༄༅། །ཕྱི་ལོ་ ༢༠༢༣ ཟླ་བ་ ༡༠ ཚེས་ ༢༦ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རིའི་གྲོས་ཚོགས་འོག་མའི་ཚོགས་གཙོ་གསར་པ་མ་ཧིག་ཇོན་སོན་ (Mike Johnson) མཆོག་ལ་འཚམས་འདྲི་མཛད་ཡོད།
དེ་ཡང་མཚམས་འཕྲིན་ནང་མགོན་པོ་མཆོག་གིས། ཨ་རི་ནི་འཛམ་བུ་གླིང་གི་སྣེ་འཁྲིད་མཁན་རྒྱལ་ཁབ་ཅིག་ཡིན་ཞིང་། ངོས་རང་དུས་ཡུན་རིང་པོ་ནས་སྐུ་ཉིད་ཀྱི་རྒྱལ་ཁབ་ཀྱིས་མང་གཙོ་དང་། རང་དབང་། ཆོས་དད་རང་དབང་། འགྲོ་བ་མིའི་ཐོབ་ཐང་ལ་གུས་བརྩི་གནང་སྟངས་ལ་ཡིད་སྨོན་སྐྱེ་མྱོངས།
ཕྱི་ལོ་ ༡༩༧༩ ནས་བཟུང་ངོས་རང་ཨ་རིར་ཐེངས་མང་བསྐྱོད་རྒྱུའི་གོ་སྐབས་བྱུང་ཞིང་། སྐབས་དེར་ངོས་ཀྱི་བསམ་ཚུལ་གྲོས་ཚོགས་ཀྱི་ཚོགས་གཙོ་ཟུར་པ་གཙོས་པའི་དབུ་ཁྲིད་རྣམས་ལ་བཤད་རྒྱུ་བྱུང་། དེ་བཞིན་ངོས་ཀྱིས་ཨ་རིའི་གྲོས་ཚོགས་ཀྱི་སྲིད་དོན་ཚོགས་པ་ཟུང་སྦྲེལ་གྱིས་བོད་ཀྱི་ཆོས་དང་རིག་གཞུང་། སྐད་ཡིག་སྲུང་སྐྱོབ་ཆེད་རྒྱབ་སྐྱོར་གནང་བར་བསྔགས་བརྗོད་ཞུས་པ་ཡིན།
ཨ་རིས་ཞི་བདེ་དང་འཚེ་བ་མེད་པ། སྙིང་རྗེ་གཞི་ལ་བཞག་པའི་བོད་ཀྱི་ཆོས་དང་རིག་གཞུང་། ངོ་བོ་སྲུང་སྐྱོབ་ཆེད་སེམས་འགུལ་རྒྱབ་སྐྱོར་མུ་མཐུད་གནང་བར་ངོས་དང་བོད་མི་ཡོངས་ནས་བཀའ་དྲིན་རྗེས་དྲན་ཞུ་རྒྱུ་ཡིན། རིག་པའི་གཞུང་ལུགས་འདིས་འགྲོ་བ་སེམས་ཅན་ལ་ཕན་ཐོགས་ངེས་པའི་ཡིད་ཆེས་བརྟན་པོ་ཡོད།
དེང་སྐབས་འཛམ་བུ་གླིང་ལ་དཀའ་ངལ་མང་དག་ཅིག་འཕྲད་བཞིན་ཡོད་ནའང་། གོ་ལ་ཡོངས་སུ་ཕན་ཚུན་གཅིག་ལ་གཅིག་རྟེན་དང་འགྲོ་བ་མི་རིགས་གཅིག་གྱུར་གྱི་འདུ་ཤེས་གོང་མཐོར་འགྲོ་བཞིན་འདུག་པས། ཕུགས་སུ་བཟང་ཕྱོགས་ཀྱི་འགྱུར་བ་ཞིག་ཡོང་བའི་རེ་བ་བཟང་ས་ནས་རྒྱག་གི་ཡོད། ཅེས་དང་།
མཐར་མགོན་པོ་གང་ཉིད་མཆོག་གིས་གྲོས་ཚོགས་ཀྱི་ཚོགས་གཙོ་མཆོག་ནས་ཨ་རིའི་མི་མང་གི་རེ་བ་དང་མངོན་འདོད་འགྲུབ་རྒྱུ་དང་། ཞི་བདེ་ལྡན་པའི་འཛམ་གླིང་ཞིག་བསྐྲུན་རྒྱུར་བྱ་བ་ལམ་འགྲོ་ཡོང་བའི་ཐུགས་སྨོན་མཛད་འདུག་པ་བཅས།།
