༄༅། །ཕྱི་ལོ་ ༢༠༢༣ ཟླ་བ་ ༡༠ ཚེས་ ༡༧ རེས་གཟའ་མིག་དམར་ཉིན་མོན་གྷོ་གཞིས་སྤྱི་ནོར་བུ་རིར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཨ་རིའི་གྲོས་ཚོགས་ཀྱི་གསེར་གྱི་གཟེངས་རྟགས་འབུལ་བཞེས་མཛད་ནས་ལོ་ངོ་ ༡༦ འཁོར་བའི་དགའ་སྟོན་རྟེན་འབྲེལ་གྱི་མཛད་སྒོ་ཞིག་འཚོགས་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༨ ཐོག་སྐུ་མགྲོན་དང་སེར་སྐྱ་མི་མང་རྣམས་གཞིས་སྤྱི་ནོར་བུ་རིར་ཚང་འཛོམས་ཀྱིས་༸རྒྱལ་བའི་སྐུ་པར་མཐོང་གྲོལ་རིན་པོ་ཆེར་དུང་རྒྱ་སྤོས་སྣེ་བསུས་ཏེ་སྐྱབས་གནས་ཤར་རྩེ་མཁན་རིན་པོ་ཆེ་བྱང་ཆུབ་སངས་རྒྱས་མཆོག་དང་། ས་གནས་འགོ་འཛིན་ལྷག་པ་སྒྲོལ་མ་ནས་སྐུ་པར་མཐོང་གྲོལ་རིན་པོ་ཆེར་མཎྜལ་རྟེན་གསུམ་འདེགས་འབུལ་ཞུས། དེ་ནས་དགའ་ལྡན་ཤར་རྩེ་གྲྭ་ཚང་གི་དབུ་མཛད་ཆེན་མོ་ནས་ཞལ་འདོན་གནས་བཅུ་དང་། ལྷ་བསངས། ༸རྒྱལ་བའི་ཞབས་བརྟན་གསོལ་འདེབས་སོགས་གསུང་སྐུལ་གྲུབ་རྗེས། ཤར་རྩེ་མཁན་རིན་པོ་ཆེ་མཆོག་དང་ས་གནས་འགོ་འཛིན་རྣམ་གཉིས་ནས་མི་མང་ལ་དུས་ཆེན་དང་འབྲེལ་བའི་གསུང་བཤད་གནང་རྗེས་དགེ་བསྐོས་ནས་ཐུགས་རྗེ་ཆེ་ཞུ་གནང་གྲུབ་བསྟུན་མཛད་སྒོ་རྒྱལ་ཁའི་ངང་གྲོལ།
སྐབས་དེར་སྐུ་མགྲོན་གཙོ་བོ་དཔལ་དགའ་ལྡན་ཤར་རྩེ་མཁན་རིན་པོ་ཆེ་མཆོག་གིས་གཙོས་ཁྲིམས་བདག་དགེ་བསྐོས་དང་དབུ་མཛད་ཆེན་མོ། དཔལ་ལྡན་བོད་མི་མང་སྤྱི་འཐུས། ས་འཐུས་ཚོགས་གཙོ། ས་གནས་འགོ་འཛིན། མཉམ་འབྲེལ་དང་རང་དབང་བདེན་པའི་ཚོགས་གཙོ། ཕྱག་མཛོད་དང་སྤྱི་མི། གཞུང་འབྲེལ་མིན་པའི་ཚོགས་སྡེ་ཁག་གི་ཚོགས་གཙོ། སེར་སྐྱ་མི་མང་ ༢༠༠ ལྷག་མཛད་སྒོར་མཉམ་ཞུགས་གནང་ཡོད།
དེ་ཡང་མཛད་སྒོ་གོ་སྒྲིག་གནང་མཁན་ལོ་ལྟར་བཞིན་དགའ་ལྡན་ཤར་རྩེ་ཐོས་བསམ་ནོར་གླིང་གྲྭ་ཚང་ནས་གནང་ཡོད་པ་བཅས། །
