༄༅། །བྱང་ཨ་རི་སྐུ་ཚབ་དོན་གཅོད་ལས་ཁུངས་ནས་བཏང་གནས་ནང་འཁོར་དོན། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ ༢༠༢༣ ཟླ་བ་ ༡༡ ནང་ཁེ་ན་ཊའི་གྲོང་ཁྱེར་ཧེ་ལི་ཕེཀ་སིར་ཚོགས་པའི་ <<ཧེ་ལི་ཕེཀ་སི་རྒྱལ་སྤྱིའི་བདེ་འཇགས་གླེང་སྟེགས། >> ཀྱི་ཡོངས་བསྒྲགས་མིན་པའི་ནང་ཁུལ་ཚོགས་འདུར་བོད་དོན་སྐོར་དམིགས་བསལ་གསུང་བཤད་གནང་རྒྱུ་དང་།  རྒྱལ་ས་ཨོ་ཊ་ཝར་ཁེ་ན་ཌ་གཞུང་དང་གྲོས་ཚོགས་ཀྱི་གནད་ཡོད་མི་སྣ་དང་ལྷན་དུ་མཇལ་མོལ་དང་གསུང་བཤད་གནང་རྒྱུ།  ཁེ་ན་ཌའི་གྲོས་ཚོགས་ཀྱི་ཚོགས་ཁང་ཆེན་མོའི་ནང་བོད་མིའི་སྒྲིག་འཛུགས་ཀྱི་སྲིད་སྐྱོང་ལ་ཕེབས་བསུ་སྣེ་ལེན་ཞུས་པ་དང་ལེན་གནང་རྒྱུ།  བསམ་མཛོད་བསྟི་གནས་ཁང་གི་མཁས་པ་མཇལ་རྒྱུ་དང་།  གསར་འགོད་པའི་བཅར་འདྲི་དང་ལེན་གནང་རྒྱུ་བཅས་ཕྱི་ལོ་ ༢༠༢༣ ལོའི་ཟླ་བ་ ༡༡ ཚེས་ ༢༠ ནས་ཚེས་ ༢༣ བར་གྱི་མཛད་རིམ་ཡོངས་རྫོགས་ལེགས་པར་གྲུབ་རྗེས།  བྱང་ཨ་རི་སྐུ་ཚབ་དོན་གཅོད་ལས་ཁུངས་ནས་སྔོན་དུ་འཆར་གཞི་སྒྲིག་པ་ལྟར།  དང་པོ།  

ཟླ་བ་ ༡༡ ཚེས་ ༢༤ ཉིན་རྒྱབ་ཨ་རིའི་ནང་བོད་མི་འདུས་སྡོད་མང་ཤོས་ཨང་གཉིས་པ་ཡིན་པའི་མངའ་སྡེ་མི་ནི་སོ་ཊ་གནམ་ཐང་དུ་ཕེབས་འབྱོར་སྐབས་ས་གནས་བོད་རིགས་སྤྱི་མཐུན་ཚོགས་པའི་རྒྱུན་ལས་དང་།  ཚོགས་པ་ཁག་དང་།  ཆོས་ཚོགས་ཁག་གི་སྐུ་ཚབ་བཅས་ནས་བོད་ལུགས་ཕེབས་བསུ་གཟབ་རྒྱས་ཞུས་རྗེས་བཞུགས་གནས་མགྲོན་ཁང་དུ་ཕེབས།  

