས་སུ་བསྒྱུར་ཐབས་སོགས་བརྒྱུད་ཁོར་ཡུག་སྲུང་སྐྱོབ་གནང་ཐུབ་ན་༸རྒྱལ་བའི་དགོངས་བཞེད་སྒྲུབ་པར་ཕན་ཐོགས་ངེས་ཡིན་པའི་བཀའ་སློབ་སྩལ་ཡོད་པ་བཅས།།
