༄༅། །འདི་གར་བྱང་ཨ་རི་སྐུ་ཚབ་དོན་གཅོད་ནས་བཏང་གནས་ནང་འཁོད་དོན།  ཨ་རིའི་གྲོས་ཚོགས་གོང་མའི་འཐུས་མི་ལྕམ་སྐུ་ཌའེ་ན་ཧྥན་སེ་ཊེན་མཆོག་ (Dianne Feinstein) རེས་གཟའ་ཕུར་བུའི་ཉིན་དགུང་གྲངས་དགུ་བཅུའི་སྟེང་དགོངས་པ་རྫོགས་ཤིང་།  ལྕམ་སྐུ་ཁོང་ནི་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་དགོངས་པར་རྒྱབ་སྐྱོར་ཤུགས་ཆེ་གནང་མཁན་དང་།  བོད་དང་བོད་མིའི་རྩ་དོན་ལ་ཕན་ཐོགས་ཤུགས་ཆེ་གནང་མཁན་ཨ་རིའི་གྲོས་ཚོགས་གོང་མའི་འཐུས་མི་ཞིག་ཡིན།  ཁོང་སྐུ་ཚེ་མ་ཟིན་པའི་ཡིད་སྐྱོའི་གནས་ཚུལ་ཐོན་པར་བོད་མི་རྣམས་བློ་ཕམ་དང་འབྲེལ།  རང་སོ་སོའི་སྒེར་གྱི་སྤྱི་ཚོགས་དྲྭའི་ཐོག་རྣམ་པ་སྣ་ཚོགས་ཀྱི་ཐོག་ནས་ཁོང་ལ་མྱ་ངན་ཞུ་བཞིན་ཡོད།  

བྱང་ཨ་རི་སྐུ་ཚབ་དོན་གཅོད་ལས་ཁུངས་ལ་གནས་ཚུལ་འབྱོར་བར་གཞིགས་ན། བྱང་ཀ་ལེ་ཧྥོ་ནི་ཡའི་བོད་རིགས་སྤྱི་མཐུན་ཚོགས་པས་བོད་ཀྱི་གྲོགས་པོ་ཞིག་མེད་པར་གྱུར་བའི་ཡིད་སྐྱོའི་གནས་ཚུལ་ཐོན་མ་ཐག  རེས་གཟའ་པ་སངས་ཉིན་སྤྱི་མཐུན་ཚོགས་པའི་ཚོགས་ཁང་ནང་།  ལྕམ་སྐུ་ཌའེ་ན་ཧྥན་སེ་ཊེན་མཆོག་གི་ཆེད་དུ་བོད་ལུགས་ཀྱི་ལམ་ནས་སྨོན་ལམ་གསུང་འདོན་གནང་སྟེ།  དམ་པ་ཁོང་སྐུ་ཚེའི་འཕེན་པ་རྫོགས་པར་མྱ་ངན་དང་།  ཤུལ་ལུས་ནང་མི་རྣམས་ལ་ཐུགས་གསོ་མཚོན་པ་གནང་འདུག   ནིའུ་ཡོག་དང་ནིའུ་འཇར་སི་བོད་རིགས་སྤྱི་མཐུན་ཚོགས་པས་ཀྱང་རེས་གཟའ་ཉི་མའི་གུང་གསེང་དུས་ཚོད་དང་བསྟུན་ནས་ལྕམ་སྐུ་ཁོང་སྐུ་ཚེ་མ་ཟིན་པར་མྱ་ངན་དང་།  ཤུལ་ལུས་ནང་མི་རྣམས་ལ་ཐུགས་གསོ་མཚོན་པ་བྱེད་ཆེད་སྨོན་ལམ་འདོན་རྒྱུ་ཡིན་པའི་གསལ་བསྒྲགས་གནང་བཞག  ནིའུ་ཡོག་དང་ནིའུ་འཇར་སི་བོད་རིགས་སྤྱི་མཐུན་ཚོགས་པའི་ཚོགས་གཙོ་ནོར་བུ་ཚེ་རིང་ལགས་ཀྱིས་ “ཨ་རིའི་གྲོས་ཚོགས་འཐུས་མི་ཁོང་ནི་སྐུ་ཚེ་ཧྲིལ་པོར་བོད་དོན་འཐབ་རྩོད་ལ་འགྱུར་བ་མེད་པར་རྒྱབ་སྐྱོར་ཤུགས་ཆེ་གནང་མཁན་ཞིག་ཡིན་པ་དང་།   