དགོང་མོ་བོད་སྒར་ལུགས་གཉིས་དགའ་ཚལ་ (བོད་རིགས་སྤྱི་མཐུན་ཚོགས་པའི་སྤྱི་ཁང་།) དུ་ས་གནས་སེར་སྐྱ་མང་ཚོགས་ལ་བཀའ་སློབ་གནང་རྒྱུའི་མཛད་རིམ་ཡོད་པ་ལྟར།  ཐོག་མར་ས་གནས་བོད་རིགས་སྤྱི་མཐུན་ཚོགས་པའི་ཚོགས་གཙོ་ཀུན་དགའ་ཉི་མ་ལགས་ནས་དགའ་བསུའི་གསུང་བཤད་དང་།  དེ་རྗེས་བྱང་ཨ་རིའི་སྐུ་ཚབ་དོན་གཅོད་འབུམ་རམས་པ་རྣམ་རྒྱལ་ཆོས་གྲུབ་ལགས་ནས་བྱང་ཨ་རི་སྐུ་ཚབ་དོན་ཁང་གི་ཕྱག་ལས་དང་།  སྲིད་སྐྱོང་མཆོག་གི་ཐེངས་འདིའི་མཛད་རིམ་སྐོར་སྤྱི་ཡོངས་ཀྱི་ངོ་སྤྲོད་སྙིང་བསྡུས་གནང་།དེ་རྗེས།  དཔལ་ལྡན་སྲིད་སྐྱོང་མཆོག་གིས།  བཀའ་ཤག་སྐབས་ ༡༦ པས་འཛིན་སྐྱོང་གི་ཐུགས་འགན་བཞེས་ཏེ་ད་བར་ལོ་གཉིས་དང་ཕྱེད་ཀ་ཙམ་རིང་ཕྱག་ལས་གང་དང་ཅི་ཞིག་གནང་བ་དང་།  མ་འོངས་གནང་འཆར་ཇི་ཡོད།  རྒྱལ་སྤྱིའི་ཐོག་གི་བོད་དོན་གནས་བབ། རྒྱ་ནག་ནང་གི་གནས་སྟངས།  རང་རེའི་སྲིད་བྱུས་དང་ཐབས་བྱུས་བཅས་ཀྱི་སྐོར་ལ་བཀའ་སློབ་ཞིབ་རྒྱས་གནང་ཞིང་།  བཀའ་སློབ་གྲུབ་རྗེས་མང་ཚོགས་ཀྱི་དྲི་བ་བཏང་བ་ཁག་ལ་ལན་འདེབས་དགོས་སར་ལན་འདེབས་དང་།  གསལ་བཤད་དགོས་སར་གསལ་བཤད་གནང་། ཡང་།  སྲིད་སྐྱོང་མཆོག་གིས་མང་ཚོགས་ལ་བཀའ་སློབ་གནང་བའི་གོ་སྐབས་དང་བསྟུན་ནས་ཉེ་ཆར་སྐུ་ཚེའི་འཕེན་པ་རྫོགས་པའི་ཁྲིམས་ཞིབ་པ་ཆེ་བ་ཟུར་པ་ཕུན་རབ་བློ་བཟང་དར་རྒྱས་མཆོག་གིས་སྐུ་ཚེ་ཧྲིལ་པོར་བོད་བསྟན་སྲིད་མི་རིགས་སླད་དུ་ཞབས་ཞུ་བསྒྲུབས་པའི་མཛད་རྗེས་ལ་རྗེས་དྲན་དང་། ཕྱོགས་མཚུངས་དེར་བསྡུས་གཞུང་ཞབས་སྐུ་བགྲེས་རྣམས་ཀྱིས་གཞུང་མང་སྐུ་ངལ་ཆེ་བའི་དུས་སུ་ལོ་མང་ཞབས་ཞུ་བསྒྲུབས་པའི་མཛད་རྗེས་ལ་ཡི་རངས་ཆེ་བསྟོད་གནང་།  གཉིས་པ།  

(༡)  ཟླ་བ་ ༡༡ ཚེས་ ༢༥ ཉིན་བོད་རིགས་སྤྱི་མཐུན་ཚོགས་པའི་གཟའ་མཇུག་སློབ་གྲྭར་གཟིགས་སྐོར་དང་འབྲེལ་སློབ་གྲྭའི་དགེ་ལས་ཡོངས་ལ་བཀའ་སློབ་གནང་།  སྐབས་དེར་སྲིད་སྐྱོང་མཆོག་གིས་དགེ་རྒན་ལས་བྱེད་ཚོས་དང་བླངས་ཞབས་ཞུ་བསྒྲུབས་དང་སྒྲུབ་བཞིན་པ་དང་།  