༄༅། །བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལོ་ ༢༠༢༣ ཟླ་བ་ ༡༠ ཚེས་ ༡༢ ཉིན་རྒྱ་གར་གྱི་རྒྱལ་ས་ལྡི་ལི་ནས་བཞུགས་སྒར་དུ་༸ཞབས་སོར་བདེ་བར་འཁོད་གནང་ཡོད་པ་རེད།

དེ་ཡང་མགོན་པོ་གང་ཉིད་མཆོག་བཞུགས་སྒར་ཉེ་འགྲམ་གྷ་གལ་གནམ་ཐང་དུ་ཕེབས་སྐབས་དཔལ་༸རྒྱལ་བ་ཇོ་ནང་བའི་༸རྒྱལ་ཚབ་རིན་པོ་ཆེ་མཁན་སྤྲུལ་རྡོ་རྗེ་འཆང་སློབ་དཔོན་ངག་དབང་ཆོས་ཀྱི་སྣང་བ་མཆོག་དང་། དཔལ་ལྡན་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག དཔལ་ལྡན་སྲིད་ཚབ་ལྕང་ར་ཐར་ལམ་སྒྲོལ་མ་མཆོག བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གཙོས་པའི་བཞུགས་སྒར་ཁུལ་གྱི་གཞུང་དང་གཞུང་ཁོངས་མིན་པའི་ཚོགས་སྡེ་ཁག་གི་སྐུ་ཚབ། མི་མང་བཅས་ནས་ཕེབས་བསུ་གཟབ་རྒྱས་ཞུས་ཡོད།

མགོན་པོ་མཆོག་གྷ་གལ་གནམ་ཐང་ནས་༸རྒྱལ་བའི་ཕོ་བྲང་དུ་ཆིབས་འཁོར་བརྒྱུད་ཆིབས་སྒྱུར་བཀའ་དྲིན་སྐྱོང་སྐབས་ཕེབས་ལམ་གཡས་གཡོན་དུ་དད་ལྡན་མང་ཚོགས་ནས་དཀར་གཙང་མཇལ་དར་དང་། མེ་ཏོག་བདུག་སྤོས་སོགས་བཀྲ་ཤིས་པའི་རྫས་ལག་ཏུ་ཐོགས་ཏེ་ཕེབས་བསུ་གཟབ་རྒྱས་ཞུས་ཡོད་པ་བཅས།།