ལྷག་པར་དུ་བོད་དོན་དང་འབྲེལ་བའི་འགག་རྩའི་དུས་སུ་ག་དུས་ཡིན་རུང་ནུས་པ་འདོན་མཁན་ཞིག་ཡིན་སྟབས།  ཁོང་དགོངས་པ་རྫོགས་པ་ནི་བོད་དོན་འཐབ་རྩོད་ཀྱི་ངོས་ནས་བཤད་ན་གྱོང་གུན་ཆེན་པོ་ཞིག་རེད།  བོད་མི་ཚོས་ཁོང་གི་ཆེད་དུ་ནང་པའི་ལུགས་སྲོལ་གྱི་ཐོག་ནས་སྨོན་ལམ་འདོན་རྒྱུ་ནི་གལ་ཆེན་པོ་དང་དགོས་ངེས་ཡིན་པར་ངོས་འཛིན་གྱིས་རེས་གཟའ་ཉི་མའི་ཉིན་གྱི་སྨོན་ལམ་འདི་གྲ་སྒྲིག་ཞུས་པ་ཡིན། ”  ཅེས་གསུང་གི་འདུག  

ལྕམ་སྐུ་ཌའེ་ན་ཧྥན་སེ་ཊེན་མཆོག་གིས་ཕྱི་ལོ་ ༢༠༠༧ ལོའི་ཟླ་བ་ ༡༠ ཚེས་ ༡༧ ཉིན་གནང་བའི་དབྱིན་ཡིག་ཐོག་གི་གསུང་བཤད་འདི་བོད་སྒྱུར་གྱིས་འདས་པོ་དམ་པ་ཁོང་ལ་དྲན་གསོ་ཞུ་རྒྱུ་ཡིན།  དབྱིན་ཡིག་གསུང་བཤད་བོད་ཡིག་ཏུ་བསྒྱུར་མཁན་ནི་ཨོ་སི་ཀྲོ་ལོ་ཡར་གནས་འཁོད་གཞུང་ཞབས་ཟུར་པ་རྩོམ་པ་པོ་ཆུང་ཚེ་རིང་ལགས་ཡིན་ཞིང་།  ཁོང་གི་ངོ་དེབ་ལས་དྲངས་པ་ཡིན།  སྲིད་འཛིན་སྐུ་ཞབས་མཆོག་དང་།  ཚོགས་གཙོ་ལྕམ་སྐུ་མཆོག ཁྲིམས་བཟོ་ལྷན་ཚོགས་ཀྱི་ཚོགས་པ་ཁག་གི་དབུ་འཁྲིད་སྐུ་ཞབས་རྣམ་པ། བཀུར་འོས་སྐུ་མགྲོན་རྣམ་པ་ཚོ། ངས་ལོ་འདིའི་ལོ་འགོར་གྲོངས་པའི་གྲོས་ཚོགས་གོང་མའི་ཚོགས་མི་ཁེ་རེག་ ཐོ་མ་སེ་ (Craig Thomas)ཡི་བྱས་འབྲས་ངོས་འཛིན་གྱི་ཐོག་ནས་གཏམ་བཤད་འགོ་འཛུགས་ཞུ་གི་ཡིན།   གྲོས་ཚོགས་གོང་མའི་ཚོགས་མི་ཐོ་མ་སེ་ནི། ཨ་རིའི་གྲོས་ཚོགས་ཀྱི་གསེར་གྱི་རྟགས་མ་༧གོང་ས་མཆོག་ལ་འབུལ་རྒྱུའི་གྲོས་ཚོགས་གོང་མའི་གྲོས་འཆར་ལ་ང་དང་མཉམ་དུ་རྒྱབ་སྐྱོར་གནང་མཁན་ཞིག་ཡིན་པར་མ་ཟད།  བོད་ཀྱི་ཐོག་ཏུ་ཨ་རིའི་གཞུང་གི་སྲིད་བྱུས་ཐོག་མར་རགས་བསྡུས་སུ་གཏན་ལ་འབེབས་བྱེད་ཀྱི་བོད་འབྲེལ་སྲིད་བྱུས་ཁྲིམས་ཡིག་ལའང་རྒྱབ་སྐྱོར་གནང་མཁན་ཞིག་རེད།   གྲོས་ཚོགས་གོང་མའི་ཚོགས་མི་ཐོ་མ་སེའི་ལྕམ་སྐུ་སུ་སན་ (Susan)ལགས་ཐོ་མ་སེའི་ནང་མི་ཁ་ཤས་དང་མཉམ་དེ་རིང་འདིར་ཕེབས་ཡོད་པ་རེད། སུ་སན་ལགས། ཁྱེད་རང་ཡར་བཞེངས་ཏེ་བརྡ་སྟོན་གནང་རོགས། 

