༄༅། །འདི་གར་བྱང་ཨ་རིའི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༢༣ ཟླ་བ་ ༡༠ ཚེས་ ༧ དང་ ༨ ཉིན་གཉིས་རིང་། རྒྱ་ནག་མང་གཙོ་མཉམ་འབྲེལ་ལྷན་ཚོགས་དང་།(中国民联) པེ་ཅིང་དཔྱིད་ཀའི་དུས་དེབ་ཁང་། (北京之春) དྲུག་བཞི་དྲན་གསོའི་འགྲེམས་སྟོན་ཁང་། (六四纪念馆) རྒྱ་ནག་མང་གཙོ་ཚོགས་པ་ (中国民主党) བཅས་ཚོགས་པ་བཞི་ཐུན་མོང་ནས་ས་གནས་ནིའུ་ཡོག་ཏུ་མཚོ་འགྲམ་ས་གནས་གཉིས་ཀྱི་གནས་བབ་ (两岸情势研讨会）ཞེས་པའི་བརྗོད་གཞིའི་སྟེང་བགྲོ་གླེང་ཚོགས་འདུ་ཞིག་སྐོང་འཚོགས་གནང་བ་དང་། ཉིན་དང་པོར་རྒྱ་ནག་གི་འགྱུར་འགྲོས་དང་ང་ཚོའི་གདོང་ལེན་ཞེས་པའི་བརྗོད་བྱ་གཙོ་བོར་བཟུང་ནས་འགྲོ་གླེང་གནང་ཞིང་། ཉིན་གཉིས་པོར་ཐེའི་ཝན་གྱི་འོས་བསྡུ་ཆེན་མོ་དང་ཨ་རྒྱ་ཐེའི་གསུམ་གྱི་འབྲེལ་བ་ཞེས་པའི་བརྗོད་བྱ་གཙོ་བོར་བཟུང་ནས་བགྲོ་གླེང་གནང་། ཚོགས་འདུའི་ཐོག་རྒྱ་ནག་གི་མང་གཙོ་དོན་གཉེར་བ་གྲགས་ཅན་སྐུ་ཞབས་ཝེ་ཅིང་ཧྲེང་ལགས། སྐུ་ཞབས་ཧུ་ཕིང་ལགས། སྐུ་ཞབས་ཝང་ཅུན་ཐོའོ་ལགས། ཐའེ་ཝན་ནས་ཕེབས་པའི་སྐུ་ཞབས་ལི་ཡུའུ་ཐན་ལགས་གཙོས་པའི་རྒྱ་རིགས་ཤེས་ཡོན་ཅན་ཉི་ཤུ་ལྷག་ཕེབས་ནས་གཏམ་བཤད་དང་བགྲོ་གླེང་གནང་བ་དང་།  བྱང་ཨ་རི་བོད་ཀྱི་སྐུ་ཚབ་དོན་གཅོད་ཁང་གི་རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་མགྲོན་འབོད་ལྟར་ཚོགས་འདུར་ཆེད་བཅར་གྱིས་མཉམ་ཞུགས་བྱས།ཚོགས་འདུའི་ཐོག་གོ་ལའི་ཆབ་སྲིད་ཀྱི་འགྱུར་འགྲོས་དང་། རྒྱ་ནག་ནང་གི་དཔལ་འབྱོར་དང་ཆབ་སྲིད་འགྱུར་བ་ཤུགས་ཆེན་འགྲོ་བཞིན་པའི་ཐོག་ཚོགས་ཞུགས་པ་རྣམས་ནས་རང་སོ་སོའི་དཔྱད་བརྗོད་དང་མ་འོངས་པའི་ལས་འགུལ་སྤེལ་ཕྱོགས་སོགས་ཀྱི་སྐོར་ལ་བསམ་ཚུལ་བཏོན་པ་མ་ཟད། དེ་བཞིན་འཛམ་གླིང་ནང་དམག་འཁྲུག་འབྱུང་བཞིན་པའི་འགྱུར་གྲོས་དང་རྒྱ་ནག་གིས་ཐའེ་ཝན་ཐོག་དམག་འཐབ་བྱེད་འཆར་ཡོད་མེད་སོགས་ཀྱི་སྐོར་ལ་བསམ་ཚུལ་མང་པོ་བཏོན། ཚོགས་འདུའི་སྐབས་ཚོགས་བཅར་བ་གཏམ་བཤད་གནང་མཁན་གྲགས་ཅན་མང་གཙོ་དོན་གཉེར་བ་དང་རྩོམ་པ་པོ་མང་པོས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་རྣམ་དཔྱོད་ལྡན་པའི་འཚེ་མེད་ཞི་བའི་ཐབས་ལམ་བརྒྱུད་དཀའ་ངལ་སེལ་ཐབས་ཀྱི་ལམ་སྟོན་ལ་བསྔགས་བརྗོད་དང་རྗེས་སུ་ཡི་རངས་གནང་སོང་། 

རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་ཀྱིས་བོད་མིའི་རང་དབང་འཐབ་རྩོད་ལོ་བདུན་ཅུ་ལྷག་སོང་ཡང་མི་རབས་བརྒྱུད་ནས་འཐབ་རྩོད་མུ་མཐུད་བྱེད་བཞིན་ཡོད་པ་དང་། མི་རབས་རྒན་པའི་སྐབས་བཅིངས་བཀྲོལ་དམག་ཟེར་བས་བོད་མི་ས་ཡ་འགལ་བ་དམར་གསོད་བཏང་བ་དང་། ད་ལྟའི་ཆར་རང་ལུས་མེར་སྲེག་རིམས་པར་བྱུང་བ་ནི་ལོ་རྒྱུས་ནང་སྔར་བྱུང་མ་མྱོང་མེད་ཅིང་། བོད་ནང་རྒྱ་ནག་དམར་ཤོག་གཞུང་གིས་སྲིད་ཇུས་འདྲ་མིན་བཟུང་ནས་བོད་མིའི་མིང་ཙམ་མེད་པ་ཤུལ་མེད་བཟོ་ཐབས་བྱེད་བཞིན་ཡོད་པ་སོགས་ཐེར་འདོན་བྱས། རྒྱ་རིགས་འབྲེལ་མཐུད་པས་བོད་མི་ཚོ་དམྱལ་བ་མི་ཡུལ་དུ་བྱུང་བའི་དཀའ་སྡུག་འཕྲད་བཞིན་ཡོད་ཀྱང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ལམ་སྟོན་འོག་འཚེ་མེད་ཞི་བའི་ལྟ་གྲུབ་རྗེས་སྙེགས་བཞིན་ཡོད་པ་མ་ཟད། བོད་མིའི་སྒྲིག་འཛུགས་ནས་ད་དུང་མུ་མཐུད་གཉིས་ཕན་དབུ་མའི་ལམ་དེ་བཞིན་གཞུང་འབྲེལ་སྲིད་བྱུས་སུ་འཛིན་བཞིན་ཡོད་པ་འགྲེལ་བཤད་དང་། བོད་ནང་བཟང་ཕྱོགས་ཀྱི་འགྱུར་བ་དང་དཀའ་རྙོག་མ་སེལ་བར་བོད་མི་རྣམས་ནས་མུ་མཐུད་རྒྱ་ནག་དམར་ཤོག་གཞུང་གི་དྲག་གནོན་ཐེར་འདོན་དང་སྐྱོན་བརྗོད་བྱ་རྒྱུ་ཡིན་པར་གསུངས། དེ་བཞིན་ཁོང་གིས་འཐབ་རྩོད་རྣམ་པ་འདྲ་མིན་ནས་ཕེབས་པའི་ལས་འགུལ་བ་ཚོས་མཉམ་རུབ་ཀྱི་ནུས་པ་གོང་སྤེལ་གནང་ཕྱོགས་ཐད་ཕྱག་ལས་གནང་དགོས་པའི་འབོད་སྐུལ་ཞུས་ཡོད་པ་བ་བཅས།།