ལྷག་པར་དུ་གཟའ་མཇུག་སློབ་གྲྭ་ནས་ཐོན་པའི་གཞོན་སྐྱེས་ཁག་ཅིག་གིས།  རང་གི་སློབ་གྲྭ་མ་བརྗེད་པར་བསྐྱར་དུ་གཟའ་མཇུག་སློབ་གྲྭར་ལོག་ནས་དང་བླངས་ཀྱི་ཕྱག་རོགས་གནང་བར་རྗེས་སུ་ཡི་རངས་དང་བསྔགས་བརྗོད་གནང་བ་མ་ཟད།  དགེ་ལས་ཚང་མས་ད་དུང་མུ་མཐུད་འབད་བརྩོན་ཇི་ལྟར་གནང་དགོས་པ་དང་།  བསམ་བློའི་ཁྱེར་བཟོ་གང་འདྲ་དགོས་པ་སོགས་ཀྱི་ཐད་བཀའ་སློབ་དང་ལམ་སྟོན་ཡང་གནང་ཡོད།  (༢)  རྒྱུད་སྟོད་ཆོས་ཚོགས་ཀྱི་འདུ་ཁང་ནང་ཁུལ་དེར་གནས་འཁོད་རང་རིགས་གཞོན་སྐྱེས་རྣམས་ཀྱིས་བོད་དོན་དང་འབྲེལ་བའི་ཤེས་བྱ་སྔར་ལས་ཕུན་སུམ་ཚོགས་སུ་གཏོང་ཆེད།  བོད་ཨིན་འདྲེས་མའི་ཐོག་ནས་བོད་ཀྱི་ལོ་རྒྱུས་དང་།  བོད་ཀྱི་སྐྱེས་ཁམས་ཁོར་ཡུག་གི་གལ་གནད།  བོད་ཀྱི་ད་ལྟའི་གནས་སྟངས།  སྲིད་བྱུས་དང་ཐབས་བྱུས་བཅས་ཀྱི་སྐོར་ངོ་སྤྲོད་གནང་ཡོད་པ་མ་ཟད།  གཞོན་སྐྱེས་ཁག་ཅིག་གི་སེམས་ནང་གི་དྲི་བ་དེ་ཚོར་ཡང་ལན་འདེབས་མཛད།(༣) སྲིད་སྐྱོང་མཆོག་གིས་མི་ནི་སོ་ཊར་ཡོད་པའི་རིས་མེད་ཆོས་བརྒྱུད་ཁག་གི་དགོན་པའམ་ཆོས་ཚོགས་ཀྱི་ལས་སྣེ་རྣམ་པ་དང་མཇལ་མོལ་གྱི་མཛད་རིམ་གྲུབ་རྗེས། དམིགས་བསལ་སློབ་གྲྭའི་ (Charter School) ལས་གཞི་དང་།  བོད་ཀྱི་གྲོང་སྡེ་གསར་སྐྲུན་ལས་གཞིའི་འབྲེལ་ཡོད་མི་སྣ་དང་ཁག་སོ་སོར་མཇལ་འཕྲད་གནང་སྟེ།  འབྲེལ་ཡོད་ཕྱག་ལས་གནང་མཁན་ཚོའི་བསམ་ཚུལ་གསན་རྗེས་ལས་གཞི་གང་ཡིན་རུང་ས་གནས་ཡུལ་ས་གནས་ཀྱི་ཁྲིམས་དང་མཐུན་པ་དགོས་པ་དང་།  ཕྱི་གསལ་ནང་གསལ་དགོས་པ།  མགོ་ཡོད་ལ་མཇུག་ཀྱང་ཡོད་པ་བྱེད་དགོས་པ་མ་ཟད།  ཐོག་མའི་དམིགས་ཡུལ་ལྟར་བོད་མིའི་ངོ་བོ་སྲུང་སྐྱོབ་ལ་ཕན་ཐོགས་ཡོད་པ་ཞིག་གནང་དགོས་པ་ནི་གནད་ཀྱི་སྙིང་པོ་ཡིན་པའི་ལམ་སྟོན་གནང་།  ལས་གཞི་དེ་གཉིས་ཀའི་འབྲེལ་ཡོད་མི་སྣ་དང་མཇལ་འཕྲད་སྐབས་ས་གནས་བོད་རིགས་སྤྱི་མཐུན་ཚོགས་པའི་ཚོགས་གཙོ་དང་རྒྱུན་ལས་ཡང་མཉམ་ཞུགས་གནང་ཡོད།

