༄༅། །ཕྱི་ལོ་ ༢༠༢༣ ཟླ་བ་ ༡༠ ཚེས་ ༡༡ ནས་ ༡༦ བར་ཐའི་ལེནྡ་གྱི་རྒྱལ་ས་བྷེང་ཀོག་ཏུ་བསྐོང་ཚོགས་གནང་བའི་ཨེ་ཤི་ཡ་ཞི་བདེ་རྒྱ་མཚོའི་མངའ་ཁུལ་དུ་ཞི་བདེ་དར་འཕེལ་གཏོང་ཕྱོགས་དང་འབྲེལ་བའི་རྒྱལ་སྤྱིའི་ཚོགས་འདུའི་ཐོག་ཕྱི་དྲིལ་བོད་ཀྱི་འགྲེམས་སྟོན་ཁང་མཉམ་ཞུགས་གནང་ཡོད།

ཚོགས་འདུའི་ཉིན་གཉིས་པའི་ཐོག་བོད་ཀྱི་འགྲེམས་སྟོན་ཁང་གི་ལས་བྱེད་ཚེ་རིང་ནོར་བུ་ལགས་ཀྱིས་བོད་ཀྱི་འགྲེམས་སྟོན་ཁང་གི་དམིགས་ཡུལ་དང་། ལས་དོན་བྱེད་ཕྱོགས། དེ་བཞིན་བོད་ནང་གི་ཛ་དྲག་གནས་སྟངས་ངོ་སྤྲོད་གནང་ཞིང་། སྐབས་དེར་ཚོགས་བཅར་བ་རྣམས་ནས་དོ་སྣང་ཆེན་པོས་གསན་པ་མ་ཟད། ལེགས་སྤེལ་ཉེས་འགོག་གི་དགོངས་ཚུལ་སྟོན་ཞིང་། རྒྱ་ནག་གི་དབང་སྒྱུར་འོག་བོད་མི་རྣམས་ནས་དཀའ་སྡུག་ཚད་མེད་མྱོང་བཞིན་པར་གདུང་སེམས་མཉམ་སྐྱེ་བསྟན་གནང་ཡོད་པ་བཅས།།