ད་༧གོང་ས་ཏཱ་ལའི་བླ་མ་མཆོག་གི་སྐོར་ལ་ཚིག་ཁ་ཤས་ཞུ་གི་ཡིན། འཛམ་གླིང་འདི་རྩོད་རྙོག་དང་འཐབ་རྩོད་ཀྱིས་ཁེངས་ཡོད་ཀྱང༌། ཏཱ་ལའི་བླ་མ་མཆོག་གིས་འཛམ་གླིང་འདི་རང་གི་བཅད་མཚམས་ལས་བརྒལ་བཅུག་ཐོག  ང་ཚོར་རེ་བ་དང་མཉམ་དུ་བློ་སྟོབས་སྤེལ་བར་མཛད་ཡོད། “ཁོང་རྟོགས་པ་ནི་སྙིང་རྗེ་རྟོགས་པ་ཡིན།”   “ཁོང་ལ་ཉན་པ་ནི་ཤེས་རབ་སྦྱོང་བ་ཡིན།”   “ཁོང་གི་ཉེ་དྲུང་དུ་བཅར་བ་ནི་ཧ་ཅང་ཁྱད་དུ་འཕགས་པ་ཞིག་ཡོད་པ་མྱོང་ཚོར་བྱེད་པ་ཡིན།”   སྐྱེས་མཆོག་འདི་ནི་ཞི་བདེ་དང་བྱམས་སྙིང་རྗེའི་ནུས་སྟོབས་ཆེན་པོ་ཞིག་རེད་ལ།   ཁོང་གིས་མི་རྣམས་གུ་དོག་དང༌། རང་འདོད་གཙོ་གཉེར་གྱི་འཆིང་རྒྱ་ལས་བརྒལ་ཏེ་གཞན་ཕན་སྒྲུབ་པའི་གདེང་སྟོབས་རྙེད་པར་མཛད།  ཏཱ་ལའི་བླ་མ་མཆོག་ལ་གུས་ངོས་ནས་གྲོགས་པོ་ཞེས་ཞུ་བའི་བསྐལ་བཟང་གི་གོ་སྐབས་ལོ་ངོ་ ༣༠ མ་ཟིན་ཙམ་བྱུང༌།ངའི་ཁྱོ་ག་རི་ཆར་ཌི་བྷུ་ལུམ་ (Richard Blum) བརྒྱུད་དེ་དྷ་རམ་ས་ལར་ཕྱི་ལོ་ ༡༩༧༨ ལོའི་སྟོན་དུས་སུ་ངས་༧གོང་ས་མཆོག་ཐོག་མར་མཇལ་རྒྱུ་བྱུང༌། ཁོང་གི་སྐུ་མདུན་དུ་བཅར་བའི་གཟི་བྱིན་གྱིས་ང་རང་མཚར་འཚབ་གཉིས་ལྡན་བྱུང་ལ་དེས་ལག་ལེན་ནང་ཞུགས་སུ་བཅུག་བྱུང༌། ཕྱི་ལོ་ ༡༩༧༩ ལོའི་ཕྱི་ཟླ་ ༩ པར་སན་ཧྥ་རན་སི་སེ་ཀོ་ (San Francisco) ཡི་གྲོང་ཁྱེར་སྤྱི་ཁྱབ་ཡིན་པའི་ཆ་ནས་ང་རང་༧གོང་ས་མཆོག་ལ་གྲོང་ཁྱེར་དེའི་ལྡེ་མིག་འབུལ་སླད་གདན་འདྲེན་དང་དགའ་བསུ་ཞུ་མཁན་གཞུང་ཞབས་ཐོག་མ་དེ་ཡིན།   འདི་ནི་ཁོང་ཨ་རིར་ཆིབས་བསྒྱུར་གནང་བ་ཐོག་མ་དེ་རེད།  ༧གོང་ས་མཆོག་ཞལ་འདྲིས་བྱུང་བ་དང་བསྟུན་ངས་༧གོང་ས་མཆོག་དང་རྒྱ་ནག་གི་དབུ་འཁྲིད་རྣམ་པའི་དབར་གྱི་འབྲེལ་ཟམ་ཡོང་ཐབས་བྱས་པ་ཡིན།  དོན་དངོས་སུ་ཕྱི་ལོ་ ༡༩༩༡ ལོ་ནས་དུས་སྐབས་མི་འདྲ་བ་གསུམ་ལ་ངའི་ཁྱོ་ག་དང་ངས། བོད་རྒྱའི་དབར་ཐད་ཀའི་གྲོས་མོལ་གནང་དགོས་པ་དང༌།   ༧གོང་ས་མཆོག་གི་དབུ་མའི་ལམ་གྱི་དགོངས་པ་བསྐྱར་ཟློས།   ༧གོང་ས་མཆོག་གིས་བོད་ལ་ཆོས་དང་རིག་གཞུང་གི་རང་སྐྱོང་འགན་ལེན་ཐུབ་པ་ཞིག་རྩོད་པ་ལས་རང་བཙན་རྩོད་ཀྱི་མེད་པའི་སྐོར་གསལ་བརྗོད་བཅས་ཀྱི་ནང་དོན་འཁོད་པའི་༧གོང་ས་མཆོག་གི་ཕྱག་བྲིས་ཁག་རྒྱ་ནག་གཞུང་གི་དབུ་འཁྲིད་ཚོར་ལག་སྤྲོད་ཞུས་པ་ཡིན།   ༧གོང་ས་མཆོག་དང་བཀའ་མོལ་ཐེངས་མང་ཞུས་པ་བརྒྱུད་ངས་ཏཱ་ལའི་བླ་མ་མཆོག་ནི་རྒྱུ་མཚན་ལྡན་པའི་མི་ཞིག་ཡིན་པར་ཆ་རྒྱུས་བྱུང༌།   ཁོང་གིས་རང་བཙན་རྩོད་གནང་གི་མེད་པར། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་སྒྲོམ་གཞིའི་འོག་དོན་ཕན་ལྡན་པའི་རང་སྐྱོང་རྩོད་གནང་གི་ཡོད།  གལ་ཏེ་རྒྱ་ནག་གི་དབུ་ཁྲིད་ཚོས་ཏཱ་ལའི་བླ་མ་མཆོག་དང་མཉམ་དུ་ཅོག་ཙེ་ཅིག་གི་འགྲམ་དུ་བསྡད་ན།  ཁོང་རྣམ་པས་ལྷན་དུ་དཀའ་སེལ་གྱི་ཐབས་ལམ་ཞིག་འཚོལ་རྙེད་ཐུབ་ནས།   ༧གོང་ས་མཆོག་གིས་རིང་མོ་ཞིག་ནས་སྨོན་པ་ལྟར་རང་ཡུལ་གངས་ལྗོངས་སུ་ཆིབས་བསྒྱུར་གནང་ཐུབ་པ་ཡོང་རྒྱུར་ངས་ཡིད་ཆེས་གཙང་མ་ཞུ་གི་ཡོད། སེམས་སྐྱོ་བ་ཞིག་ལ་འདི་ནི་ཤོར་དང་ཤོར་བཞིན་པའི་གོ་སྐབས་ཤིག་རེད། 

སྟབས་བདེའི་དོན་དངོས་ནི།   ༧གོང་ས་ཏཱ་ལའི་བླ་མ་མཆོག་ལས་ལྷག་པའི་གྲོས་ཚོགས་ཀྱི་གསེར་གྱི་རྟགས་མའི་གཟི་དཔལ་འབུལ་འོས་པའི་སྐྱེ་བོ་གཞན་སུ་ཡང་ངས་མི་དྲན་པ་དེ་རེད།   འཛམ་གླིང་ས་ཕྱོགས་གང་སར་ཁོང་གི་གསུང་བཤད་གནང་སར་མི་མང་སྟོང་ཚོ་མང་པོ་འདུ་ཞིང༌། སྐྱེ་བོ་དེ་ཚོས་ཁོང་གི་གསུང་ལ་ཉན་པར་རིངས་ལ། ཁོང་གི་བྱམས་བརྩེའི་སྐྱབས་འཇུག་འོག་ཏུ་ཚུད་པར་འདོད།   ཁོང་གི་གསུང་ཆོས་ནི་ཆོས་ལུགས་དང་།  རིག་གཞུང༌། མི་རིགས་མི་འདྲ་བ་ཁག་ཡོངས་ལ་ཁྱབ་ཅིང༌། ཞི་བདེ་དང༌། འཚེ་བ་མེད་པ། བསམ་ཤེས་བཅས་དང་འབྲེལ་བའི་ཁོང་གི་གསུང་འཕྲིན་ལས་ལྷག་པའི་འབྲེལ་ཆགས་པ་གཏན་ནས་བྱུང་མྱོང་མེད། དེར་བརྟེན་ངས་འདིར་སྙིང་དབུས་ནས་བཀྲ་ཤིས་བདེ་ལེགས་ཞུ་བ་དང་སྦྲགས། ༧གོང་ས་མཆོག་ནས་འཛམ་གླིང་ཡོངས་ལ་བྱམས་བརྩེའི་གསུང་འཕྲིན་ཁྱབ་སྤེལ་མཛད་པར་ང་རང་སྒེར་ངོས་ནས་ཐུགས་རྗེ་ཆེ་ཞུ་རྒྱུ་ཡིན། ཐུགས་རྗེ་ཆེ།