(༤)  དེ་ཉིན་ཕྱི་དྲོ་བོད་རིགས་སྤྱི་མཐུན་ཚོགས་པས་གོ་སྒྲིག་འོག  དཔལ་ལྡན་སྲིད་སྐྱོང་མཆོག་ལ་ཆེ་བསྟོད་དང་། དཔལ་འབྱོར་འདུ་འགོད་ཀྱི་དགོང་དྲོའི་གསོལ་སྟོན་འདུ་འཛོམས་སུ་ཆེད་ཕེབས་མཛད་པ་དང་།  གསོལ་སྟོན་གྱི་འདུ་འཛོམས་དང་འབྲེལ་བའི་གསུང་བཤད་གནང་སྐབས་དེར་བསྡུས་སེར་སྐྱ་མང་ཚོགས་རྣམས་ལ་ཐེངས་འདིར་ཁེ་ན་ཌ་དང་།  ཨ་རིའི་མཛད་རིམ་ཇི་བསྐྱངས་སྐོར་མཁྱེན་རྟོགས་ཆེད་ངོ་སྤྲོད་སྙིང་བསྡུས་གནང་།   ད་དུང་ས་གནས་བོད་རིགས་སྤྱི་མཐུན་ཚོགས་པའི་རྒྱུན་ལས་དང་། གཟའ་མཇུག་སློབ་གྲྭའི་དགེ་ལས་བཅས་ཚང་མས་སྒེར་གྱི་དུས་ཚོད་བློས་གཏོང་གིས་སྤྱི་པའི་དོན་དུ་ཞབས་ཞུ་བསྒྲུབས་དང་སྒྲུབ་བཞིན་པ་དང་།  ལྷག་པར་དུ་གཞོན་སྐྱེས་ཁག་ཅིག་གིས་བོད་དོན་ཞུ་གཏུག་ལས་དོན་གྱི་འགན་ཁུར་བའི་གྲས་སུ་ཞུགས་པ་བཅས་ལ་རྗེས་སུ་ཡི་རངས་དང་བསྔགས་བརྗོད་གནང་།  (༥)  མི་ནི་སོ་ཊའི་མཛད་རིམ་ལེགས་པར་གྲུབ་རྗེས།  ཚེས་ ༢༦ ཉིན་དཔལ་ལྡན་སྲིད་སྐྱོང་མཆོག་མི་ནི་སོ་ཊ་ནས་མཁའ་ལམ་བརྒྱུད་ཡུ་རོབ་རྒྱལ་ཁབ་བཞིའི་ནང་གི་གཞུང་འབྲེལ་མཛད་འཆར་དབུ་འཛུགས་གནང་།  སྲིད་སྐྱོང་མཆོག་ཐེངས་འདིར་ཁེ་ན་ཌའི་གྲོང་ཁྱེར་ཨོ་ཊ་ཝ་དང་།  ཨ་རིའི་མངའ་སྡེ་མི་ནི་སོ་ཊའི་ནང་གཞུང་དོན་ཕྱོགས་ཕེབས་ཀྱི་མཛད་རིམ་ཆ་ཚང་ལ་བྱང་ཨ་རི་སྐུ་ཚབ་དོན་གཅོད་འབུམ་རམས་པ་རྣམ་རྒྱལ་ཆོས་གྲུབ་ལགས་ལྷན་བཅར་ཞུས་ཡོད་པ་བཅས་ཀྱི་ཕྱོགས་བསྡུས་གནས་ཚུལ་དུ།