༄༅། །ཕྱི་ལོ་ ༢༠༢༣ ཟླ་བ་ ༡༠ ཚེས་ ༠༣ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འདི་ལོའི་ནེ་ཝེལ་སྨན་གྱི་གཟེངས་རྟགས་བཞེས་མཁན་ཊི་ཧུ་ཝི་སི་མན་ (Drew Weissman) ལགས་དང་ཀ་ཊ་ལིན་ཀ་རི་ཀོ་ (Katalin Kariko) ལགས་རྣམ་གཉིས་ལ་འཚམས་འདྲི་མཛད་ཡོད།

དེ་ཡང་མཚམས་འཕྲིན་ནང་མགོན་པོ་མཆོག་གིས། སྐུ་ཉིད་གཉིས་ནས་གསར་གཏོད་མཛད་པའི་འཕྲུལ་རིག་ལ་བརྟེན་ནས་ཏོག་དབྱིབས་གཉན་རིམས་ཀྱི་སྨན་ཁབ་ (mRNA) བཏོན་ཐུབ་པ་བྱུང་ཡོད་ཅིང་། དེ་ཡིས་ཚན་རིག་ཉམས་ཞིབ་ཀྱིས་རྒྱ་ཆེ་ས་ནས་འགྲོ་བ་མི་རིགས་ལ་དངོས་ཡོད་ཕན་ཐོགས་ཇི་ལྟར་སྒྲུབ་ཐུབ་པའི་དཔེ་མཚོན་བསྟན་ཡོད། སྐུ་ཉིད་རྣམ་པས་ཏོག་དབྱིབས་གཉན་རིམས་ཁྱབ་གདལ་དུ་མ་ཕྱིན་པའི་སྔ་རོལ་དུ་དབུ་འཛུགས་གནང་བའི་ཉམས་ཞིབ་དེ་ལ་བརྟེན་ནས་འཛམ་གླིང་ཁྱོན་ཡོངས་སུ་མི་མང་སྟོང་ཕྲག་མང་པོའི་ཚེ་སྲོག་སྐྱབས་ཡོད། ངོས་ཀྱིས་སྐུ་ཉིད་རྣམ་པའི་གཟེངས་ཐོན་གྲུབ་འབྲས་དང་། གཞན་ཕན་བརྒྱུད་མི་ཚེ་དོན་དང་ལྡན་པ་བསྐྱལ་བར་བསྔགས་བརྗོད་ཞུ་རྒྱུ་ཡིན།

དེང་སྐབས་ང་ཚོར་ཉིན་ལྟར་འཛམ་བུ་གླིང་འདི་ཕན་ཚུན་གཅིག་ལ་གཅིག་རྟེན་དུ་གྱུར་ཡོད་པ་དང་། ཇི་ལྟར་ཚན་རིག་པ་རྣམས་ནས་ང་ཚོའི་གནས་ཡུལ་དེ་སྔར་ལས་བཟང་ཞིང་ཉེན་ཁ་མེད་པ་ཞིག་ཏུ་བསྐྲུན་རྒྱུར་ཞབས་འདེགས་སྒྲུབ་ཐུབ་ཚུལ་དྲན་སྐུལ་གཏོང་གི་ཡོད། ཅེས་བཀའ་སྩལ་ཡོད་པ་བཅས།།