༄༅། །ཕྱི་ལོ་ ༢༠༢༣ ཟླ་བ་ ༡༠ ཚེས་ ༠༧ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འདི་ལོའི་ནོ་ཝེལ་ཞི་བདེའི་གཟེངས་རྟགས་བཞེས་མཁན་ལྕམ་སྐུ་ནར་གྷེ་སི་མོ་ཧ་མ་ཊི་ (Narges Mohammadi) ལགས་སུ་འཚམས་འདྲི་མཛད་ཡོད།

དེ་ཡང་འཚམས་འཕྲིན་ནང་མགོན་པོ་མཆོག་གིས། དེང་སྐབས་མང་གཙོ་དང་། ཕྱི་གསལ་ནང་གསལ། འགྲོ་བ་མིའི་ཐོབ་ཐང་ལ་བརྩི་མཐོང་། འདྲ་མཉམ་ལྟ་བུའི་འཇིགས་རྟེན་སྤྱི་ཡོངས་ཀྱི་རིན་ཐང་རྣམས་ལ་ཕྱོགས་ཀུན་ཏུ་ངོས་འཛིན་བྱེད་མཁན་ཇེ་མང་དུ་འགྲོ་བཞིན་ཡོད་ཅིང་། དེ་ཡིས་ང་ཚོ་ཚང་མར་ཕན་ཐོགས་ངེས་རེད། ངོས་ཀྱིས་སྐུ་ཉིད་ཀྱི་ཕྱག་སྦྲེལ་ལྕམ་སྐུ་ཤི་རིན་ཨ་བ་དི་ (Shirin Ebadi) ལགས་ཐེ་བའི་དེ་སྔའི་ནོ་ཝེལ་གཟེངས་རྟགས་བཞེས་མཁན་ལྷན་དུ་གྲོས་མོལ་བྱ་རྒྱུ་བྱུང་། ཁོང་ཚོས་སྤྱི་ཚོགས་ནང་བུད་མེད་ལ་དབྱེ་འབྱེད་མེད་པ་བཟོས་ཏེ་ཞི་བའི་ལམ་ནས་སྤྱི་ཚོགས་ཡར་རྒྱས་གཏང་རྒྱུའི་འབད་རྩོལ་གནང་བཞིན་པར་བསྔགས་བརྗོད་ཞུ། ནོ་ཝེལ་ཞི་བདེའི་གཟེངས་རྟགས་འདི་ཡང་ང་ཚོ་སྐྱེས་པ་ནས་བཟུང་ང་ཚོའི་འཚོ་བའི་ནང་དུ་བུད་མེད་ཇི་ལྟར་གལ་གནད་ཆེན་པོ་ཡིན་པ་ངོས་འཛིན་སླད་སྩལ་བ་ཡིན་པའི་ཡིད་ཆེས་བྱེད་ཀྱི་ཡོད།

འཛམ་བུ་གླིང་ནང་དུ་ཞི་བ་དང་། གྲོས་མོལ། འཚེ་བ་མེད་པའི་ལམ་ནས་དཀའ་རྙོལ་ཞི་འགྲིག་ཡོང་བའི་འགྱུར་བར་དང་ཞེན་བྱེད་མཁན་མང་དུ་འགྲོ་བཞིན་འདུག དེ་ལྟ་བུའི་འགྱུར་བའི་གཞི་རྟེན་ནི་བྱམས་པ་དང་། སྙིང་རྗེ། འགྲོ་བ་མིའི་འགན་ཁུར་ཡིན། དམིགས་ཡུལ་འདི་ཉིད་འགྲོ་བ་མི་རིགས་གཅིག་གྱུར་གྱི་འདུ་ཤེས་ལ་གཞི་བཞག་པའི་ཤེས་ཡོན་ལ་བརྟེན་ནས་སྒྲུབ་ཐུབ་པའི་ཡིད་ཆེས་ཡོད། རྒྱུ་མཚན་གང་ཡིན་ཞེ་ན་ང་ཚོ་ཚང་མས་ཕན་ཚུན་གཅིག་ལ་གཅིག་རྟེན་གྱི་ཚུལ་དུ་གནས་ཡོད་པས་གནད་དོན་དེ་ནི་ང་ཚོ་ཚང་མའི་བདེ་སྡུག་དང་འབྲེལ་ཡོད། ཅེས་བཀའ་སྩལ་ཡོད་པ་བཅས།།