༄༅། །ཕྱི་ལོ་ ༢༠༢༣ ཟླ་བ་ ༡༠ ཚེས་ ༡༧ ཉིན་ཨ་རིའི་གྲོས་ཚོགས་སུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཨ་རིའི་གསེར་གྱི་གཟེངས་རྟགས་འབུལ་བཞེས་མཛད་དེ་ལོ་ངོ་ཧྲིལ་པོ་ ༡༦ འཁོར་བའི་དུས་དྲན་སྲུང་བརྩི་ཞུས་ཡོད།
དེ་ཡང་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་སྤྱི་ནོར་༧གོང་ས་༸སྐྱབས་མགོན་ཆེན་པོ་མཆོག་ལ་ཨ་རིའི་གྲོས་ཚོགས་ཀྱི་གསེར་གྱི་གཟེངས་རྟགས་འབུལ་བཞེས་མཛད་པ་ནི་༸གོང་མཆོག་སྐུ་སྒེར་གྱི་མཛད་རྗེས་ལ་ཆེ་བསྟོད་ཞུས་པ་ཙམ་མ་ཡིན་པར་འདས་པའི་ལོ་ངོ་ ༦༤ ཙམ་གྱི་རིང་རྒྱ་ནག་གི་གདུག་རྩུབ་འོག་མནར་གཅོད་མྱོང་བཞིན་པའི་གཞིས་ལུས་བོད་མིའི་སྙིང་སྟོབས་དང་། ལྷག་བསམ་རྒྱུན་གནས་ཐུབ་པ་དང་། བཙན་བྱོལ་བོད་མི་ཚོས་བོད་དོན་འཐབ་རྩོད་མུ་མཐུད་རྩོད་བཞིན་ཡོད་པར་ངོས་འཛིན་མཚོན་བྱེད་ཀྱང་ཆགས་ཡོད་སྐོར་དང་། གཞན་ཡང་དཔལ་ལྡན་སྲིད་སྐྱོང་མཆོག་ལྷོ་ཨ་མི་རི་ཁའི་རྒྱལ་ཁབ་ཁག་ཏུ་གཞུང་འབྲེལ་འཚམས་གཟིགས་གནང་བའི་སྐོར་ངོ་སྤྲོད་སོགས་གནང་ཡོད།
དེ་བཞིན་ལྕམ་ནན་སི་པོལ་སི་མཆོག་གིས་ཨ་རིའི་ཆབ་སྲིད་ཚོགས་པ་གཉིས་ཐུན་མོང་གིས་བོད་དོན་ལ་རྒྱབ་སྐྱོར་གནང་བཞིན་དེ་ནི་གཙོ་ཆེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྐུ་ལས་བསྐྱོན་པའི་མཛད་རྗེས་ལས་བྱུང་བ་ཡིན་པ་དང་། སྤྱི་ནོར་༧གོང་ས་༸སྐྱབས་མགོན་ཆེན་པོ་མཆོག་མ་འོངས་དགུང་གྲངས་ ༩༠ ལ་ཕེབས་པའི་སྐུའི་འཁྲུངས་སྐར་དུས་ཆེན་སྲུང་བརྩི་གཟབ་རྒྱས་ངང་ཞུ་ཐུབ་པའི་རེ་བ་ཡོད་ཅེས་གསུངས་ཡོད་པ་རེད། 
གྲོས་ཚོགས་འཐུས་མི་སྐུ་ཞབས་ཀི་རི་སི་ཨི་སི་མིཊ་ལགས་ཀྱིས་རྒྱ་ནག་གཞུང་གིས་བོད་ཕྲུག་སློབ་མ་རྣམས་རྒྱ་ནག་གཞུང་གི་བཅའ་སྡོད་སློབ་གྲྭར་བཙན་གྱིས་བཅུག་སྟེ་རྒྱ་སྒྱུར་གྱི་སྲིད་བྱུས་ལག་བསྟར་བྱེད་བཞིན་ཡོད་པ་དང་། ཀུན་གཟིགས་པཎ་ཆེན་རིན་པོ་ཆེ་མཆོག་འཛིན་བཟུང་བཙན་ཁྲིད་བྱས་ཏེ་ཆོས་ཕྱོགས་ཀྱི་བྱེད་སྒོ་ཡོངས་ལ་སྟངས་འཛིན་བྱས་དང་བྱེད་མུས་ཡིན་པ་མ་ཟད་། སྤྱི་ནོར་༧གོང་ས་༸སྐྱབས་མགོན་ཆེན་པོ་མཆོག་གི་ཡང་སྲིད་ཐད་ཐེ་གཏོགས་བྱེད་བཞིན་ཡོད་པས། སྤྱི་ནོར་༧གོང་ས་༸སྐྱབས་མགོན་ཆེན་པོ་མཆོག་གི་ཡང་སྲིད་ཀྱི་གནད་དོན་ནི་བོད་མི་ཁོ་ནར་ཡོད་པ་ལས་རྒྱ་ནག་གཞུང་ལ་བདག་དབང་གང་ཡང་མེད་སྐོར་དང་། རྒྱ་ནག་གཞུང་གིས་སྲིད་དབང་ལོག་སྤྱོད་བྱས་ཏེ་བོད་མི་མང་པོ་གང་བྱུང་འཛིན་བཟུང་བཀག་ཉར་དང་བཙོན་འཇུག་བྱེད་བཞིན་ཡོད་སྟབས། ཨ་རིའི་གྲོས་ཚོགས་ཀྱི་རྒྱ་ནག་ལས་དོན་ཚོགས་ཆུང་གིས་རྒྱ་ནག་གི་འབྲེལ་ཡོད་དཔོན་རིགས་ཚོར་འགན་ལེན་བྱེད་དུ་འཇུག་དགོས་སྐོར་གསུངས་སོང་།
