༄༅། །ཨིན་ཡུལ་སྐུ་ཚབ་དོན་ཁང་དང་ཨིན་ཡུལ་བོད་ཁང་ཐེབས་རྩ། དང་བླངས་བོད་དོན་ཞུ་གཏུག་ལས་འགུལ་གྱི་ཚོགས་མི་ཐེ་བའི་ས་གནས་བོད་མི་ཐུན་མོང་ནས་ཨིན་ཡུལ་གྱི་སྲིད་དོན་ཚོགས་པ་ཆེ་བ་གཉིས་ཀྱི་ལོ་འཁོར་ཚོགས་ཆེན་ཐོག་བོད་དོན་ཞུ་གཏུག་གིས་ཕྱི་ལོའི་དུས་རབས་བཅོ་བརྒྱད་པ་ནས་ཉི་ཤུ་པའི་ནང་ཨིན་གཞུང་གིས་རྒྱ་བོད་གཉིས་ཀྱི་དཀའ་རྙོག་ལ་བར་སྡུམ་ནང་འགྲིག་གནང་བའི་ལོ་རྒྱུས་ཀྱི་བྱུང་བ་གསལ་སྟོན་དང་། བོད་མཐོ་སྒང་གི་གནམ་གཤིས་འགྱུར་ལྡོག་ལ་བརྟེན་ནས་འཛམ་གླིང་ཁྱོན་ཡོངས་ལ་གོད་ཆགས་བྱུང་ཉེན་སོགས་ཀྱི་སྐོར་ཞུ་འབོད་གནང་ཡོད།

དེ་ཡང་ཕྱི་ལོ་ ༢༠༢༣ ཟླ་བ་ ༡༠ ཚེས་ ༠༤ ཉིན་སྔར་སྲོལ་ལ་དགའ་ཞེན་ཅན་གྱི་སྲིད་དོན་ཚོགས་པའི་ (Conservative Party) ཚོགས་འདུའི་ཐོག་བོད་ཀྱི་གནད་དོན་སྐོར་ཆེད་མཁས་པ་གསུམ་ནས་གསུང་བཤད་གནང་གཏན་འཁེལ་བ་ལྟར། ཝེ་སི་མིནྶ་ཊར་གཙུག་ལག་སློབ་གཉེར་ཁང་ (University of Westminister) གི་ཉེ་བའི་རིགས་བདག་གཞོན་པ་དེ་བ་ཡེཤ་ཨཱ་ནནྡ་ (Dibyesh Anand) ལགས་ནས་བོད་དང་ཨིན་ཡུལ་གྱི་འབྲེལ་ལམ་སྐོར་དང་། ཨ་བྷེར་ཊིན་གཙུག་ལག་སློབ་གཉེར་ཁང་ (University of Aberdeen) གི་ལེགས་སྦྱར་བ་རྒན་པ་འབུམ་རམས་པ་མར་ཊིན་མིལ་ (Martin Mills) ལགས་ནས་བོད་མཐོ་སྒང་གི་གནམ་གཤིས་འགྱུར་ལྡོག་གི་རྒྱུ་རྐྱེན་དང་། རྒྱུད་རིམ། མཇུག་འབྲས་བཅས་ཀྱི་སྐོར། ཨིན་ཡུལ་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་ནས་ད་ལྟའི་བོད་ནང་གི་ཛ་དྲག་གནས་སྟངས་མཚོན་པའི་བོད་རྒྱའི་དཀའ་རྙོག་སེལ་ཐབས་ཀྱི་དབུ་མའི་ལམ་གྱི་སྲིད་བྱུས་སྐོར་གསུང་བཤད་གནང་གི་ཡོད།

དེ་བཞིན་ཕྱི་ལོ་ ༢༠༢༣ ཟླ་བ་ ༡༠ ཚེས་ ༠༨ ནས་ ༡༡ བར་ངལ་རྩོལ་སྲིད་དོན་ཚོགས་པའི་ལོ་འཁོར་ཚོགས་ཆེན་ཐོག་ཨིན་ཡུལ་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་དང་། དྲུང་ཆེ་བློ་ཆོས་ལགས། ས་གནས་བོད་མི་བཅས་ནས་བོད་ནང་གི་གནམ་གཤིས་འགྱུར་ལྡོག་གི་དཀའ་ངལ་དང་། ཨིན་བོད་འབྲེལ་ལམ། བོད་ནང་གི་འགྲོ་བ་མིའི་ཐོབ་ཐང་གི་གནས་བབ་སོགས་ཀྱི་སྐོར་གནས་ཚུལ་མཁོ་འགྲེམས་དང་ཞུ་གཏུག་གནང་རྒྱུ་ཡིན་པ་བཅས།།