༄༅། །བོད་དོན་ལས་འགུལ་བསྟི་གནས་ཁང་དང་རྒྱལ་སྤྱིའི་བོད་དོན་འབྲེལ་མཐུད་ལས་ཁང་། བོད་དོན་དྲང་བདེན་བསྟི་གནས་ཁང་བཅས་མཉམ་སྦྲེལ་གྱིས་འགྲེམས་སྤེལ་ཞུས་པའི་བོད་དང་། ༸གོང་ས་ཏཱ་ལའི་བླ་མ། ཡང་སྲིད་ཀྱི་ས་ཁམས་ཆབ་སྲིད་ཅེས་པ་དང་། རྒྱ་ནག་གི་སྟངས་འཛིན་བྱེད་པའི་བོད་ནང་གི་མི་སེར་སྤེལ་ཡུལ་གཏན་འཇགས་སློབ་གྲྭ་ཞེས་པའི་སྙན་ཐོ་གཉིས་ཉི་འོང་སྐད་དུ་བསྒྱུར་ཏེ་ཀྲོག་ཡོར་དབུ་འབྱེད་གནང་ཡོད།
དེ་ཡང་སྙན་ཐོ་དབུ་འབྱེད་ཀྱི་གསར་འགོད་གསལ་བསྒྲགས་ཐོག་ཉི་འོང་སྐུ་ཚབ་དོན་གཅོད་འབུམ་རམས་པ་ཨརྱ་ཚེ་དབང་རྒྱལ་པོ་ལགས་ཀྱིས་རྒྱ་ནག་གཞུང་གིས་བོད་རྒྱ་ཁོངས་ཡིན་ཚུལ་བརྗོད་པའི་ལོ་རྒྱུས་ཀྱི་བཤད་སྒྲོས་ལ་ཁུངས་ལུང་མེད་པ་མ་ཟད། འདས་པའི་ལོ་ངོ་བཅུ་ཕྲག་བདུན་ལྷག་རིང་རྒྱ་ནག་གིས་བོད་བཙན་བཟུང་བྱས་ཡོད་ནའང་བོད་མིའི་སྙིང་སྟོབས་དང་རྒྱལ་ཞེན་ལྷག་བསམ་ལ་བརྟེན་ནས་རྒྱ་གཞུང་གིས་ཁྲིམས་མཐུན་གྱིས་བོད་དབང་སྒྱུར་བྱེད་ཐུབ་མེད་ཅེས་དང་། ད་ཆ་རྒྱ་ནག་གཞུང་གིས་བོད་མིའི་སྙིང་སྟོབས་དང་ཆིག་སྒྲིལ་གྱི་ནུས་པ་མེད་པ་བཟོ་ཕྱིར་བོད་ཀྱི་ཆོས་དང་རིག་གཞུང་རྩ་མེད་བཟོ་བའི་ངན་སེམས་ཅན་གྱི་སྲིད་བྱུས་ལག་བསྟར་བྱེད་བཞིན་ཡོད། སྙན་ཐོ་འདི་གཉིས་ནང་རྒྱ་ནག་གཞུང་གིས་བོད་ཀྱི་ཆོས་རིག་རྩ་མེད་བཟོ་སྟངས་དང་། མི་སེར་སྤེལ་ཡུལ་གཏན་འཇགས་སློབ་གྲྭ་ཁག་ཏུ་བོད་ཕྲུག་ས་ཡ་གཅིག་ལྷག་བཙན་འཇུག་བྱེད་ཚུལ་གསལ་སྟོན་བྱས་འདུག་ཅེས་གསུངས།
