༄༅། །ཕྱི་ལོ་ ༢༠༢༣ ཟླ་བ་ ༡༠ ཚེས་ ༡༥ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ནིའུ་ཛི་ལེནྚ་གྱི་བདམས་ཐོན་སྲིད་བློན་ཀྲྀ་སི་ལུ་སན་ (Christ Luxon) མཆོག་ལ་འཚམས་འདྲི་མཛད་ཡོད་པ་རེད།
དེ་ཡང་འཚམས་འཕྲིན་ནང་མགོན་པོ་མཆོག་གིས། ངོས་ཀྱིས་སྐུ་ཉིད་ཀྱི་སྲིད་དོན་ཚོགས་པར་ཉེ་ལམ་རྒྱལ་ཡོངས་འོས་བསྡུ་ཆེན་མོའི་ཁྲོད་རྒྱལ་ཁ་ཐོབ་པར་འཚམས་འདྲི་ཞུ་རྒྱུ་ཡིན།
དེང་སྐབས་འཛམ་གླིང་ཁྱོན་ཡོངས་སུ་ཕན་ཚུན་གཅིག་ལ་གཅིག་རྟེན་དང་འགྲོ་བ་མི་རིགས་གཅིག་གྱུར་གྱི་འདུ་ཤེས་མཐོ་རུ་འགྲོ་བཞིན་ཡོད་ནའང་འཛམ་བུ་གླིང་ལ་དཀའ་ངལ་མང་དག་ཅིག་འཕྲད་བཞིན་ཡོད། དེས་ན། ང་ཚོའི་སྤྱི་མཐུན་གྱི་འབད་རྩོན་ལ་བརྟེན་ནས་ཕུགས་སུ་བཟང་ཕྱོགས་ཀྱི་འགྱུར་བ་ཡོང་བའི་རེ་བ་བཟང་ས་ནས་རྒྱག་གི་ཡོད།
སྐུ་ཉིད་ཀྱི་རྒྱལ་ཁབ་ལ་འཛམ་གླིང་བདེ་འཇགས་དང་ཞི་བདེ་གོང་མཐོར་གཏང་རྒྱུའི་ནུས་པ་ཡོད་ལ། དེ་དང་འབྲེལ་ཏེ་སྐུ་ཉིད་ནས་ནིའུ་ཛི་ལེནྚ་གྱིས་རྡུལ་ཕྲན་མཚོན་ཆ་མེད་པ་བཟོ་རྒྱུའི་སྲིད་བྱུས་བཟུང་བ་དེ་ཉིད་རྒྱལ་ཁབ་གཞན་ཚོས་དོ་སྣང་དང་ལག་བསྟར་བྱེད་དགོས་པའི་བརྡ་ལན་ཞིག་ཆགས་ཡོད། མཐར་ཐུག་ན་སའི་གོ་ལ་འདི་ང་ཚོ་ཚང་མའི་ཕ་ཁྱིམ་བཟང་པོ་ཞིག་ཏུ་བསྐྲུན་རྒྱུའི་ཐབས་གཅིག་པོ་ནི་གོ་མཚོན་མེད་པ་བཟོ་རྒྱུ་དེ་རེད།
ངོས་རང་སྐུ་ཉིད་ཀྱི་མཛེས་སྡུག་ལྡན་པའི་རྒྱལ་ཁབ་ཏུ་ཐེངས་འགའ་ཤས་བསྐྱོད་རྒྱུའི་གོ་སྐབས་བཟང་པོ་བྱུང་། སྐབས་དེར་སྤྱི་ཚོགས་ཁྱོན་ཡོངས་ནས་ངོས་ཀྱིས་སྙིང་རྗེ་དང་། དགོངས་ཡངས། བཟོད་སྒོམ། ཆོག་ཤེས། རང་འགན་རང་ཁུར། ཆོས་ལུགས་མཐུན་འབྲེལ་ལྟ་བུའི་འགྲོ་བ་མིའི་བཟང་སྤྱོད་གོང་མཐོར་གཏང་རྒྱུའི་འབད་རྩོལ་ལ་དོ་སྣང་དང་རྒྱབ་སྐྱོར་གནང་བྱུང་། ཁོང་ཚོའི་དོ་སྣང་དང་གྲོགས་པོའི་འདུ་ཤེས་ཀྱིས་ངོས་ལ་སེམས་འགུལ་ཆེན་པོ་ཐེབས་བྱུང་།
སྐུ་ཉིད་ནས་ཡོང་འགྱུར་ནིའུ་ཛི་ལེནྚ་མི་མང་གི་མངོན་འདོད་དང་དགོས་མཁོ་སྒྲུབ་པར་བྱ་བ་ལམ་འགྲོ་ཡོང་བའི་སྨོན་འདུན་ཞུ་རྒྱུ་ཡིན། ཞེས་བཀའ་སྩལ་གནང་ཡོད་པ་བཅས།།