དེ་བཞིན་ཁོང་གིས་ཐེངས་འདིའི་གསར་འགོད་གསལ་བསྒྲགས་ཀྱི་དམིགས་ཡུལ་གཙོ་བོ་ནི་རྒྱ་ནག་གཞུང་གི་དྲག་གནོན་འོག་བོད་ཀྱི་ནང་གི་ཛ་དྲག་གནས་སྟངས་སྐོར་གསར་འགོད་པ་དང་། བོད་དོན་རྒྱབ་སྐྱོར་བ། ཉི་འོང་མི་མང་ལ་གསལ་བཤད་བྱ་རྒྱུ་ཡིན་པས། ཚོགས་བཅར་བ་རྣམས་ནས་རྒྱ་ནག་གཞུང་ལ་བོད་ཀྱི་ཆོས་དང་རིག་གཞུང་རྩ་མེད་བཟོ་རྒྱུ་དང་མི་སེར་སྤེལ་ཡུལ་གཏན་འཇགས་སློབ་གྲྭ་ཁག་ཏུ་བོད་ཕྲུག་བཙན་འཇུག་བྱེད་མཚམས་འཇོག་ཆེད་འབོད་སྐུལ་གནང་སྐྱོང་ཡོང་བའི་རེ་སྐུལ་ཞུས་ཡོད།
བོད་དོན་ལས་འགུལ་བསྟི་གནས་ཁང་གི་པདྨ་ལགས་ཀྱིས་རྒྱ་ནག་གཞུང་གི་བཙན་གནོན་འོག་བོད་ཕྲུག་རྣམས་ལ་རང་དབང་ལྡན་པའི་ཐོག་ནས་རང་གི་ཕ་སྐད་སྦྱོང་སྤྱོད་བྱེད་པར་དམ་བསྒྲགས་བྱེད་ཀྱི་ཡོད་ཅིང་། ཕྲུ་གུ་ལོ་ན་གསུམ་ལ་སོན་པ་རྣམས་ཀྱང་མི་སེར་སྤེལ་ཡུལ་གཏན་འཇགས་སློབ་གྲྭར་སློབ་འཇུག་བྱེད་ཡོད་པས། སློབ་གྲྭ་དེ་དག་གི་དམིགས་ཡུལ་གཙོ་བོ་ནི་བོད་མི་རྒྱ་རིགས་སུ་སྒྱུར་ཐབས་བྱ་རྒྱུ་དེ་ཡིན་པ་གསུངས།
བོད་རང་བཙན་སློབ་ཕྲུག་ཚོགས་པའི་ཚེ་རིང་རྡོ་རྗེ་ལགས་ཀྱིས་རྒྱ་ནག་གཞུང་གིས་བོད་མིའི་ཆོས་དད་རང་དབང་ལ་རྡོག་རོལ་ཚབས་ཆེ་གཏོང་བཞིན་པ་མ་ཟད། བོད་ཀྱི་བླ་སྤྲུལ་རྣམ་པའི་ཡང་སྲིད་ངོས་འཛིན་གནང་སྒོར་ཐེ་བྱུས་མུ་མཐུད་བྱེད་ཡོད་པ་འགྲེལ་བརྗོད་གནང་བ་དང་ཆབས་ཅིག ཚོགས་བཅར་བ་རྣམས་ནས་སྙན་ཐོ་གཟིགས་ཞིབ་གནང་སྟེ་རྒྱ་ནག་གཞུང་གི་དྲག་གནོན་ཅན་གྱི་སྲིད་བྱུས་ལ་སྐྱོན་བརྗོད་གནང་སྐྱོང་ཡོང་བའི་འབོད་སྐུལ་ཞུས།
སྙན་ཐོ་ཉི་འོང་སྐད་དུ་བསྒྱུར་བར་ཉི་འོང་ཧོང་ཀོང་མང་གཙོ་མཐུན་ཚོགས་ (Japan Hong Kong Democracy Alliance) ནས་མཐུན་འགྱུར་གནང་ཡོད་པ་དང་། ཉི་འོང་སྐུ་ཚབ་དོན་ཁང་དང་། ཉི་འོང་བོད་རང་བཙན་སློབ་ཕྲུག་ཚོགས་པ། ས་གནས་བོད་མི་བཅས་ནས་གསར་འགོད་གསལ་བསྒྲགས་ཀྱི་གྲ་སྒྲིག་གནང་ཡོད་པ་བཅས།། 
